ប្រទេសម៉ាឡេស៊ី ៖ ការនាំចេញរបស់ម៉ាឡេស៊ីនៅក្នុងខែមេសា បានកើនឡើង១,៦% បើធៀបនឹងឆ្នាំមុន ដោយសារការនាំចេញទំនិញឧស្សាហកម្ម និងប្រេងដូងកើនឡើងខ្ពស់ជាងមុន ។ នេះបើយោងតាមរបាយការណ៍របស់រដ្ឋាភិបាលបានបង្ហាញឱ្យដឹង កាលពីថ្ងៃទី៣ មិថុនា កន្លងទៅនេះ ។
ការនាំចេញបានកើនឡើងលឿនជាង០,២% បើធៀបនឹងខែមីនា ប៉ុន្តែវាបានចុះខ្សោយជាងការព្យាករទុករបស់សារព័ត៌មាន Reuters ក្នុងអត្រា២% ។
ទោះជាយ៉ាងណា ការកើនឡើងនេះត្រូវបានប៉ះប៉ូវនូវការនាំចេញទាបនៃឧស្ម័នធម្មជាតិរាវ និងប្រេងឆៅ ។ នេះបើយោងតាមទិន្នន័យពីក្រសួងពាណិជ្ជកម្ម និងឧស្សាហកម្មអន្តរជាតិ ។
ចំណែកការនាំចូលសម្រាប់ខែមេសាវិញ បានធ្លាក់ចុះ២,៣% បើធៀបនឹងឆ្នាំមុន ហើយបើធៀបនឹងខែមុនវិញ បានធ្លាក់ចុះ៥,៥% ។ រីឯផលលើសនៃការធ្វើពាណិជ្ជកម្មក្នុងខែមេសាវិញ បានធ្លាក់ចុះ៩,១ប៊ីលានរីងហ្គិត បើធៀបនឹងខែមីនា ស្មើនឹងទឹកប្រាក់១១,២ប៊ីលានរីងហ្គិត ។
សម្រាប់ការនាំចេញទៅកាន់ប្រទេសចិន បានធ្លាក់ចុះ១៦,៦% ដោយសារតែការនាំចេញទាបនៃទំនិញប្រើប្រាស់ ជាពិសេស ផលិតផលកសិកម្មដូងប្រេងបានធ្លាក់ចុះ ខណៈដែលផលិតផលប្រេង និងឧស្ម័នធម្មជាតិ ក៏បានធ្លាក់ចុះដូចគ្នាដែរ ។
ចំណែកការនាំចេញទៅកាន់សហគមន៍អឺរ៉ុបវិញ បានធ្លាក់ចុះ៥,៣% ។ ប៉ុន្តែផ្ទុយពីនេះ ការនាំចេញទៅកាន់សហរដ្ឋអាមេរិក បានកើនឡើង១១,៧% ពោលគឺដោយសារតែការនាំចេញផលិតផលអេឡិចត្រូនិកបានកើនឡើង ៕
ចែករំលែកព័តមាននេះ