ប្រទេសកូរ៉េខាងត្បូង ៖ ផលិតកម្មឧស្សាហកម្មរបស់កូរ៉េខាងត្បូងបានធ្លាក់ចុះច្រើនជាងការរំពឹងទុករបស់ក្រុមសេដ្ឋវិទូទៅទៀត ខណៈដែលការនាំចេញខ្សោយ និងការកែប្រែរចនាសម្ព័ន្ធសាជីវកម្មឡើងវិញនៃក្រុមហ៊ុនសាងសង់កប៉ាល់ ដែលបន្តធ្វើឲ្យតម្រូវការ និងជំនួញត្រូវរងនូវការប៉ះទង្គិច ។
ទិន្នផលរោងចក្របានធ្លាក់ចុះ២,៨% បើធៀបនឹងខែមេសាឆ្នាំមុន ដែលធ្លាក់ចុះខ្លាំងជាងការព្យាកររបស់សេដ្ឋវិទូក្នុងអត្រា១,៣% ទៅទៀត ។ ចំណែកផ្នែកផលិតកម្មវិញបានធ្លាក់ចុះ១,៣% បើធៀបនឹងខែមុន ។
លោក SuhDaeIl សេដ្ឋវិទូប្រចាំ Mirae Asset Daewoo Co បានឲ្យដឹងថា ៖ « ទិន្នន័យអវិជ្ជមាននៃទិន្នផលរោងចក្រនេះបង្ហាញថា វាមានកំណើនខ្សោយ ។ ចំណែកការជំរុញរបស់រដ្ឋាភិបាលលើការកសាងរចនាសម្ព័ន្ធឡើងវិញនៃក្រុមហ៊ុនសាងសង់កប៉ាល់ និងក្រុមហ៊ុនដឹកជញ្ជូន នឹងអាចធ្វើឲ្យរងផលប៉ះពាល់ដល់តម្រូវការក្នុងស្រុក » ។
លោក SuhDaeIl ព្យាករថា ៖ « ធនាគារកូរ៉េនឹងកាត់អត្រាការប្រាក់ត្រឹម២៥ពិន្ទុគោលនាខែកក្កដា ខណៈដែលទិន្នន័យផ្ទុយគ្នានឹងទស្សនវិស័យរបស់ធនាគារកូរ៉េ ដែលថាតម្រូវការក្នុងស្រុកនឹងគាំទ្រដល់កំណើនសេដ្ឋកិច្ចជាតិ » ។
អត្រាសារពើភ័ណ្ឌនាំចេញបានធ្លាក់ចុះបន្តិច ស្មើនឹងអត្រា១២៤,១%នៅខែមេសា ដែលជាកម្រិតខ្ពស់មួយ បន្ទាប់ពីបានកើនឡើង ១២៨,៣%នៅខែមករា ពោលគឺជាការកើនឡើងខ្ពស់បំផុត បើគិតចាប់តាំងពីឆ្នាំ២០០៨មក។ អត្រាដ៏ខ្ពស់នេះ គឺជាសញ្ញាដ៏ខ្សោយនៃតម្រូវការ ខណៈដែលទំនិញជាច្រើនក្នុងឃ្លាំងស្តុករបស់ពួកគេ នៅមិនទាន់លក់អស់ ។
ចំណែកការនាំចេញផលិតផលអេឡិចត្រូនិកវិញបានធ្លាក់ចុះ១២,៧៥%កាលពីឆ្នាំមុន រីឯការនាំចេញរថយន្ត និងម៉ាស៊ីនបានធ្លាក់ចុះ៨,៧% និង៩,៥% ៕
ចែករំលែកព័តមាននេះ