ប្រទេសម៉ាឡេស៊ី ៖ ការរឹតបន្តឹងនៃការផ្តល់ប្រាក់កម្ចី និងការប្រុងប្រយ័ត្នរបស់អ្នកប្រើប្រាស់ បានធ្វើឲ្យការលក់រថយន្តនៅក្នុងខែមេសាធ្លាក់ចុះ ដែលមានត្រឹមតែ៤២.១៧៧គ្រឿងប៉ុណ្ណោះ ។
សមាគមរថយន្តម៉ាឡេស៊ី (MAA) បានឲ្យដឹងកាលពីថ្ងៃអង្គារថា ការលក់រថយន្តនៅក្នុងខែមេសា បានធ្លាក់ចុះ៦,៧% ពី៤៥.១៨៧ គ្រឿងកាលពីឆ្នាំកន្លងទៅ ហើយគេរំពឹងថា បរិមាណនៃការលក់នឹងនៅតែមានកម្រិតដូចគ្នា នៅក្នុងខែឧសភានេះ ។
សមាគមនិយាយថា បរិមាណនៃការលក់ រថយន្តនៅក្នុងខែមេសា មានអត្រា១៣,៦% ឬស្មើនឹង៦.៦១១គ្រឿង ពោលគឺទាបជាងកាលពីខែមីនា ។ ក្នុងចំណោមរថយន្តចំនួន៤២.១៧៧គ្រឿងដែលបានលក់នោះ សមាគមឱ្យដឹងថា រថយន្តចំនួន៣៧.៨៩៣គ្រឿងត្រូវបានលក់ទៅឲ្យអ្នកប្រើប្រាស់ និង៤.២៨៤គ្រឿងទៀតលក់ក្នុងការធ្វើពាណិជ្ជ-កម្ម។
ដោយឡែក ក្នុងរយៈពេល៤ខែ ឆ្នាំនេះ ឧស្សាហកម្មលក់រថយន្តបានធ្លាក់ចុះ១៩%ស្មើនឹង១៧៣.៤៣២គ្រឿង បើធៀបនឹងរយៈពេលដូចគ្នាកាលពីឆ្នាំមុន មានចំនួន២១៣.៥៦៦គ្រឿង ។ សមាគមនិយាយថា ក្រុមហ៊ុនបានលក់រថយន្តឲ្យអ្នកដំណើរចំនួន១៥៥.២៥៤គ្រឿង និងរថយន្តសម្រាប់ពាណិជ្ជកម្មចំនួន១៨.១៧៨ គ្រឿង ។
សមាគមក៏បានបង្ហាញអំពីទិន្នន័យនៃការផលិតក្នុងខែមេសាផងដែរ ដែលការផលិតបានធ្លាក់ចុះ២៧,៣% ស្មើនឹង៤៤.៩៧៤គ្រឿង បើធៀបនឹងរយៈពេលដូចគ្នាកាលពីឆ្នាំកន្លងទៅ មានចំនួន៦១.៦៣៤គ្រឿង ។
ជាមួយគ្នានេះ សម្រាប់ការផលិតក្នុងរយៈពេល៤ខែដំបូងបានធ្លាក់ចុះ២២,៦% ស្មើនឹង ១៧៤.៣៨៥គ្រឿង បើធៀបនឹងរយៈពេលដូចគ្នាឆ្នាំមុន ដែលផលិតបានចំនួន២២៥.៣៣១គ្រឿង ៕
ចែករំលែកព័តមាននេះ