ខេត្តត្បូងឃ្មុំ កម្លាំងសមត្ថកិច្ចចុះទៅឆ្មក់បង្ក្រាបកន្លែងជល់មាន់ ធ្វើឲ្យអ្នកញៀនល្បែងនាំគ្នារត់ខ្ចាត់ខ្ចាយ ដោយអនុវត្តតាមការណែនាំរបស់លោកឧត្តមសេនីយ៍ត្រីម៉ុន មាគ៌ា ស្នងការនគរបាលខេត្ត ។
ជាមួយនោះនៅវេលាម៉ោង១រសៀល ថ្ងៃទី១៥ ខែធ្នូ ឆ្នាំ២០២១ កម្លាំងប៉ុស្តិ៍រដ្ឋបាលអញ្ចើមបានចុះបង្ក្រាបល្បែងជល់មាន់ នៅចំណុចខាងកើតភូមិអង្កែវ ចម្ងាយប្រហែល ៥០០ម៉ែត្រ ស្ថិតនៅលើដីទំនេរមិនស្គាល់ម្ចាស់ភូមិសាស្ត្រស្រុកត្បូងឃ្មុំ ធ្វើឱ្យក្រុមអ្នកញៀនល្បែងបញ្ជល់មាន់ នាំគ្នារត់ប្រសាចចោលម៉ូតូ ។
សមត្ថកិច្ចមូលដ្ឋានប្រាប់ឲ្យដឹងថា តាមគោលនយោបាយភូមិ ឃុំមានសុវត្ថិភាពរបស់ក្រសួងមហាផ្ទៃដោយមិនអនុញ្ញាតឲ្យមានល្បែងស៊ីសងនោះទេ ។ ទោះជាយ៉ាងនេះក៏ដោយ មានក្រុមអ្នកញៀនល្បែងបញ្ជល់មាន់បានណាត់គ្នាចល័តម្ដងនៅត្រង់នេះម្ដងនៅត្រង់នោះ លេងមិនជាច្រើនគូនោះទេ ហើយក៏ព្រួយបារម្ភការជួបជុំមនុស្សច្រើននឹងនាំឲ្យឆ្លងជំងឺកូវីដ១៩ផងដែរ។
នគរបាលមូលដ្ឋានប្រាប់បន្តឲ្យដឹងទៀតថា ស្របពេលដែលទទួលបានដំណឹងពីប្រជាពលរដ្ឋកម្លាំងសមត្ថកិច្ចបានឆ្មក់ចូលទីតាំងខាងលើ ជាហេតុធ្វើឲ្យក្រុមអ្នកញៀនល្បែងនាំគ្នារត់ប្រសាចគេចខ្លួនបាត់អស់ ។
ដោយបន្សល់នូវវត្ថុតាងបានមាន់១ក្បាល អង្រុតក្រុងមាន់ចំនួន២ កៅអីជ័រចំនួន៥ ប៉ារ៉ាតង់ប្រក១ កន្ត្រកដាក់មាន់ចំនួន៤ និងម៉ូតូចំនួន១៥គ្រឿង បច្ចុប្បន្នវត្ថុតាងដែលប្រមូលបានរក្សាទុកនៅប៉ុស្តិ៍អញ្ចើមបណ្ដោះអាសន្ន ដើម្បីធ្វើការស្រាវជ្រាវបន្ត ។
សមត្ថកិច្ចមូលដ្ឋានបានបញ្ជាក់ថា ក្នុងពេលដែលមានការប្រជុំនៅស្នងការដ្ឋាននគរបាលខេត្ត លោកឧត្តមសេនីយ៍ស្នងការបានដាក់បទបញ្ជាមិនឲ្យមានល្បែងស៊ីសងបញ្ជល់មាន់នៅក្នុងមូលដ្ឋាននោះទេ ។ ហើយទីតាំងដែលលេងបញ្ជល់មាន់ដូចម្នាក់នេះ ក៏មិនមានលេចមុខអ្នកណាម្នាក់ផងដែរ ។
សមត្ថកិច្ចបានសំណូមពរដល់ប្រជាពលរដ្ឋបើឃើញមានជនខិលខូចលេងល្បែងបញ្ជល់មាន់លួចលាក់នៅកន្លែងណាមួយ សូមរាយការណ៍មកសមត្ថកិច្ចជាបន្ទាន់ដើម្បីចុះបង្ក្រាប ៕
ចែករំលែកព័តមាននេះ