ប្រទេសហ្វ៊ីលីពីន ៖ រដ្ឋបាលហ្វ៊ីលីពីនថ្មី នឹងហាមឃាត់ឈ្មួញឯកជនមិនឲ្យនាំចូលអង្ករ ព្រមទាំងលុបបំបាត់ការរត់ពន្ធគ្រាប់ធញ្ញជាតិផ្សេងៗ ។ នេះបើយោងតាមប្រសាសន៍របស់លោក Emmanuel Pinol អគ្គលេខាធិការកសិកម្ម ។
ប្រទេសហ្វ៊ីលីពីន ៖ រដ្ឋបាលហ្វ៊ីលីពីនថ្មី នឹងហាមឃាត់ឈ្មួញឯកជនមិនឲ្យនាំចូលអង្ករ ព្រមទាំងលុបបំបាត់ការរត់ពន្ធគ្រាប់ធញ្ញជាតិផ្សេងៗ ។ នេះបើយោងតាមប្រសាសន៍របស់លោក Emmanuel Pinol អគ្គលេខាធិការកសិកម្ម ។
អាជ្ញាធរស្បៀងអាហារជាតិ លោក Emmanuel Pinol បានមានប្រសាសន៍ថា ៖ « កិច្ចការនាំអង្ករចូលដើម្បីធានាសុវត្ថិភាពស្បៀងអាហារ ចាប់ពីពេលនេះទៅ នឹងធ្វើឡើងផ្តាច់មុខដោយភ្នាក់ងាររដ្ឋតែមួយគត់ ។ លោកបានមានប្រសាសន៍បែបនេះ បន្ទាប់ពីសេចក្ដីប្រកាសតែងតាំងប្រធានាធិបតីដែលទើបជាប់ឆ្នោត លោក Rodrigo Duterte កាលពីថ្ងៃអង្គារកន្លងមក » ។
ការនាំអង្ករចូល គឺជារឿងមួយដ៏រសើបនៅក្នុងប្រទេសហ្វ៊ីលីពីន ដែលរដ្ឋាភិបាលបានជំរុញឱ្យរក្សាពន្ធនាំចូលខ្ពស់ដើម្បីការពារដល់កសិករក្នុងស្រុក ប៉ុន្តែពេលខ្លះក៏ត្រូវការការនាំចូលអង្កររាប់ពាន់តោនពីក្រៅប្រទេសផងដែរ ដើម្បីធានាដល់ការផ្គត់ផ្គង់ឲ្យបានគ្រប់គ្រាន់ ។
ទោះជាយ៉ាងណា កាលពីពេលថ្មីៗនេះ ឈ្មួញឯកជនត្រូវបានគេអនុញ្ញាតឲ្យនាំចូលអង្ករក្នុងចំនួន៨០៥.២០០តោន ជាមួយនឹងពន្ធ៣៥% ។
ក្នុងនោះដែរ កាលពីឆ្នាំ២០១៤ ហ្វ៊ីលីពីនបានបន្ធូរបន្ថយវិធានការលើការនាំអង្ករចូលដោយកាត់បន្ថយពន្ធពី៤០% មកនៅត្រឹម៣៥% និងបង្កើនការនាំចូលប្រចាំឆ្នាំចំនួន៨០៥.២០០តោន ពី៣៥០.០០០តោន ។
កាលពីសប្តាហ៍មុន អ្នកនាំពាក្យ លោក Peter Lavina បានឲ្យដឹងថា ៖ « រដ្ឋាភិបាលនឹងនាំចូលអង្ករចំនួន៥០០.០០០តោនទៀតនៅក្នុងឆ្នាំនេះ ដើម្បីបង្កើនទុនបម្រុងដែលនឹងត្រូវពិនិត្យ » ។
គួរបញ្ជាក់ថា ហ្វ៊ីលីពីនតែងតែនាំចូលអង្ករច្រើនជាង១លានតោនក្នុងមួយឆ្នាំ ដើម្បីបំពេញតម្រូវការរបស់ប្រជាជនកាន់តែច្រើន ។ ប្រទេសវៀតណាម គឺជាអ្នកផ្គត់ផ្គង់អង្ករធំជាងគេរបស់ហ្វ៊ីលីពីន បន្ទាប់មកគឺប្រទេសថៃ ៕
ចែករំលែកព័តមាននេះ