រាជធានីភ្នំពេញ ៖ តើជំងឺដុំសាច់ស្បូនមានមូលហេតុអ្វីខ្លះ ?
ផ្អែកទៅលើប្រភពដើមនៃការករកើតជំងឺដុំសាច់ស្បូន រហូតមកដល់ថ្ងៃនេះក្រុមជំនាញមិនទាន់ស្រាវជ្រាវកំណត់អំពីមូលហេតុឱ្យបានជាក់ច្បាស់មួយរយភាគរយថា ជំងឺនេះកើតមកពីអ្វីនោះទេ ។ ក៏ប៉ុន្តែតាមការស្រាវជ្រាវក៏បានដកស្រង់ថា មានកត្តាមួយចំនួនដែលអាចបង្កឲ្យមានដុះដុំសាច់ស្បូននោះជាពិសេសគឺបញ្ហាពាក់ព័ន្ធទៅនឹងប្រព័ន្ធចរន្តអ័រម៉ូនរបស់សរីរាង្គស្ត្រីម្នាក់ៗ ។ ហើយក្នុងនោះកត្តាមួយទៀតក៏ពាក់ព័ន្ធទៅនឹងការប្រើប្រាស់ថ្នាំពន្យារកំណើតយូរវាក៏ជាកត្តាមួយបង្កឱ្យមានដុំសាច់ស្បូននេះដែរ ។ បញ្ហាបរិភោគចំណីអាហារដែលមានសារធាតុផ្សេងៗក៏ជាបញ្ហាប៉ះពាល់ដល់ចរន្តនៃមុខងាររបស់អ័រម៉ូននៅក្នុងសរីរាង្គកាយរបស់ស្ត្រីម្នាក់ៗដែរ ។ បន្ថែមលើនេះក៏នៅមានកត្តាគួបផ្សំមួយចំនួនទៀតដូចជា ករណីការយកទារកចេញពីក្នុងផ្ទៃច្រើនដងក៏ជាការចូលរួមក្នុងកត្តានេះដែរ ។ នេះជាប្រសាសន៍លើកឡើងរបស់លោកសាស្ត្រាចារ្យ យីត ស៊ុនណារ៉ុង ប្រធានផ្នែករោគស្ត្រីនៃមន្ទីរពេទ្យកាល់មែ៉តក្នុងកិច្ចសម្ភាសន៍ជាមួយសារព័ត៌មានកោះសន្តិភាព ។
លោកសាស្ត្រាចារ្យ យីត ស៊ុនណារ៉ុង បានមានប្រសាសន៍ថា តើធ្វើដូម្តេចទើបអាចដឹងថាមានការកើតឡើងនូវជំងឺដុំសាច់ស្បូន ? មានតែគ្រូពេទ្យទេដែលអាចធ្វើរោគវិនិច្ឆ័យបានក៏ប៉ុន្តែមានសញ្ញាមួយចំនួនដែលស្ត្រីខ្លួនឯងផ្ទាល់គួរយល់ដឹងដែរ គឺកត្តាដែលឈានទៅដល់ការធ្វើរោគវិនិច្ឆ័យថាមានដុំសាច់ស្បូន៖
១-ជាលក្ខណៈផ្ទាល់ខ្លួន ស្ត្រីអាចដឹងបានតាមរយៈនៃការកើតមាននូវដុំត្រង់តំបន់ពោះផ្នែកខាងក្រោម នៅលើថ្ងាស
២-វាមានលក្ខណៈជាសញ្ញាការឈឺផ្នែកខាងក្រោមពោះ ឬមានភាពឈឺធ្ងន់នៅផ្នែកខាងក្រោមពោះនោះក៏ជាសញ្ញាមួយដែលធ្វើឲ្យស្ត្រីមានការចាប់អារម្មណ៍ ហើយជាសញ្ញាទូទៅគឺស្ត្រីនោះត្រូវចងចាំពាក់ព័ន្ធទៅនឹងវត្តនៃរដូវ បានន័យថា ពាក់ព័ន្ធទៅនឹងរដូវផ្ទាល់ ។ គឺនៅក្នុងករណីដែលមានជំងឺដុំសាច់ស្បូន វាមានការប្រែប្រួលទៅលើវត្តនៃរដូវទាំងរយៈពេលនៃការមករដូវទាំងរយៈនៃវដ្តរដូវបានន័យថា ជួនកាលរដូវអាចមកមិនប្រក្រតីក្នុងមួយខែអាចមកពីរដងឬក៏បីដងដែលរយៈពេលនៃការមកនោះជាធម្មតារបស់ស្ត្រីគឺមធ្យមពីបីថ្ងៃទៅប្រាំថ្ងៃតែបុ៉ណ្ណោះ ។ ក៏បុ៉ន្តែករណីដែលមានជំងឺដុំសាច់ស្បូននៅក្នុងដំណាក់កាលមួយដែលដុំសាច់ស្បូនមានការវិវត្តទៅដល់ផលវិបាករបស់វាគឺវាបង្កឲ្យមានការធ្លាក់ឈាមនៅពេលមករដូវទាំងចំណុះបរិមាណឈាមធ្លាក់ច្រើន ហើយរយៈពេលនៃការមានរដូវគឺពន្យារពេលជួនកាលក្នុងករណីខ្លះអាចរហូតដល់ទៅ១០ថ្ងៃ ឬក៏១៥ថ្ងៃ និងអាចលើសនេះក៏មានដែរ តម្រូវឱ្យស្ត្រីនោះទៅមន្ទីរពេទ្យ ដែលក្នុងករណីខ្លះគ្រូពេទ្យត្រូវធ្វើការសង្គ្រោះបន្ទាន់ ។ តាមការពិនិត្យលក្ខណបច្ចេកទេសរបស់គ្រូពេទ្យនៅពេលនោះគ្រូពេទ្យអាចរកឃើញថា ស្បូនមានលក្ខណៈឡើងធំរីកផង នេះជាសញ្ញាមួយដែលកើតមាន ។
តាមការសិក្សាស្រាវជ្រាវបានរកឃើញថា ភាគច្រើនកើតទៅលើស្ត្រីក្នុងវ័យបន្តពូជបានន័យថា កើតក្នុងវ័យចាប់ពី២៥ឆ្នាំដល់៥៥ឆ្នាំ ហើយបញ្ហានៃការដុះសាច់ស្បូននេះគឺការវិភាគការព្យាបាល យើងពឹងផ្អែកតែទៅលើលក្ខណៈរបស់ដុំសាច់ស្បូនដែលដុះនេះ ។ ចំពោះស្ត្រីដែលស្ថិតនៅក្នុងវ័យបន្តពូជ ការព្យាបាលរបស់គ្រូពេទ្យជាការព្យាបាលដោយប្រើថ្នាំ ជាការព្យាបាលជាពិសេសទូទៅគឺពពួកថ្នាំអ័រម៉ូនរ៉ូស្តេសស្តេរ៉ូ ដែលជាថ្នាំមួយប្រភេទជួយទប់ស្កាត់ការរីកឆាប់រហ័សនៃដុំសាច់ស្បូនហើយអាចទប់ស្កាត់បានយ៉ាងមានប្រសិទ្ធភាព។ ជាធម្មតាស្ត្រីនៅក្រោយពេលអស់រដូវគឺស្បូនទ្រង់ស្វិតហើយពេល នោះដុំសាច់ស្បូនក៏ទ្រង់ស្វិតទៅតាមជាមួយ ស្ថានភាពបែបនេះ ការព្យាបាលរបស់គ្រូពេទ្យមិនចាំបាច់ធ្វើការវះកាត់ទេ ។
ដោយឡែកបើសិនជាដុំសាច់ស្បូនមានការវិវត្តធំឡើងៗឬក៏មានការកើនឡើងចំនួនដុំសាច់ស្បូននោះ ក្នុងចំណែកណាមួយដែលដុំសាច់ស្បូននោះវាបង្កជាផលវិបាកដូចជា បញ្ហាធ្លាក់ឈាមច្រើនមិនឈប់ បញ្ហាឈឺចុកចាប់ខ្លាំងរួមនឹងការធ្លាក់ឈាមច្រើនមិនឈប់ដែលជាផលវិបាកមួយដ៏សំខាន់ក្នុងជំងឺដុំសាច់ស្បូននេះដែលបង្កផលប៉ះពាល់ផ្ទាល់ចំពោះសុខភាពស្ត្រី ដូចនេះការព្យាបាលក៏ផ្អែកទៅលើបញ្ហានោះដែរ ។ ក្នុងដំណាក់កាលនេះគឺការព្យាបាលដោយថ្នាំពុំសូវមានប្រសិទ្ធភាពទៀតទេ ដូចនេះបើសិនជាស្ត្រីនោះស្ថិតក្នុងវ័យអស់រដូវគឺការព្យាបាលដែលសំខាន់និងមានប្រសិទ្ធភាពគឺ ការវះកាត់យកស្បូនចេញតែម្តង ។
លោកសាស្ត្រាចារ្យ យីត ស៊ុនណារ៉ុង បានបញ្ជាក់ថា បញ្ហាជំងឺដុំសាច់ស្ត្រីនេះ បច្ចុប្បន្ននៅលើសកលលោកដូចជា នៅកម្ពុជាយើងនៅតែជាជំងឺប្រភេទមួយដែលមានរាល់ថ្ងៃហើយតាមតួលេខជាលក្ខណះអន្តរជាតិឃើញថា ក្នុងមួយឆ្នាំៗមានស្ត្រីដែលទទួលការវះកាត់ស្បូន និងការវះកាត់ដុំសាច់ស្បូននេះមានមិនតិចជាង២០០ពាន់នាក់ក្នុងមួយឆ្នាំៗ។ ជាក់ស្តែងនៅកម្ពុជាក៏ដូច្នោះដែរ បញ្ហាជំងឺដុះសាច់ស្បូនក៏នៅតែជាជំងឺមួយដែលតែងតែជួបជាញឹកញាប់ ។ ឧទាហរណ៍ ៖ នៅមន្ទីរពេទ្យកាល់ម៉ែតក្នុងរយៈពេលប៉ុន្មានឆ្នាំចុងក្រោយនេះគឺមន្ទីរពេទ្យបានទទួលការព្យាបាលអ្នកជំងឺជាស្ត្រីដែលមកសម្រាកព្យាបាលរោគស្ត្រីនៅរយៈពេលបីឆ្នាំចុងក្រោយមានចំនួន៣២១០នាក់ក្នុងនោះគឺ ស្ត្រី៣២១នាក់ ដែលកើតមានជំងឺដុំសាច់ស្បូនបើគិតជាភាគរយប្រហែលជា១០%។ ក្នុងនោះមន្ទីរពេទ្យកាល់ម៉ែតព្យាបាលតាមរយៈការវះកាត់ដែលមានការវះកាត់ធម្មតា ការបើកពោះជាធម្មតា ដែលបច្ចុប្បន្ននេះមន្ទីរពេទ្យកាល់ម៉ែតមានការបំពាក់នូវមធ្យោបាយឧបករណ៍វះកាត់ថ្មីជាបច្ចេកទេសថ្មីទាន់សម័យគឺការវះកាត់ស្បូនតាមរយៈបំពង់សូរីយ៉ូស្គូពីគឺយើងអនុវត្តតាមមធ្យោបាយនេះក្នុងចំណោម៣២១នាក់នៃស្ត្រីទទួលការវះកាត់ជំងឺដុំសាច់ស្បូននេះយើងអនុវត្តបានចំនួន៥៨នាក់តាមមធ្យោបាយថ្មីនេះ ។
លោកសាស្ត្រាចារ្យប្រធានផ្នែករោគស្ត្រីនៃមន្ទីរពេទ្យកាល់ម៉ែតក៏បានធ្វើការអំពាវនាវដល់ស្ត្រីទាំងអស់បើសិនជាមានបញ្ហាណាពាក់ព័ន្ធឬមានចម្ងល់ផ្សេងៗដែលមិនទាន់បានយល់ និងស្វែងយល់ សូមអញ្ជើញមកមន្ទីរពេទ្យកាល់ម៉ែតដើម្បីទទួលការពិគ្រោះយោបល់ពីគ្រូពេទ្យជំនាញផ្នែកជំងឺរោគស្ត្រីដែលរង់ចាំទទួល២៤ម៉ោងដើម្បីដោះស្រាយបញ្ហាផាសុកភាពជូនប្រជាពលរដ្ឋ ៕
ចែករំលែកព័តមាននេះ