ខេត្តប៉ៃលិន ៖ ក្រោយពីសង្កេតឃើញដំណាំស្វាយកែវរមៀតរបស់ខ្លួន ដែលដាំបានរយៈពេល៤ឆ្នាំមកហើយនៅក្នុងដីចំការ មិនសូវមានផ្លែ និងតម្លៃទីផ្សារធ្លាក់ចុះខ្លាំង ទើបរហូតមកដល់ថ្ងៃទី០៥ ខែមករា ឆ្នាំ២០២២នេះ កសិករមួយគ្រួសាររស់នៅក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន បានសម្រេចចិត្តកា.ប់ដើមស្វាយជាង១០០ដើមចោល ហើយងាកមកដាំដំណាំស្វាយចន្ទីជំនួសវិញ។
បើតាមការរៀបរាប់ពីបុរសម្នាក់មានឈ្មោះ យិន ណា អាយុ៤៥ឆ្នាំ ជាម្ចាស់ចំការខាងលើ បានឱ្យដឹងថា ៖ លោកមានដីចំនួន២,៥ហិកតា នៅក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ដោយដាំដំណាំស្វាយកែវរមៀតទាំងអស់។ ប៉ុន្តែក្រោយពីដាំបានរយៈពេល៤ឆ្នាំ លោកក៏បញ្ជាដើម (ថ្នាំសម្រាប់បញ្ចេញផ្កានិងផ្លែ) ស្រាប់តែមិនចេញផ្កាផ្លែច្រើននោះទេ ហើយពេលប្រមូលផលតម្លៃទីផ្សារធ្លាក់ចុះខ្លាំងថែមទៀត ទើបខាងលោកបានសម្រេចចិត្តកា.ប់ដើមចោល ដើម្បីងាកបែរទៅដាំ ដំណាំស្វាយចន្ទីជំនួសវិញ។
លោកបន្តទៀតថា បើនៅថ្ងៃខាងមុខ បើសិនជាដំណាំស្វាយចន្ទី ធ្លាក់ចុះខ្លាំងទៀត មិនដឹងជាងាកបែរទៅដាំដំណាំអ្វីផ្សេងជំនួសទេ ហើយខាងលោកក៏សូមឱ្យខាងមន្ទីរពាណិជ្ជកម្មខេត្ត និងមន្ទីរកសិកម្មខេត្តប៉ៃលិន ជួយរកទីផ្សារជូនប្រជាពលរដ្ឋ ដែលកំពុងជួបប្រទះនឹងបញ្ហានេះផងដែរ។
ពាក់ព័ន្ធនឹងបញ្ហាខាងលើនេះ មន្ត្រីនៃមន្ទីរកសិកម្មខេត្តបានឱ្យដឹងថា ៖ បុរសខាងលើ បានកា.ប់ដើមស្វាយកែវរមៀតចោល ព្រោះគាត់បែរមកដាំដើមស្វាយចន្ទីវិញ ព្រោះគាត់គិតថា តម្លៃទីផ្សារស្វាយចន្ទី ឡើងខ្ពស់ រីឯស្វាយកែវរមៀត មានការធ្លាក់ចុះខ្លាំងគួរឱ្យកត់សម្គាល់។ តែទោះបីជាយ៉ាងណា ក៏មានការសោកស្តាយចំពោះការកា.ប់ចោលនេះផងដែរ ខណៈពេលគាត់ខំដាំបានរយៈពេលជាច្រើនឆ្នាំ ទម្រាំតែទទួលបានផលផ្លែ រហូតមកដល់សព្វថ្ងៃនេះ បែរជាកា.ប់ចោលទៅវិញ៕
ចែករំលែកព័តមាននេះ