តើអ្នកធ្លាប់បែកញើសនៅពេលយប់ដែរឬទេ? តើវាពិតជាគួរឱ្យរំខានដល់ដំណេកអ្នកណាស់មែនទេ? ថ្ងៃនេះ អ្នកនឹងបានស្វែងយល់ពីវិធីសាស្រ្ត៣យ៉ាង ដែលជួយអ្នកជៀសផុតពីបញ្ហានេះ។
១. កាត់បន្ថយស្រ្តេស
ភាពតានតឹងក្នុងអារម្មណ៍ ឬស្ត្រេស ជាកត្តាចម្បងមួយបង្កបញ្ហាបែកញើសពេលយប់។ នេះក៏ដោយសារតែអារម្មណ៍ស្រ្តេសមិនថាពេលយប់ឬពេលថ្ងៃទេ ធ្វើឱ្យខួរក្បាលរបស់អ្នកដំណើរការជាប់រហូត និង ចំណាយថាមពលខ្លាំង។ ជាលទ្ធផល រាងកាយអ្នកនឹងបែកញើសទៅតាមហ្នឹងដែរ។ ដូចនេះហើយ ប្រសិនបើអ្នកបែកញើសនៅពេលយប់ អ្នកគួរគិតគូរកាត់បន្ថយស្រ្តេសរបស់អ្នកកុំឱ្យគរដូចភ្នំពេក។
២. ជៀសវាងការទទួលទានគ្រឿងស្រវឹង
ក្រុមអ្នកជំនាញនិយាយថា ជាតិអាល់កុលធ្វើឱ្យសសៃឈាមរីកធំជិតស្បែកដែលអាចធ្វើឱ្យអ្នកមានអារម្មណ៍ក្ដៅពេញខ្លួន និងបែកញើសកាន់តែច្រើន។ ចំពោះស្ត្រី ជាតិអាល់កុលក្រៅពីធ្វើឱ្យគេងមិនបានស្កប់ហើយនោះ វាក៏ធ្វើឱ្យរោគសញ្ញានៃការអស់រដូវកាន់តែធ្ងន់ធ្ងរនៅថ្ងៃបន្ទាប់ផងដែរ។
៣. ជៀសវាងការទទួលទានកាហ្វេ
សារជាតិកាហ្វេអ៊ីន បង្កការរំញោចដល់ក្រពេញញើស ដែលជាលទ្ធផលធ្វើឱ្យអ្នកបែកញើសនៅពេលយប់។ ចូរអ្នកជៀសវាងទទួលទានកាហ្វេសូម្បីតែមួយពែង ឬភេសជ្ជៈដទៃទៀតដែលមានផ្ទុកជាតិកាហ្វេអ៊ីននៅរយៈពេលប៉ុន្មានម៉ោងមុនពេលចូលគេង។ ជាពិសេសប្រសិនបើអ្នកឆាប់ប្រតិកម្មទៅនឹងជាតិកាហ្វេអ៊ីនទៀតនោះ ចូរជៀសវាងការទទួលទានភេសជ្ជៈកាហ្វេអ៊ីន ឬកាហ្វេពី ៥ ទៅ ៦ ម៉ោងមុនពេលចូលគេង៕
ចែករំលែកព័តមាននេះ