វ៉ាក់សាំងអាមេរិក Pfizer ជាជំនួយរបស់អូស្ត្រាលី បានមកដល់កម្ពុជាហើយ
- ភ្នំពេញ
ភ្នំពេញ៖ ដូចការគ្រោងទុក នៅម៉ោង ៧យប់ថ្ងៃអាទិត្យ ទី២៦ ខែធ្នូនេះ ថ្នាំវ៉ាក់សាំងអាមេរិក Pfizer ដែលជាជំនួយរបស់ប្រទេសអូស្ត្រាលី ត្រូវបានដឹកតាមយន្តហោះពិសេស…
ភ្នំពេញ៖ ដូចការគ្រោងទុក នៅម៉ោង ៧យប់ថ្ងៃអាទិត្យ ទី២៦ ខែធ្នូនេះ ថ្នាំវ៉ាក់សាំងអាមេរិក Pfizer ដែលជាជំនួយរបស់ប្រទេសអូស្ត្រាលី ត្រូវបានដឹកតាមយន្តហោះពិសេស មកដល់រាជធានីភ្នំពេញហើយ។ សម្តេចតេជោ នាយករដ្ឋមន្ត្រី ហ៊ុន សែន និងភារធារីស្តីទី ស្ថានទូតអូស្ត្រាលី ប្រចាំកម្ពុជា រួមទាំងថ្នាក់ដឹកនាំស្ថាប័នជាតិអន្តរជាតិ បានអញ្ជើញទៅទទួលវ៉ាក់សាំងនេះ នៅអាកាសយានដ្ឋានអន្តរជាតិភ្នំពេញ។
ថ្នាំវ៉ាក់សាំង បង្ការជំងឺកូវីដ១៩ Pfizer ដែលជាជំនួយរបស់ប្រទេសអូស្ត្រាលី ផ្តល់ជូនកម្ពុជា មានចំនួនជាង ២លាន ៣សែនដូស ដោយត្រូវបញ្ជូនមកដល់កម្ពុជា នៅថ្ងៃទី២៦ ខែធ្នូ ចំនួន ៧៨៣ ០០០ដូស ហើយចំនួន ១ ៥៦៧ ៥៣០ដូសទៀត នឹងដឹកមកដល់ នៅថ្ងៃទី២៨ ខែធ្នូ។
សម្តេចតេជោ ហ៊ុន សែន បានលើកឡើងថា ថ្នាំវ៉ាក់សាំង Pfizer ជាជំនួយរបស់អូស្ត្រាលីទាំងនេះ នឹងត្រូវប្រើប្រាស់ជាដូសជំរុញ គឺជាដូសទី៣ សម្រាប់ប្រជាពលរដ្ឋទូទៅ និងជាដូសជំរុញទី៤ សម្រាប់ក្រុមគ្រូពេទ្យ និងអាជ្ញាធរកងកម្លាំងជួរមុខ។
រហូតមកដល់ថ្ងៃទី២៦ ខែធ្នូ ឆ្នាំ២០២១ កម្ពុជា ទទួលបានវ៉ាក់សាំងសរុបជាង ៤១លានដូស។ ក្នុងនោះ កម្ពុជា បានចំណាយថវិកា ២០០លានដុល្លារ ទិញវ៉ាក់សាំងបង្ការកូវីដ១៩ ពីចិន គឺស៊ីណូវ៉ាក់ និងស៊ីណូហ្វាម។ ក្រៅពីនោះ កម្ពុជា ទទួលបានជំនួយពីប្រទេសជាមិត្ត រួមមាន៖ ចិន ជប៉ុន អាមេរិក អង់គ្លេស និងតាមរយៈជំនួយរបស់កូវ៉ាក់។
រហូតដល់ថ្ងៃទី២៦ ខែធ្នូ កម្ពុជា ចាក់វ៉ាក់សាំង ចាប់ពីអាយុ ៥ឆ្នាំឡើង បានជាង ១៤លាននាក់។ ក្នុងនោះ អ្នកចាក់បានពីរដូស មានជាង ១៣ លាន ៦សែននាក់ ហើយអ្នកចាក់ដូសទី៣ ឬដូសជំរុញ បានជាង ៣ លាន ៣សែននាក់៕
ចែករំលែកព័តមាននេះ