ជនជាតិអាមេរិកម្នាក់ត្រូវម៉ូតូបុកស្លា.ប់
ខេត្តសៀមរាប ៖ បុរសវ័យចំណាស់ជនជាតិអាមេរិកកាំងម្នាក់ត្រូវបានម៉ូតូបុកស្លា.ប់ក្នុងថ្លុកឈាម ខណៈពេលដែលនាំមិត្តត្រឡប់មកពីមើលសៀក ហើយចុះពីម៉ូតូកង់បីដើរឆ្លងផ្លូវ
ខេត្តសៀមរាប ៖ បុរសវ័យចំណាស់ជនជាតិអាមេរិកកាំងម្នាក់ត្រូវបានម៉ូតូបុកស្លាប់ក្នុងថ្លុកឈាម ខណៈពេលដែលនាំមិត្តត្រឡប់មកពីមើលសៀក ហើយចុះពីម៉ូតូកង់បីដើរឆ្លងផ្លូវដើម្បីទិញភេសជ្ជៈយកទៅផឹកនៅសណ្ឋាគារ ។ ហេតុការណ៍នេះកើតឡើងកាលពីវេលាម៉ោង៩ និង៣០នាទីយប់ ថ្ងៃទី២៩ ខែឧសភា ឆ្នាំ២០១៦ ស្ថិតនៅក្នុងសង្កាត់ស្វាយដង្គំ ក្រុងសៀមរាប ជិតកន្លែងស្នាក់នៅរបស់ជនរងគ្រោះ ។
លោក ចៅ ម៉ៅវីរៈ ស្នងការរង ទទួលការងារអន្តោប្រវេសន៍ នៃស្នងការនគរបាលខេត្ត បានប្រាប់ឲ្យដឹងថា ក្រោយពីទទួលបានព័ត៌មានភា្លម កម្លាំងការិយាល័យនគរបាលអន្តោប្រវេសន៍នៃស្នងការខេត្ត បានសហការជាមួយកម្លាំងនគរបាលការិយាល័យចរាចរផ្លូវគោកនៃស្នងការនគរបាលខេត្ត ចុះទៅដល់កន្លែងកើតហេតុភ្លាមៗផងដែរ រួចក៏ធ្វើការត្រួតពិនិត្យទៅលើដងខ្លួនជនរងគ្រោះ ។ លោកបន្តថា ជនជនរងគ្រោះមានឈ្មោះ OWENS ROBERT DEAN ភេទប្រុស អាយុ៧៥ឆ្នាំ ជនជាតិអាមេរិកកាំង មុខរបរជាភ្ញៀវទេសចរណ៍ កាន់លិខិតឆ្លងដែនលេខ ៤៥៤១៥២៦៧១ ផុតកំណត់ថ្ងៃទី១២ ខែមិនា ឆ្នាំ២០១៩ ស្នាក់នៅសណ្ឋាគារ Villa Made mrei បន្ទប់លេខ១០៩ ក្នុងភូមិវិហារចិន សង្កាត់ស្វាយដង្គំ ក្រុងសៀមរាប ចូលមកខេត្តសៀមរាបកាលពីថ្ងៃទី២៤ ខែឧសភា ឆ្នាំ២០១៦ តាមច្រកទ្វារព្រលានយន្តហោះអន្តរជាតិសៀមរាប ។
លោកបញ្ជាក់បន្ថែមថា ក្រោយពីជនរងគ្រោះបានសា្លប់ដោយសារគ្រោះថ្នាក់ចរាចរណ៍ កម្លាំងជំនាញបានហៅមិត្តភក្តិជនរងគ្រោះឈ្មោះ Roymond Sheridan ភេទប្រុស អាយុ៧០ឆ្នាំ ជាជនចាតិអាមេរិកកាំង ស្នាក់នៅជាមួយគ្នាមកធ្វើការសាកសួរ ដោយបានរៀបរាប់ប្រាប់សមត្ថកិច្ចថា នៅវេលាម៉ោងប្រហែលជា៩និង៤៧នាទីយប់ ថ្ងៃទី២៩ ខែឧសភា ឆ្នាំ២០១៦ ខ្លួននិងមិត្តភក្តិបានវិលត្រឡប់មកពីទស្សនាការសម្តែងសៀកវិញ ហើយបាននាំគ្នាចុះពីលើម៉ូតូកង់បីដើរសំដៅទៅសណ្ឋាគារ ។ បន្ទាប់មកជនរងគ្រោះដើរឆ្លងផ្លូវដើម្បីទៅទិញភេសជ្ជៈផឹកតែម្នាក់ឯង ខណៈពេលនោះ រូបគេបានឃើញម៉ូតូមួយគ្រឿងម៉ាក DUKE ពាក់ស្លាកលេខ ភ្នំពេញ 1CF-9229 បើកបរដោយបុរសជាជនជាតិខ្មែរមិនស្គាល់អត្តសញ្ញាណ បានបុកមិត្តភក្តិរបស់ខ្លួនចំពីក្រោយពេញទំហឹង បណ្តាលឱ្យដួលដេកទៅលើដីឈាមពេញខ្លួន និងហូរចេញតាមច្រមុះ រួចស្លាប់ភា្លមៗនៅនឹងកន្លែងកើតហេតុ ។
បច្ចុប្បន្ន សពជនរងគ្រោះជនជាតិអាមេរិកកាំងម្នាក់នេះ ត្រូវបានសមត្ថកិច្ចដឹកយកទៅតម្កល់ទុកនៅមន្ទីរពេទ្យអន្តរជាតិរ៉ូយ៉ាល់អង្គរ រង់ចាំការសម្រេចពីស្ថានទូតអាមេរិក ដើម្បីទុកប្រគល់ឱ្យទៅក្រុមគ្រួសារ ៕
ចែករំលែកព័តមាននេះ