រាជធានីភ្នំពេញ ៖ យោងតាមប្រភពពីហ្វេសប៊ុករបស់តារាសម្តែងលោកសាវិន ហ្វីលីព បានបង្ហោះសាររំលែកទុក្ខ ដល់គ្រួសារអតីតតារាសម្តែង និងជាអ្នកចម្រៀង អ្នកនាងម៉េង វិមានរតនា ដែលត្រូវបាត់បង់ម្តាយជាទីស្រឡាញ់របស់គាត់ ដោយជំងឺគាំងបេះដូង គឺអ្នកស្រីម៉េង សុម៉េត ដែលបម្រើការងារនៅនាយកដ្ឋានសិល្បៈ និងទស្សនីយភាព នៅក្រសួងវប្បធម៌និងវិចិត្រសិល្បៈ ។
អ្នកស្រីម៉េង សុម៉េត កាលពីមុន គឺជាអ្នកសិល្បៈម្នាក់ដែរ ដោយធ្លាប់សម្តែងនៅតាមឆាកមួយចំនួន ជាពិសេសគឺនៅលើកញ្ចក់ទូរទស្សន៍ជាតិកម្ពុជា ដោយអ្នកស្រីត្រូវគេឃើញ ភាគច្រើនច្រៀងចម្រៀងអាយ៉ៃ ។
ដោយឡែក ឪពុកតារាចម្រៀងក្នុងផលិតកម្ម ភ្លេងរីខត លោកដួង វិរៈសិទ្ធ ក៏បានទទួលមរណភាព កាលពីវេលាទៀបភ្លឺថ្ងៃទី២៦ ឧសភា ២០១៦ នេះដែរ ដោយរោគាពាធ ។ ឪពុកតារាចម្រៀងរូបនេះ បានទទួលមរណភាពក្នុងជន្មាយុ៥៩ឆ្នាំ បន្ទាប់ពីមានជំងឺដ៏ររ៉ាំរ៉ៃជាងមួយឆ្នាំមកដោយ ដែលកើតឡើងដោយសារគ្រោះថ្នាក់ចរាចរណ៍ នាពេលកន្លងមក ។ បច្ចុប្បន្ន សពឪពុកលោកដួង វិរៈសិទ្ធ កំពុងតម្កល់ធ្វើបុណ្យនៅផ្សារត្រាំខ្នារ ខេត្តតាកែវ ។
រីឯតារាចម្រៀងក្នុងផលិតកម្មហង្សមាស អ្នកនាង ពេជ្រ សោភា កំពុងត្រូវបានទៅសង្គ្រោះ និងព្យាបាលជំងឺនៅមន្ទីរពេទ្យ ក្នុងប្រទេសថៃ បន្ទាប់ពីអាការៈជំងឺឈាមសស៊ីឈាមក្រហមរបស់នាង បានរើឡើងយ៉ាងធ្ងន់ធ្ងរ ។ គួរបញ្ជាក់ថា កាលពីថ្ងៃទី២៥ ឧសភា កំពូលតារាចម្រៀងអ្នកនាងពេជ្រ សោភា បានទៅព្យាបាលជំងឺនៅមន្ទីរពេទ្យប៉ាយ៉ាថៃ ក្រុងបាងកក ។
ក្នុងនោះ មានបងប្អូនជាអ្នកគាំទ្រគាត់បានជូនពរឱ្យគាត់ឆាប់ជាសះស្បើយ ដើម្បីបម្រើអារម្មណ៍ប្រជាពលរដ្ឋវិញ ហើយក៏សង្ឃឹមថា កុសលផលបុណ្យដែលគាត់បានជួយគេជាច្រើនមកនោះ សូមជួយឱ្យគាត់មានសុវត្ថិភាពដែរក្នុងការព្យាបាលជំងឺនោះ។
យ៉ាងណាក៏ដោយ រហូតមកដល់ពេលនេះ គេនៅមិនទាន់ដឹងថា អាការជំងឺរបស់នាងបានធូរស្បើយ ឬយ៉ាងណានោះទេ ខណៈដែលមានប្រិយមិត្តគាំទ្រជាច្រើនបានសម្តែងក្តីបារម្ភខ្លាំងណាស់ ។
ចែករំលែកព័តមាននេះ