អង្គការសុខភាពពិភពលោក (WHO) បានក្រើនរំលឹកកាលពីថ្ងៃពុធថា ពិភពលោកនឹងឃើញ “ករណីនៃរលកយក្សស៊ូណាមិរបស់កូវីដ” ដែលនឹងអូសបន្លាយពេញរដូវរងា។ លោក Tedros Adhanom Ghebreyesus អគ្គនាយកអង្គការសុខភាពពិភពលោក បាននិយាយថា កូវីដបម្លែងថ្មីអូមីក្រុងដែលអាចឆ្លងបានលឿន និង កូវីដដែលតា ដែលធ្វើឱ្យមានជំងឺធ្ងន់ធ្ងរ កំពុងតែត្រៀមនឹងបង្កជារលកស៊ូណាមិ។

លោក Tedros បាននិយាយថា៖ “ការផ្ទុះនេះនឹងដាក់សម្ពាធយ៉ាងខ្លាំងទៅលើបុគ្គលិកសុខាភិបាលដែលហត់នឿយ និង ប្រព័ន្ធសុខាភិបាលដែលកំពុងតែទប់ទល់ទាំងលំបាក និង ជីវភាពរស់នៅរបស់ប្រជាជនទាំងមូល។”

អគ្គនាយក WHO បានព្រមានថា កូវីដអូមីក្រុងអាចនឹងមានគ្រោះថ្នាក់ បើទោះបីជាភាគច្រើនមិនបង្កទៅជាជំងឺធ្ងន់ក៏ដោយ។ វាអាចធ្វើឱ្យយើងគេងពេទ្យបាន ប្រសិនបើវាវាយលុកខ្លាំង។ ការស្រាវជ្រាវដំបូងបានរកឃើញកូវីដអូមីក្រុង​ បាននាំឱ្យមានរោគសញ្ញាកូវីដមិនសូវធ្ងន់ធ្ងរ។

លោក Tedros បាននិយាយថា៖ “មានការនិយាយតគ្នាមកថា កូវីដអូមីក្រុងមានសភាពស្រាល។ តែគេមិនបានដឹងថា វាអាចនឹងមានគ្រោះថ្នាក់ ព្រោះតែវាអាចឆ្លងបានលឿន និង បង្កឱ្យមានមនុស្សជាច្រើនចូលពេទ្យ និង ពិបាកក្នុងការគ្រប់គ្រងសម្រាប់ប្រព័ន្ធសុខាភិបាល។”

យោងតាមសារព័ត៌មាន The Economist បានឱ្យដឹងថា៖ “នៅពេលដែលនរណាម្នាក់ឈឺខ្លាំង ហើយទាមទារការព្យាបាលនៅមន្ទីរពេទ្យគ្រូពេទ្យប្រហែលជាមានជម្រើសតិចជាងមុនសម្រាប់អូមីក្រុង ដោយសារតែគេនៅស្គាល់វាមិនទាន់ច្បាស់នៅឡើយ ហើយក៏មានការព្យាបាលមិនទាន់ជាក់លាក់នៅឡើយ៕”