សហរដ្ឋអាមេរិក ៖ អគ្គនាយកដ្ឋានព័ត៌មានថាមពលអាមេរិកបានដំឡើងការព្យាកររបស់ខ្លួនលើតម្លៃប្រេងជាមធ្យម១ដុល្លារ និង៣ដុល្លារក្នុង១បារ៉ែលសម្រាប់ឆ្នាំ២០១៦ និងឆ្នាំ២០១៧ ។ នេះបើយោងតាមរបាយការណ៍
សហរដ្ឋអាមេរិក ៖ អគ្គនាយកដ្ឋានព័ត៌មានថាមពលអាមេរិកបានដំឡើងការព្យាកររបស់ខ្លួនលើតម្លៃប្រេងជាមធ្យម១ដុល្លារ និង៣ដុល្លារក្នុង១បារ៉ែលសម្រាប់ឆ្នាំ២០១៦ និងឆ្នាំ២០១៧ ។ នេះបើយោងតាមរបាយការណ៍ទស្សនវិស័យថាមពលរយៈពេលខ្លីប្រចាំខែ បានឲ្យដឹងកាលពីពេលថ្មីៗនេះ ។
យោងតាមការព្យាករថ្មីនិយាយថា តម្លៃប្រេងជាមធ្យមនៅក្នុងឆ្នាំ២០១៦ នឹងមានតម្លៃ៤៣ដុល្លារក្នុងមួយបារ៉ែល និង៥២ដុល្លារក្នុងមួយបារ៉ែលនៅឆ្នាំ២០១៧ ។ ក្នុងនោះតម្លៃប្រេងប្រភេទ West Texas Intermediate មានតម្លៃទាបជាងប្រេង Brent នៅឆ្នាំ២០១៦ ប៉ុន្តែប្រេងទាំងពីរនឹងមានតម្លៃស្មើគ្នាវិញនៅឆ្នាំ២០១៧ ។ ក្នុងនោះដែរ ទីផ្សារភាគហ៊ុនក្នុងស្រុកបានឲ្យដឹងថា តម្លៃប្រេងឆៅ Brent មានតម្លៃ៥១,៣២ដុល្លារ កាលពីថ្ងៃអង្គារកន្លងទៅនេះ ។
ទោះបីជាមានការព្យាករប្រកបដោយភាពវិជ្ជមានក្តី ប៉ុន្តែរបាយការណ៍បានបង្ហាញពីក្តីព្រួយបារម្ភលើភាពមិនប្រាកដប្រជា និងការប្រែប្រួលនៃទីផ្សារប្រេងកាន់តែខ្ពស់ ។
គួរបញ្ជាក់ថា តម្លៃប្រេងឥន្ធនៈនៅសហរដ្ឋអាមេរិក ក្នុងរដូវក្តៅត្រូវបានគេរំពឹងថា នឹងកើនឡើង៦សេន ខ្ពស់ជាងការវាយតម្លៃ របស់អគ្គនាយកដ្ឋានព័ត៌មានថាមពលអាមេរិក ដែលបានធ្វើឡើងកាលពីខែមុន ប៉ុន្តែវាមានតម្លៃ២,២៧ដុល្លារក្នុងមួយ gallon (មានចំណុះ៣,៧៨៥លីត្រ) ដែលតួលេខនេះខ្ពស់ជាង៣៦សេន គឺទាបជាងតម្លៃជាមធ្យមកាលពីឆ្នាំមុន ។
ជាមធ្យម តម្លៃប្រេងឥន្ធនៈលក់រាយនៅឆ្នាំ២០១៦នេះ នឹងមានតម្លៃ២,១៣ដុល្លារក្នុងមួយ gallon ខណៈឆ្នាំ២០១៧ មានតម្លៃ២,២៧ដុល្លារក្នុងមួយ gallon ដែលវាមានតម្លៃខ្ពស់ជាងពីរបីសេន បើធៀបនឹងការព្យាករកាលពីខែមុន ។
របាយការណ៍បានបង្ហាញទៀតថា ការផលិតប្រេងឆៅក្នុងស្រុកនឹងធ្លាក់ចុះនៅឆ្នាំបន្ទាប់ ដោយសំអាងទៅលើការព្យាករកាលពីខែមុន ។ ជាក់ស្តែង កាលពីឆ្នាំ២០១៥ ការផលិតប្រេងឆៅក្នុងស្រុកមាន៩,៤លានបារ៉ែលក្នុងមួយថ្ងៃ ហើយវានឹងធ្លាក់ចុះដល់៨,៦លានបារ៉ែលក្នុងមួយថ្ងៃនៅក្នុងឆ្នាំ២០១៦ និង៨,២លានបារ៉ែលនៅឆ្នាំ២០១៧ ៕
ចែករំលែកព័តមាននេះ