រាជធានីភ្នំពេញ ៖ យាយចាស់ម្នាក់មានសតិមិនប្រក្រតីបានដើរឆ្លងផ្លូវត្រូវរថយន្តជនជាតិចិនបុក បណ្តាលឱ្យរងរបួសធ្ងន់ បង្កឱ្យមានការភ្ញាក់ផ្អើលកាលពីវេលាម៉ោង៨និង៥០នាទីយប់ ថ្ងៃទី២៧ ឧសភា ២០១៦ តាមបណ្ដោយផ្លូវ២០០៤ ទល់មុខខារ៉ាអូខេរស្មីពោធិ៍ចិនតុង ភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ។
ជនរងគ្រោះឈ្មោះប្រាក់ សុភាព អាយុ៦៧ឆ្នាំ ភេទស្រី ស្នាក់នៅមិនពិតប្រាកដ មានស្រុកកំណើតនៅស្រុកពញាឮ ខេត្តកណ្តាល មានកូនស្រីម្នាក់ឈ្មោះ ប្រាក់ វី ហៅជូ ភេទស្រីអាយុ២៦ឆ្នាំ ស្នាក់នៅខារ៉ាអូខេភូមិតាងួន សង្កាត់កាកាប ខណ្ឌពោធិ៍សែនជ័យ។ រថយន្តបង្កម៉ាកហាយឡែនឌ័រ ពណ៌ខ្មៅ ពាក់ស្លាក់លេខភ្នំពេញ 2X9347 បើកបរដោយបុរសជនជាតិចិនពីរនាក់បើកបើកពីជើងទៅត្បូង។
តាមប្រភពព័ត៌មានពីកន្លែងកើតហេតុបាននិយាយថា មុនពេលកើតហេតុគេឃើញលោកយាយដើរឆ្លងផ្លូវពីកើតទៅលិច ក៏ត្រូវរថយន្តជនជាតិចិនបើកពីជើងទៅត្បូងមកដល់ចំណុច ខាងលើបានបើកបុកបណ្តាលឱ្យរងរបួសធ្ងន់បាក់ជើងខាងឆ្វេង។
បើតាមប្រភពព័ត៌មានខ្លះទៀតបាននិយាយថា មានរថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ មិនចាំស្លាកលេខ បើកបុកលោកយាយរងគ្រោះ ហើយបើករត់បាត់ ទើបរថយន្តម៉ាកហាយឡែនឌ័របើកបរដោយជនជាតិចិន បើកមកតាមក្រោយបានកៀរលោក យាយ ក៏ត្រូវប្រជាពលរដ្ឋឃាត់ឱ្យសមត្ថកិច្ចតែម្តង ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅព្យាបាលនៅពេទ្យបង្អែកពោធិ៍ចិនតុង តែស្ថានភាពធ្ងន់ធ្ងរពេកត្រូវបានបញ្ជូនជនរងគ្រោះទៅមន្ទីពេទ្យព្រះកុសមៈ ចំណែករថយន្តជនជាតិចិនបានយកទៅរក្សារទុកខណ្ឌពោធិ៍សែនជ័យ ដើម្បីរង់ចាំការដោះស្រាយនៅពេលក្រោយ ៕
ចែករំលែកព័តមាននេះ