ស្ងាត់ៗ ក្រសួងសង្គមកិច្ច អតីតយុទ្ធជន និងយុវនីតិសម្បទា បានកាត់ដីមួយចំហៀងនៅសល់លក់ឱ្យក្រុមហ៊ុនឯកជន ហើយពេលនេះក្រុមហ៊ុនដែលទិញយកនោះកំពុងដាក់គ្រឿងចក្រវាយកម្ទេចអគារតូចធំមួយចំនួននៅជុំវិញ ដែលមាន
រាជធានីភ្នំពេញ ៖ ស្ងាត់ៗ ក្រសួងសង្គមកិច្ច អតីតយុទ្ធជន និងយុវនីតិសម្បទា បានកាត់ដីមួយចំហៀងនៅសល់លក់ឱ្យក្រុមហ៊ុនឯកជន ហើយពេលនេះក្រុមហ៊ុនដែលទិញយកនោះកំពុងដាក់គ្រឿងចក្រវាយកម្ទេចអគារតូចធំមួយចំនួននៅជុំវិញ ដែលមានចំនួន៣៧ល្វែង ស្ថិតនៅតាមមហាវិថីព្រះមុនីវង្ស ផ្លូវលេខ៤៦៦ និងផ្លូវលេខ៩៩ ក្បែររបងក្រសួងដែលស្ថិតនៅក្នុងសង្កាត់បឹងត្របែក ខណ្ឌចំការមន ។
អគារទាំងនោះត្រូវបានគ្រឿងចក្រវាយកម្ទេចចោលជាបណ្តើរៗហើយ ក្រោយពីក្រុមហ៊ុនបានទិញដីមួយចំណែកកាលពីពេលកន្លងមក ។
ការវាយកម្ទេចអគារមួយចំនួនដែលនៅជុំវិញក្រសួងនេះ គឺធ្វើឡើងក្រោយពីមានការសហការរវាងក្រុមហ៊ុន និងដោយមានការសម្របសម្រួលពីសំណាក់អាជ្ញាធរខណ្ឌចំការមន ជាមួយនឹងបងប្អូនប្រជាពលរដ្ឋដែលផ្តល់សំណងជាប្រាក់រួចរាល់ ទើបពួកគាត់យល់ព្រមរុះរើចេញជាបន្តបន្ទាប់ ។
ស្ត្រីម្នាក់និយាយថា ខ្ញុំបានឃើញគេចាប់ផ្តើមវាយ៣ថ្ងៃហើយ ដោយចាប់ពីក្បែរផ្ទះគាត់ទៅ និងបានដឹងថា ការវាយនេះគឺធ្វើឡើងក្រោយពីមានការចរចាគ្នារវាងក្រុមហ៊ុនដែលសង្ស័យជាក្រុមហ៊ុនចិន បានសងសំណងរួចរាល់ទើបគេព្រមរុះរើជញ្ជូនអីវ៉ា់ន់ចេញ ចំណែកឯផ្ទះដែលគាត់ស្នាក់នៅមិនទាន់ដឹងថាយ៉ាងណានៅឡើយទេព្រោះជាផ្ទះជួលគេ។
គម្រោងវាយអគារផ្ទះល្វែងចោលនេះ មិនដឹងពីគម្រោងអ្វីឡើយ ដោយដឹងត្រឹមតែថា គេកំពុងរៀបចំសាងសង់អគារនៅដីខាងក្នុង ដែលពីមុនជាដីរបស់ក្រសួង តែពេលនេះត្រូវគេពុះចែកជាពីរ ដោយមិនមានអ្នកណាប្រាប់អំពីគម្រោងនេះឡើយ គឺមានតែការប្រាប់គ្នាបែបខ្សឹបខ្សៀវប៉ុណ្ណោះ។
ស្ត្រីរូបនេះនិយាយទៀតថា ម្ចាស់ផ្ទះទើបតែចាប់ផ្តើមរើអីវ៉ាន់ចេញ ខ្លះបាន២ថ្ងៃ ខ្លះទៀត៣ថ្ងៃប៉ុណ្ណោះ ក្រោយពីយកលុយសំណងរួច ដែលខ្លះឮថា បាន២ម៉ឺន ៣ម៉ឺន ៤ម៉ឺន ទៅ៥ម៉ឺនដុល្លារទៅតាមផ្ទះធំឬតូច ។ ចំណែកឯផ្ទះដែលគាត់ជួលស្នាក់នៅនេះ មិនទាន់ដឹងថាគេឱ្យរើចេញ ឬវាយចោលនៅពេលណាដែរទេ ? ដោយសារម្ចាស់ផ្ទះមិនទាន់បានប្រាប់គាត់ ។
លោក ថេង សុថុល អភិបាលខណ្ឌចំការមនបានឱ្យដឹងថា ផ្ទះដែលត្រូវវាយកម្ទេចចោលនៅក្បែរក្រសួងសង្គមកិច្ច អតីតយុទ្ធជន និងយុវនីតិសម្បទានេះ គឺជាផ្ទះដែលពួកគាត់សាងសង់នៅលើចំណីផ្លូវ និងចេះតែនាំគ្នារស់នៅអស់រយៈពេលយូរឆ្នាំមកហើយ ។ ក្រោយពីក្រុមហ៊ុន ដោយមានការសម្របសម្រួលអំពីអាជ្ញាធរខណ្ឌដោះស្រាយគោលនយោបាយផ្តល់ជាប្រាក់ដល់ពួកគាត់ចំនួន៣៧ខ្នងផ្ទះ និងមានតម្លៃទៅតាមផ្ទះធំឬតូចនោះ ទើបពួកគាត់យល់ព្រមរើអីវ៉ាន់ចេញ ហើយគ្រឿងចក្រក៏ចាប់ផ្តើមវាយជាបន្តបន្ទាប់ ។
លោកអភិបាលខណ្ឌបានឲ្យដឹងទៀតថា ការវាយកម្ទេចផ្ទះរបស់បងប្អូនដែលរស់នៅលើចំណីផ្លូវមួយចំនួនដូចជា មហាវិថីព្រះមុនីវង្ស ផ្លូវលេខ៤៦៦ និងផ្លូវលេខ៩៩ ទាំងអស់៣៧ខ្នងផ្ទះនេះ គឺធ្វើឡើងក្រោយពីក្រុមហ៊ុនបានទិញដីពីក្រសួងសង្គមកិច្ច អតីតយុទ្ធជន និងយុវនីតិសម្បទា បានមួយចំនួនរួចមក ។ លុះមកដល់ពេលនេះ ក្រោយពីមានការសម្របសម្រួលដោះស្រាយសំណងជាប្រាក់ដោយសន្តិវិធីរួចរាល់ហើយ ទើបបានពួកគាត់យល់ព្រមរើអីវ៉ាន់ចេញ ហើយក៏ចាប់ផ្តើមវាយជាបណ្តើរៗតាំងពីអាទិត្យមុនមកម្ល៉េះ ។
ពាក់ព័ន្ធទៅនឹងឈ្មោះក្រុមហ៊ុនដែលបានទិញដីមួយចំណែកផ្នែកខាងជើងក្រសួងសង្គមកិច្ច អតីតយុទ្ធជន និងយុវនីតិសម្បាទានេះ លោកប្រាប់ថា មិនចាំឈ្មោះទេ លោកភ្លេចបាត់ទៅហើយ ? ហើយក៏មិនបានដឹងថា គេមានគម្រោងធ្វើអ្វីដែរ ? បើយោងតាមការខ្សឹបខ្សៀវបានឱ្យដឹងថា ដីមួយផ្នែករបស់ក្រសួងសង្គមកិច្ច អតីតយុទ្ធជន និងនីតិសម្បទា ដែលលក់នេះ ត្រូវបានខាងក្រសួងកាត់លក់ឱ្យក្រុមហ៊ុនជាង១ឆ្នាំមកហើយ សូម្បីតែរោងស្នាក់នៅរបស់កម្លាំងនគរបាលដែលយាមប្រចាំការនៅក្នុងក្រសួង ក៏ត្រូវបានគេឱ្យរុះរើទៅកន្លែងផ្សេង ដើម្បីធ្វើរបងខណ្ឌដីឱ្យគេដែរ ។ ព្រោះពុះក្រសួងដែលមានដីមួយចំហៀង លក់ឱ្យគេហើយ ត្រូវតែធ្វើរបងកាត់ចេញទើបអ្នកទិញព្រម ។
ករណីក្រសួងសង្គមកិច្ច អតីតយុទ្ធជន និងនីតិសម្បទា កាត់ដីមួយផ្នែករបស់ក្រសួងលក់ទៅឱ្យក្រុមហ៊ុនឯកជននេះដែរ មិនមានប្រភពណាមួយបានដឹងអំពីទំហំដីប៉ុនណា និងក្នុងតម្លៃប៉ុន្មាននោះទេ ? និងលក់ចាប់តាំងពីពេលណាច្បាស់លាស់ដែរ ? លុះមកដល់ថ្ងៃទី១៦ ខែធ្នូ ឆ្នាំ២០២១ ស្រាប់តែគេដាក់បារ៉ាស់បិទផ្លូវ និងដាក់កម្លាំងប្រជាការពារខណ្ឌចំការមន ឈរយាមនិងដាក់គ្រឿងចក្រវាយកម្ទេចអគារក្រសួងនិងផ្ទះពលរដ្ឋដែលនៅក្បែរនោះ ទើបបង្កឱ្យមានការភ្ញាក់ផ្អើលឡើងតែម្តង ។
ដីរបស់ក្រសសួងដែលនៅទំនេរបន្តិចបន្តួចទុកដាក់ឡាន-ម៉ូតូក៏មិនទុកដែរ ព្រោះលោកតាប្រាក់ចេះតែតាមយាយីពេក ត្រូវតែឱ្យលោកតាប្រាក់ឈ្នះអីចឹងហើយ…ព្រោះនាសម័យដុល្លារ ហេ ! ហេ !
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ