បុរសម្នាក់ចុះពីរថយន្តទំនើបឈររ៉េរ៉មិនបានប៉ុន្មានផង អណ្តាតភ្លើងឆេះសន្ធោសន្ធៅ(វីដេអូ)
- ព្រះសីហនុ
មានករណីរថយន្តស៊េរីទំនើបមួយគ្រឿងត្រូវបានឆ្លងចរន្តអគ្គិសនី បណ្តាលអោយឆាបឆេះអស់ទាំងស្រុង បង្កឱ្យមានការភ្ញាក់ផ្អើល
ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា មានករណីរថយន្តស៊េរីទំនើបមួយគ្រឿងត្រូវបានឆ្លងចរន្តអគ្គិសនី បណ្តាលអោយឆាបឆេះអស់ទាំងស្រុង បង្កឱ្យមានការភ្ញាក់ផ្អើលកាលពីវេលាម៉ោង៩និង២០នាទីព្រឹក នាថ្ងៃទី៤ ខែធ្នូ ឆ្នាំ២០២១ នេះ នៅត្រង់ចំណុចក្បែរផ្សារទំនើប ព្រីនម៉ល ស្ថិតក្នុងភូមិ១ សង្កាត់៣ ក្រុងព្រះសីហនុ ។
តាមប្រភពពីសមត្ថកិច្ចមូលដ្ឋាននៅនឹងកន្លែងកើតហេតុ បានអោយដឹងថា នៅវេលាម៉ោងកើតហេតុខាងលើ គេបានឃើញរថយន្តស៊េរីទំនើបមួយគ្រឿងម៉ាក ALphat ពណ៌ស ពាក់ស្លាកលេខភ្នំពេញ 1BB 7158 បើកបរដោយជនជាតិចិនម្នាក់ បានមកឈប់នៅត្រង់ចំណុចផ្លូវអន្ទង់អាំង មុខសណ្ឋាគារ «ស្តាបេ» ក្បែរផ្សារទំនើប «ព្រីនម៉ល» ស្ថិតក្នុងភូមិ១ សង្កាត់៣ ក្រុងព្រះសីហនុ ។
សមត្ថកិច្ចបន្តថា មួយសន្ទុះក្រោយមក ក៏ស្រាប់តែមានផ្សែងហ៊ុយចេញពីក្នុងរថយន្តនោះ បន្ទាប់មកក៏មានជនជាតិចិនម្នាក់ចុះពីលើរថយន្ត ហើយឈររ៉េរ៉ក្បែរនោះមិនទាន់ប៉ុន្មានផង ស្រាប់តែមានអណ្តាតភ្លើងឆាបឆេះតែម្តង ភ្លាមៗនោះក្រុមអ្នករត់ម៉ូតូកង់បីដែលចតក្បែរនោះ បាននាំគ្នាយកទឹកពីក្នុងម៉ូតូកង់បីមកជួយបាញ់ពន្លត់ តែអណ្តាតភ្លើងកាន់តែឆាបឆេះខ្លាំងដដែល។
សមត្ថកិច្ចបន្តទៀតថា នៅពេលដែលអណ្តាតភ្លើងកំពុងតែឆាបឆេះរថយន្តយ៉ាងសន្ធោសន្ធៅនោះ គេបានឃើញអ្នកបើកបររថយន្តជនជាតិចិនរូបនោះ បានដើរចេញពីកន្លែងកើតហេតុធ្វើមិនដឹង ដោយមិនខ្វល់អំពីរថយន្តខ្លួនកំពុងតែឆេះនោះឡើយ។ ភ្លាមៗនោះដែរ រថយន្តសង្គ្រោះពន្លត់អគ្គិភ័យរបស់កងរាជអាវុធហត្ថខេត្តព្រះសីហនុ ក៏បានចុះមកដល់ ហើយធ្វើការអន្តរាគមន៍ពន្លត់ ប៉ុន្តែពុំអាចជួយសង្គ្រោះបានឡើយ បណ្តាលឱ្យតួរថយន្តទាំងមូល ត្រូវបានអណ្តាតភ្លើងឆាបឆេះអស់ទាំងស្រុងតែម្តង។
ក្រោយកើតហេតុ សមត្ថកិច្ចបានត្រឹមតែស្ទួចយករថយន្តរងគ្រោះចេញពីកន្លែងកើតហេតុ ទៅរក្សាទុកនៅស្នងការដ្ឋាននគរបាលខេត្ត ដោយពុំទាន់ដឹងអំពីអត្តសញ្ញាណម្ចាស់រថយន្តនៅឡើយទេ។
ចែករំលែកព័តមាននេះ