ខេត្តបាត់ដំបង ៖ អភិបាលស្រុកឯកភ្នំ លោក ម៉ិល សុផល បានចេញមុខបដិសេធភ្លាមៗចំពោះព័ត៌មាននានាដែលថា លោកមានដីរាប់សិបហិកតានៅក្នុងតំបន់៣ នៅក្នុងទឹកដីស្រុកឯកភ្នំ បានជួលឲ្យពលរដ្ឋធ្វើស្រែ ដែលពេលនេះ ត្រូវបានកម្លាំងកងរាជអាវុធចុះបង្ក្រាប ។
កាលពីព្រឹកថ្ងៃទី ០២ ធ្នូ កម្លាំងកងរាជអាវុធហត្ថ បានចុះស្រាវជ្រាវនៅតាមតំបន់ព្រៃលិចទឹក ហើយបានប្រទះឃើញគ្រឿងយន្ត និងសម្ភារមួយចំនួននៅក្នុងដីធ្វើស្រែមួយកន្លែង ដែលសមត្ថកិច្ចអះអាងថា ស្ថិតនៅក្នុង «តំបន់៣» ត្រង់ចំណុចបឹងខ្មៅ ក្នុងភូមិព្រែកក្រូច ឃុំព្រែកនរិន្ទ ស្រុកឯកភ្នំ ដែលម្ចាស់បានរត់ចោលមុនពេលកម្លាំងចុះទៅដល់ ។ កម្លាំងសមត្ថកិច្ចបានដកហូតយកវត្ថុតាងទាំងនោះ មានរថយន្តច្នៃសម្រាប់វ៉ៃដី ស្រូវពូជជាច្រើនការ៉ុង និងសម្ភារមួយចំនួនទៀត ។ ប្រជាកសិករដែលធ្វើស្រែនៅកន្លែងនោះ បានរត់ចោលសម្ភារមុនពេលសមត្ថកិច្ចចុះទៅដល់ តែគេបានស្គាល់ម្ចាស់គ្រឿងចក្រ គឺឈ្មោះ រ៉ុត ភេទប្រុស។
ជាមួយនឹងកិច្ចប្រតិបត្តិការភ្លាមៗនេះ មានប្រភពមិនច្បាស់លាស់មួយចំនួនបានបង្ហើបប្រាប់សមត្ថកិច្ចថា «ដីស្រែនៅចំណុចបឹងខ្មៅ ដែលត្រូវបង្ក្រាបនោះ គឺ ពលរដ្ឋបានជូលពីលោកចៅហ្វាយស្រុកឯកភ្នំ»។ លោក ម៉ិល សុផល អភិបាលស្រុកឯកភ្នំ បានចេញមុខបដិសេធភ្លាមៗ ក្រោយពីទទូលបានព័ត៌មានស្រពិចស្រពិលនេះ។ លោក បានប្រាប់កោះសន្តិភាពនៅរសៀលថ្ងៃទី ០៣ ធ្នូ នៅសាលាស្រុកឯកភ្នំថា លោកគ្មានដីនៅតំបន់«បឹងខ្មៅ» នោះមួយចំអាមទេ ហើយក៏មិនមានដីនៅកន្លែងដ៏ទៃទៀត នៅក្នុងស្រុកឯកភ្នំ សម្រាប់ជួលឲ្យពលរដ្ឋធ្វើស្រែដែរ ។ ដូច្នេះ លោកសូមបដិសេធរាល់ព័ត៌មាននានា ដែលអះអាងថា លោកមានដីនៅចំណុច«បឹងខ្មៅ» ហើយស្ថិតក្នុង«តំបន់៣» ជួលឲ្យពលរដ្ឋធ្វើស្រែ។
នៅថ្ងៃដដែលនេះ កោះសន្តិភាព បានព្យាយាមទំនាក់ទំនង ដើម្បីបានជួបសួរនាំផ្ទាល់ជាមួយប្រជាពលរដ្ឋចំនួន០៣នាក់ ដែលបានធ្វើស្រែនៅចំណុច «បឹងខ្មៅ» ដែលត្រូវបានកម្លាំងកងរាជអាវុធហត្ថចុះបង្ក្រាប ។ ប្រជាពលរដ្ឋទាំង០៣នាក់នោះ មាន ១-ឈ្មោះ វុន រ៉ុត ភេទប្រុស អាយុ៤៣ឆ្នាំ នៅភូមិគង់ទុំ ឃុំព្រែកនរិន្ទ ស្រុកឯកភ្នំ ២-ឈ្មោះ ប៉េង វុទ្ធា ភេទប្រុស អាយុ៦៥ឆ្នាំ នៅភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង និង៣-ឈ្មោះ ម៉ី ដា ប្រុអាយុ៤២ឆ្នាំ នៅភូមិករហាល ឃុំពាមឯក ស្រុកឯកភ្នំ ។
កសិករទាំង០៣នាក់នេះ បានបញ្ជាក់ប្រាប់កោះសន្តិភាពយ៉ាងដូច្នេះថា « ពួកខ្ញុំមិនបានដឹងថា ដីស្រែដែលខ្ញុំជួលធ្វើនោះជាដីនរណាទេ តែជាក់ស្ដែងពួកខ្ញុំបានជួលពីឈ្មោះ ស្រ៊ាង សុខស្រ៊ុន នៅឃុំព្រែកនរិន្ទ ស្រុកឯកភ្នំ ដែលមានផ្ទៃដីទំហំ៥០ហិកតា»។ កសិករទាំង០៣នាក់នេះ បានបដិសេធចំពោះព័ត៌មាននានា ដែលថា ពួកគេបានជួលដីស្រែនោះពីលោកអភិបាលស្រុកឯកភ្នំ។
កសិករឈ្មោះ វុន រ៉ុត បានបញ្ជាក់អំពីការសម្រេចជួលដីនោះធ្វើស្រែថា «តាមពួកខ្ញុំមិនបានដឹងថា ដីស្រែដែលពួកខ្ញុំជួលនោះស្ថិតក្នុងតំបន់២ឬ៣នោះទេ ព្រោះដីស្រែនោះត្រូវបានគេធ្វើរាល់ឆ្នាំ ហើយពួកខ្ញុំទើបជួលឆ្នាំនេះទេ។ លុះចាប់ចុះធ្វើក៏ត្រូវសមត្ថកិច្ចចុះបង្ក្រាប។ ប៉ុន្តែខ្ញុំបានផ្អាកសកម្មភាពតាំងពីថ្ងៃសមត្ថកិច្ចចុះបង្ក្រាបដំបូងម្ល៉េះ តែមិនទាន់បានប្រមូលសម្ភារយកមកផ្ទះ»។
ទោះយ៉ាងណា ពេលនេះកម្លាំងកងរាជអាវុធហត្ថ បានដកហូតសម្ភារបង្កបង្កើនផល និង រថយន្តច្នៃវ៉ៃដីមួយគ្រឿង យកមករក្សាទុកនៅមូលដ្ឋានកងរាជអាវុធហត្ថស្រុកឯកភ្នំ ចាត់វិធានការតាមនីតិវិធីហើយ៕
ចែករំលែកព័តមាននេះ