សហរដ្ឋអាមេរិក ៖ ជនអនាមិកម្នាក់បានចំណាយប្រាក់ក្នុងការដេញថ្លៃចំនួនជាង៣,៤៦លានដុល្លារអាមេរិក ដើម្បីទទួលទានអាហារថ្ងៃត្រង់ជាមួយលោក Warren Buffett មហាសេដ្ឋីចំណាត់ថ្នាក់លេខ៣ និងជាវិនិយោគិនដ៏ល្បីឈ្មោះមួយរូបនៅលើពិភពលោក ។
ទឹកប្រាក់ទាំងនេះ នឹងត្រូវផ្តល់ដល់អង្គការសប្បុរសធម៌សាន់ហ្វ្រង់ស៊ីស្កូមួយឈ្មោះថាGlide ដើម្បីផ្តល់អាហារ ថែទាំសុខភាព និងសេវាផ្សេងៗទៀតដល់មនុស្សដែលគ្មានផ្ទះសម្បែង អ្នកក្រីក្រ និងជនដែលរងនូវការំលោភបំពានផងដែរ ។
ការដេញថ្លៃក្នុងរយៈពេល៥ថ្ងៃ ត្រូវបានធ្វើឡើងនៅលើវែបសាយ EBAY.O និងបានបញ្ចប់កាលពីយប់ថ្ងៃសុក្រ កន្លងមក ។ ជ័យជម្នះលើការដេញថ្លៃនេះ គឺត្រូវបានបង់ប្រាក់សរុបដោយអ្នកដេញថ្លៃដែលមិនបញ្ចេញឈ្មោះនៅក្នុងឆ្នាំ២០១២ ពោលគឺជាការលក់នូវវិភាគទានដ៏ថ្លៃជាងគេបំផុតនៅលើវែបសាយ eBay ។
លោក Warren Buffett បានដេញថ្លៃប្រចាំឆ្នាំទី១៧ហើយ សម្រាប់ព្រះវិហារ Glide ដែលបានរៃអង្គាសប្រាក់ចំនួនប្រហែល២៣,៦លានដុល្លារអាមេរិក ។
លោក Rev. Cecil Williams ជាសហស្ថាបនិកមួយរូប និងជាគ្រូគង្វាលនៃព្រះវិហារ Glide Memorial United Methodist Church ចាប់តាំងពីឆ្នាំ១៩៦៣មក បានមានប្រសាសន៍ថា ៖ « ការចូលរួមរបស់លោក Warren Buffett បានទាក់ទាញការចាប់អារម្មណ៍បន្ថែមលើការរៃអង្គាសប្រាក់សប្បុរសធម៌ និងបានជួយដល់កម្មវិធីសប្បុរសធម៌នូវថវិកា១៧លានដុល្លារប្រចាំឆ្នាំ » ។
ព្រះវិហារ Glide បានផ្តល់សេវាកម្មអាហារចំនួន៧៥ម៉ឺនមុខដោយឥតគិតថ្លៃ, ៨១,៥ម៉ឺនសឺរ៉ាំង និងសេវាមើលថែទាំក្មេងៗចំនួន៤៥០នាក់ក្នុងមួយឆ្នាំៗ ។
លោក Williams បានមានប្រសាសន៍បន្ទាប់ពីការដេញថ្លៃនេះថា ៖ « នេះគឺជារឿងដ៏ល្អបំផុតដែលពួកយើងធ្លាប់មានអស់រយៈពេល៥០ឆ្នាំកន្លងមក ។ អ្នកដែលឈ្នះក្នុងការដេញថ្លៃ និងមិត្តភក្តិរបស់គេ៧នាក់ទៀតអាចចូលរួមតុអាហារជាមួយលោកនៅភោជនីយដ្ឋាន Smith & Wollensky ក្នុងរដ្ឋ Manhattan » ។
យោងតាមទស្សនាវដ្តី Forbes បានឲ្យដឹងថា លោក Warren Buffett គឺមនុស្សមានទ្រព្យសម្បត្តិច្រើនជាងគេទី៣នៅលើសកលសកលលោក ដែលមានទឹកប្រាក់ចំនួន៦៦,៥ប៊ីលានដុល្លារ ។ លោកមានទ្រព្យសម្បត្តិដ៏ច្រើនលើសលប់នេះ គឺដោយសារលោកបានបង្កើតក្រុមហ៊ុន Berkshire Hathaway Inc ទៅជាក្រុមហ៊ុនពហុអាជីវកម្ម ក្នុងនោះមានអាជីវកម្មចំនួន៩០ប្រភេទរួមមាន ក្រុមហ៊ុនធានារ៉ាប់រង ក្រុមហ៊ុនថាមពល ក្រុមហ៊ុនគីមី ក្រុមហ៊ុនអាហារ ក៏ដូចជាផ្លូវរថភ្លើងផងដែរ ។ លើសពីនេះទៀត លោកកំពុងតែបរិច្ចាគទ្រព្យសម្បត្តិទាំងអស់របស់លោក ទៅកាន់អង្គការសប្បុរសធម៌ ។
ការដេញថ្លៃនេះ ត្រូវបានបង្កើតឡើងចាប់តាំងពីប្រពន្ធទី១របស់លោកគឺលោកស្រី Susan បានទទួលមរណភាពនៅឆ្នាំ២០០៤ មកម្ល៉េះ ៕
ចែករំលែកព័តមាននេះ