ប្រទេសកូរ៉េខាងត្បូង ៖ ប្រជាជនមានការងារធ្វើចាប់ពីអាយុ៧៥ឆ្នាំឡើងទៅនៅកូរ៉េខាងត្បូង មានអត្រាខ្ពស់ជាងគេ ក្នុងចំណោមប្រទេសជាសមាជិកអង្គការកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) ។ ទោះជាយ៉ាងណា ពលរដ្ឋដែលមានវ័យចំណាស់ភាគច្រើនធ្វើការមិនមែនដោយសារតែពួកគេចង់ធ្វើឡើយ ពោលគឺដោយសារតែពួកគេត្រូវការរកប្រាក់មកទ្រទ្រង់ជីវភាពប្រចាំថ្ងៃ ។
យោងតាមអង្គការOECD បានឲ្យដឹងកាលពីថ្ងៃសុក្រថា ពលរដ្ឋដែលមានការងារធ្វើចាប់ពីអាយុ៦៥ឆ្នាំឡើងទៅមានអត្រា៣១,៣% នៅក្នុងប្រទេសកូរ៉េខាងត្បូងក្នុងឆ្នាំ២០១៤។ អត្រានេះគឺខ្ពស់បំផុត បន្ទាប់ពីប្រទេសហ្វាំងឡង់ និងខ្ពស់ជាង២,៣ដងនៃអត្រា១៣,៤% របស់អង្គការ OECD ។ មិនតែប៉ុណ្ណោះ វាខ្ពស់ជាងប្រទេសជប៉ុនផងដែរ ក្នុងអត្រា២០,៨% ចក្រភពអង់គ្លេស១០% និងអាល្លឺម៉ង់៥,៨% ។
ប្រជាជនដែលមានការងារធ្វើចាប់ពីអាយុ៧៥ឆ្នាំឡើងទៅ មានអត្រា១៩,២% ពោលគឺជាអត្រាខ្ពស់ជាងគេបំផុតក្នុងចំណោម២៤ប្រទេស និងខ្ពស់ជាង៤ដងនៃអត្រាជាមធ្យមរបស់អង្គការ OECD ស្មើនឹង៤,៨% ។ ចំណែកឯប្រទេសមិុកសិុកវិញ គឺជាប្រទេសតែមួយគត់ដែលមានអត្រាកើនឡើងទ្វេដង១៥,៧%, ប្រទេសជប៉ុន៨,២%, ចក្រភពអង់គ្លេស២,៦% និងបារាំងមានអត្រា០,៤% ។
« អត្រាការងារដ៏ខ្ពស់សម្រាប់ពលរដ្ឋវ័យចំណាស់នេះ គឺដោយសារតែមានកង្វះខាតក្នុងការរៀបចំប្រាក់ចូលនិវត្តន៍ ។ ពលរដ្ឋវ័យចំណាស់របស់កូរ៉េខាងត្បូង ត្រូវតែធ្វើការដើម្បីសងបំណុលរបស់ពួកគេ ក្នុងអំឡុងពេលពួកគេមានអាយុ៤០ឆ្នាំ ទៅ៥០ឆ្នាំ ដែលពួកគេបានយកប្រាក់មកផ្គត់ផ្គង់ការសិក្សារបស់កូន និងពេលរៀបការ » ។ នេះបើតាមប្រសាសន៍របស់លោកសាស្ត្រាចារ្យ Shim Ji-hong នៃសាកលវិទ្យាល័យ Dankook ។
« ហេតុផលមួយទៀត គឺប្រព័ន្ធប្រាក់ចូលនិវត្តន៍របស់កូរ៉េខាងត្បូងមានសភាពខ្សោយនៅឡើយ ។ តួយ៉ាង នៅក្នុងបណ្តាប្រទេសឧស្សាហកម្មភាគច្រើន ពលរដ្ឋដែលមានអាយុច្រើនជាង៦៤ឆ្នាំ ពួកគេអាចចិញ្ចឹមជីវិតបានដោយសារតែប្រាក់ចូលនិវត្តន៍របស់ខ្លួន » ។ នេះបើតាម Lee Jun-hyup មកពីវិទ្យាស្ថានស្រាវជ្រាវក្រុមហ៊ុន Hyundai ។
ផ្ទុយទៅវិញ នៅកូរ៉េខាងត្បូង ប្រជាជនវ័យចំណាស់ត្រូវតែធ្វើការ ដោយសារតែប្រព័ន្ធប្រាក់ចូលនិវត្តន៍មិនបានគាំទ្រដល់ជីវភាពរស់នៅប្រចាំថ្ងៃរបស់ពួកគេឡើយ ។
យោងតាមស្ថិតិកូរ៉េខាងត្បូងបានឲ្យដឹងថា ចំនួនអ្នកគ្មានការងារធ្វើពិតប្រាកដនៅអាយុខ្ទង់៦០ឆ្នាំ មានចំនួន១,៣៣លាននាក់ក្នុងខែមីនា កើនឡើង១២,៣% ស្មើនឹង១៤៧.០០០នាក់ក្នុងរយៈពេលដូចគ្នាកាលពីឆ្នាំមុន ។ ក្នុងនោះ៨៥,៤% នៃប្រជាជនវ័យចំណាស់ដែលបានធ្វើការ គឺធ្វើជាអ្នកយាម អ្នកសម្អាតផ្លូវ អ្នកដឹកជញ្ជូនតាមផ្ទះ និងអ្នករើសក្រដាសកាកសំណល់ជាដើម ។
គួរបញ្ជាក់ថា កូរ៉េខាងត្បូង គឺជាមហាអំណាចសេដ្ឋកិច្ចធំជាងគេទី១១នៅលើសកលលោក និងជាអ្នកនាំចេញច្រើនជាងគេទី៦ ប៉ុន្តែអត្រាភាពក្រីក្ររបស់ពលរដ្ឋវ័យចំណាស់មានអត្រាខ្ពស់ជាងគេ ក្នុងចំណោមសមាជិកអង្គការ OECD គឺមានអត្រា៤៧,២% ៕
ចែករំលែកព័តមាននេះ