ខេត្តព្រៃវែង ៖ បន្ទាប់ពីរដ្ឋាភិបាលកម្ពុជាបានស្នើសុំទៅមិត្តចិនឱ្យជួយទទួលទិញនូវផលិតកសិផលរបស់កម្ពុជាបន្ថែម នៅគ្រាកន្លងមក ពេលនេះមិត្តចិនបានបង្ហាញថា ផ្លែមៀនប៉ៃលិន និងត្រីប្រា កម្ពុជាត្រូវបានភាគីចិនសម្រេចចិត្តធ្វើការសិក្សា និងវិភាគពីបញ្ហានិភ័យ បើដំណើរការទៅរលូននោះផ្លែមៀនប៉ៃលិន…
ខេត្តព្រៃវែង ៖ បន្ទាប់ពីរដ្ឋាភិបាលកម្ពុជាបានស្នើសុំទៅមិត្តចិនឱ្យជួយទទួលទិញនូវផលិតកសិផលរបស់កម្ពុជាបន្ថែម នៅគ្រាកន្លងមក ពេលនេះមិត្តចិនបានបង្ហាញថា ផ្លែមៀនប៉ៃលិន និងត្រីប្រា កម្ពុជាត្រូវបានភាគីចិនសម្រេចចិត្តធ្វើការសិក្សា និងវិភាគពីបញ្ហានិភ័យ បើដំណើរការទៅរលូននោះផ្លែមៀនប៉ៃលិន អាចនាំចេញទៅប្រទេសចិនបាន នៅរដូវប្រមូលផលលើកក្រោយ ចំណែកត្រីប្រាអាចនាំចេញទៅចិនក្នុងពេលដ៏ខ្លីខាងមុននេះ ។
ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជាថ្លែងនៅក្នុចូលរួមពិធីបើកសម្ពោធជាផ្លូវការ ផ្លូវជាតិលេខ១១ កាលពីថ្ងៃទី៦ ធ្នូ ២០២១នេះថា ឆ្លៀងក្នុងឱកាសថ្ងៃនេះខ្ញុំមានដំណឹងល្អ សូមចែករំលែកដល់អ្នកទាំងអស់គ្នា ។ ប្រទេសចិនបានសម្រេចចិត្តធ្វើការសិក្សា និងវិភាគហានិភ័យលើផ្លែមៀន និងត្រីប្រារបស់កម្ពុជា តាមរយៈវិដេអូពីចម្ងាយដែលជាវិធានការសំខាន់មួយ ដើម្បីអនុវត្តកុងសង់ស៊ិស កិច្ចប្រជុំមួយតាមវីដេអូរវាងថ្នាក់ដឹកនាំចិន និងសម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តម Wang Wentian សង្គត់ធ្ងន់ថា«បើសិនរលូនផ្លែមៀន របស់កម្ពុជាអាចនាំចេញទៅប្រទេសចិនបាននៅពេលរដូវប្រមូលផលលើកក្រោយ រីឯត្រីប្រាវិញនឹងអាចនាំចេញទៅទីផ្សារប្រទេសចិន នាពេលដ៏ខ្លីខាងមុខនេះ» ។
សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ថា Wang Wentianថ្ងៃនេះ ខ្ញុំសប្បាយរីករាយហើយក៏ប្រហែលជាប្រជាជនកម្ពុជាក៏សប្បាយរីករាយដូចគ្នាទៅលើអ្វីដែលឯកឧត្តមលើកឡើងខាងលើនេះ គឺជាចំណុចដែលខ្ញុំបានស្នើជាមួយ និងការជួបដោយផ្ទាល់ជាមួយ និងថ្នាក់ដឹកនាំចិន ។
សម្តេចតេជោ លើកឡើងថា« ពេលនោះខ្ញុំបានស្នើឱ្យមិត្តចិនផ្តល់អាទិភាពទៅលើការទិញផលិតផលកសិកម្មរបស់កម្ពុជា ក្នុងនោះអាទិភាពទៅលើផ្លែមៀនបៃលិន ក្រៅពីអ្វីដែលបានធ្វើរួច និងបានស្នើឱ្យពិភាក្សាជាកញ្ចប់ទៅលើផលិតផលរបស់កម្ពុជា ។ ចម្លើយដែលយើងបានមកនេះច្រើនជាងអ្វីដែលយើងបានស្នើសុំ ។ ពេលនោះយើងស្នើសុំអាទិភាពតែទៅលើផ្លែមៀន ឥលូវគាត់ផ្តល់ការត្រួតពិនិត្យតាមវីដេអូពីចម្ងាយសម្រាប់ផ្លែមៀន និងត្រីប្រា ហើយត្រីប្រានេះ កម្ពុជាសំបូរណាស់ បើសិនជាមានទីផ្សារចិនដ៏ធំមួយនេះនឹងមានការជំរុញលើកទឹកចិត្តឱ្យមានការចិញ្ចឹមត្រីប្រានៅក្នុងប្រទេសកម្ពុជារួចហើយដឹកជញ្ជូនទៅប្រទេសចិន ដោយវាបង្កើតបាននូវប្រាក់ចំណូលរបស់ពលរដ្ឋចិញ្ចឹមត្រីនៅកម្ពុជា» ។
សម្តេចតេជោ បន្តថា អ្នកដាំមៀននៅប៉ៃលិន, បាត់ដំបង, បន្ទាយមានជ័យ និងនៅកន្លែងផ្សេងទៀត គឺមានទីផ្សារសម្រាប់ការនាំចេញ ។ ប៉ុន្តែត្រូវធានាគុណភាពមិនអាចនាំចេញទៅទាំងមេរោគ ទៅប្រទេសចិននោះទេ ។ ការចិញ្ចឹមត្រីប្រាច្បាស់ជាកើនឡើងនៅអី្វដែលហៅថាសេចក្តីត្រូវការ និងការផ្គត់ផ្គង់ កាលណាមានត្រូវការទីផ្សារជាក់លាក់ដូចជា នៅក្នុងប្រទេសចិនដូចជា ផ្លែមៀននោះ និងមានការជំរុញឱ្យមានការដាំដុះ និងថែទាំដើមមៀន ដែលកន្លមកនេះប្រជាពលរដ្ឋមួយចំនួនមានបំណងកាប់ចោល ក្រោយរកទីផ្សារអត់បាន ។
សម្តេចតេជោ មានភាពជឿជាក់ថា« ត្រីប្រាកម្ពុជានឹងអាចបង្ហាញវត្តមាននៅលើតុទទួលទានអាហាររបស់ប្រជាជនចិននៅពេលដ៏ខ្លីខាងមុខ។នេះគឺជាការសង្ឃឹមរបស់យើង ដែលធ្វើឱ្យអ្នកចិញ្ចឹមត្រីប្រាទទួលបានប្រាក់ចំណូល» ៕
ចែករំលែកព័តមាននេះ