អង់គ្លេស ៖ ក្រុម​តោ​ខៀវ Chelsea បាន​យកឈ្នះ​លើ​ក្រុម​មាន់​ខ្នាយ​មាស Tottenham Hotspur ជំនួប​ជើង​ទី​១ វគ្គ​ពាក់កណ្តាល​ផ្តាច់ព្រ័ត្រ​ពានរង្វាន់ EFL Cup ដោយ​លទ្ធផល ២-០​។ ខណៈ​ជំនួប​រវាង​ក្រុម​ហង្ស​ក្រហម Liverpool នឹង​ក្រុម​កាំភ្លើង​ធំ Arsenal ត្រូវ​លើក​ពេល​ប្រកួត​ដោយសារ​កូ​វី​ដ​-១៩​។

ជំនួប​ដែល​ធ្វើ​ឡើង​នៅ​កីឡដ្ឋាន Stamford Bridge កាលពី​យប់មិញ ខ្សែបម្រើ​ប្រយុទ្ធ Kai Havertz ជា​អ្នករក​គ្រាប់​សម្រាប់​ម្ចាស់ផ្ទះ Chelsea និង​មួយ​គ្រាប់​ទៀត ជា​គ្រាប់​បាល់​ចូល​ទី​ខ្លួនឯង (Own Goal) ពី​សំណាក់​ខ្សែការពារ Ben Davies របស់​ក្រុម​ភ្ញៀវ​។ ក្រុម​ទាំង​២ នឹង​ត្រូវ​តទល់​គ្នា​សម្រាប់​ជើង​ទី​២ នៅ​ថ្ងៃ​ទី​១២ ខែមករា ឆ្នាំ​២០២២ ដើម្បីរ​កមួយ​ក្រុម​បន្ត​ឡើង​ទៅ​វគ្គ​ផ្តាច់ព្រ័ត្រ​។

ដោយឡែក​១​គូ​ទៀត សម្រាប់​ជំនួប​ជើង​ទី​១ វគ្គ​ពាក់កណ្តាល​ផ្តាច់ព្រ័ត្រ​រវាង​ម្ចាស់ផ្ទះ Liverpool នឹង Arsenal នៅ​កីឡដ្ឋាន Anfield ដែល​ត្រូវ​លេង​យប់​នេះ ត្រូវ​លើក​ពេល​ទៅ​ប្រកួត​នៅ​ថ្ងៃ​ទី​១៣ ខែមករា វិញ បន្ទាប់​ពី​ក្លិប Liverpool បាន​ដាក់​សំណើ​ទៅ​លី​គ​បាល់ទាត់​អង់គ្លេស (EFL) ដើម្បី​សុំ​ពន្យារពេល​ដោយសារ​ការ​កើនឡើង​ករណី​ឆ្លង​កូ​វី​ដ​-១៩ លើ​កីឡាករ និង​បុគ្គលិក​របស់​ខ្លួន​។ ខណៈ​ជំនួប​ជើង​ទី​២ នឹង​ត្រូវធ្វើ​ឡើង​នៅ​ថ្ងៃ​ទី​២០ ខែមករា​៕ (​ដកស្រង់​ចេញពី BBC)