រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បង្គោលភ្លើងមួយកន្លែងបានឆ្លងចរន្តទុស្សេខ្សែភ្លើង បណ្តាលឱ្យឆាបឆេះផ្អើលអស់ប្រជាពលរដ្ឋ និងសមត្ថកិច្ចទាក់ទងហៅរថយន្តពន្លត់អគ្គិភ័យមកបាញ់ទឹកពន្លត់អស់ភ្លាមៗ បង្កឱ្យមានការភ្ញាក់ផ្អើលនាវេលាម៉ោង៥ទៀបភ្លឺ ថ្ងៃទី៦ ខែមករា ឆ្នាំ២០២២ នៅក្នុងផ្សារសាមគ្គី ស្ថិតនៅសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
សេចក្តីរាយការណ៍បន្តថា បង្គោលភ្លើងដែលកើតហេតុខាងលើនេះ មានលេខប្រអប់ទី១ P271.312 និងប្រអប់ភ្លើងទី២ P272.313 ដែលត្រូវឆ្លងចរន្តឆាបឆេះ។
បើតាមប្រភពព័ត៌មានបញ្ជាក់ពីបងប្អូនប្រជាពលរដ្ឋនៅកន្លែងកើតហេតុ បានអោយដឹងថា នៅពេលក្បាលព្រលប់វេលាម៉ោង៨យប់ ថ្ងៃទី៥ ខែមករា ឆ្នាំ២០២២ បានឆ្លងចរន្តឆាបឆេះរួចម្តងមកហើយ តែត្រូវបានពួកគាត់នាំគ្នាយកបំពង់អគ្គិភ័យមកបាញ់រលត់អស់ ក៏នាំគ្នាចូលគេងអស់ទៅ ។
ប្រភពដដែលបន្តថា លុះនៅវេលាម៉ោង៥ទៀបភ្លឺ ស្រាប់តែបង្គោលភ្លើងខាងលើនេះ ក៏បានទុស្សេចរន្តភ្លើង បណ្តាលឱ្យឆាបឆេះមួយសារទៀត តែដោយសារភ្លើងឆាបឆេះខ្លាំងពេក មិនអាចពន្លត់កើត ក៏ទាក់ទងទៅសមត្ថកិច្ចភ្លាមៗ បន្ទាប់មកខាងកម្លាំងសមត្ថកិច្ចមូលដ្ឋានក៏បានទាក់ទងបន្តហៅរថយន្តពន្លត់អគ្គិភ័យមកបាញ់ទឹកពន្លត់រហូតរលត់អស់ភ្លាមៗតែម្តង ក្នុងនោះមានរថយន្តពន្លត់អគ្គិភ័យមកចំនួន៣គ្រឿង ហើយបានបាញ់ទឹកអស់ចំនួន២គ្រឿង នៅសល់មួយគ្រឿង។
គួរបញ្ជាក់ថា ក្នុងហេតុការណ៍ខាងលើនេះ រថយន្តពន្លត់អគ្គិភ័យរបស់ស្នងការ នគរបាលរាជធានីភ្នំពេញ មកបាញ់ទឹកពន្លត់ចំនួន៣គ្រឿង ប៉ុន្តែបាញ់អស់២គ្រឿងក៏រលត់អស់ជាស្ថាពរ បន្ទាប់មករថយន្តអគ្គិភ័យក៏បានបើកត្រឡប់ចេញទៅគោលដៅវិញអស់ទៅផងដែរ។
ចែករំលែកព័តមាននេះ