ទីលានចាក់សំរាម ទី១ ដែលសង់ឡើងតាមបទដ្ឋានបច្ចេកទេសត្រឹមត្រូវ គឺនៅខេត្តព្រះសីហនុ
ខេត្តព្រះសីហនុ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន កាលពីថ្ងៃទី៣០ វិច្ឆិកា ២០២១…
ខេត្តព្រះសីហនុ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន កាលពីថ្ងៃទី៣០ វិច្ឆិកា ២០២១ បានថ្លែងថា ទីលានចាក់សំរាមនៅខេត្តព្រះសីហនុ គឺជាទីលានទី១ នៅកម្ពុជា ដែលបានសាងសង់ឡើងស្របតាមបទដ្ឋានបច្ចេកទេសត្រឹមត្រូវ ។
លោក នេត្រ ភក្ត្រា ថ្លែងឲ្យដឹងបែបនេះនៅក្នុងអំឡុងពេល ដឹកនាំក្រុមអ្នកសារព័ត៌មាន ធ្វើដំណើរទស្សនកិច្ចស្វែងយល់ពីការគ្រប់គ្រងសំណល់រឹង សំរាមនៅទីលានចាក់សំរាមរបស់ខេត្តព្រះសីហនុ ។ ទីលានចាក់សំរាមនៅខេត្តព្រះសីហនុ ជាគម្រោងរបស់រាជរដ្ឋាភិបាលកម្ពុជា អនុវត្តដោយក្រសួងសាធារណការ និងដឹកជញ្ជូន និងបានផ្ទេរមកស្ថិតក្រោមការគ្រប់គ្រង និងប្រតិបត្តិការរបស់ក្រសួងបរិស្ថាន កាលពីថ្ងៃទី៥ ខែវិច្ឆិកា ឆ្នាំ២០២១ ។
លោក នេត្រ ភក្ត្រា បានថ្លែងបន្តថា តាមបទដ្ឋានបច្ចេកទេស ដែលក្រសួងសាធារណការ និងដឹកជញ្ជូន បានសាងសង់ទីលាននេះ គម្រោងសម្រាប់ចាក់សំរាម រយៈពេល ៥ឆ្នាំ ដោយកាយមាន ៤រណ្តៅ ទំហំជាង ៥ហិកតា ដែលអាចកាយកប់សំរាម ៧ស្រទាប់ និងមានកម្ពស់ ២១ម៉ែត្រ ដែលតាមការគណនាអាចផ្ទុកសំរាម ជិត១លានតោន ។
លោក នេត្រ ភក្ត្រា បានបន្តទៀតថា នៅក្នុងឆ្នាំ ២០២២ ខាងមុខ ទីលានចាក់សំរាម ដែលមានលក្ខណៈស្តង់ដារបច្ចេកទេស របៀបនេះ យ៉ាងហោច ៦ នឹងត្រូវដាក់ឲ្យដំណើរការ ដែលជាកិច្ចសហប្រតិបត្តិការរវាងរាជរដ្ឋាភិបាល និងដៃគូអភិវឌ្ឍន៍ រួមមាន ធនាគារអភិវឌ្ឍន៍អាស៊ី ធនាគារពិភពលោកជាដើម ។ មានដូចជា ៖ ទីលានចាក់សំរាមនៅខេត្តកែប, កំពង់ឆ្នាំង, ពោធិ៍សាត់, បាត់ដំបង និងកំពតជាដើម ។ ជាមួយគ្នានេះ រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន និងក្រសួងបរិស្ថាន នឹងធ្វើការជាមួយដៃគូបន្ថែមទៀត ដើម្បីសាងសង់ទីលានចាក់សំរាម ស្របតាមបច្ចេកទេសដូចជា សៀមរាប ខេត្តបន្ទាយមានជ័យ ដែលជាគោលដៅរបស់រាជរដ្ឋាភិបាល នឹងគ្រប់គ្រងសំណល់រឹងសំរាម ឲ្យបានល្អ ដែលជាគោលបំណង នៃគោលនយោបាយជាតិគ្រប់គ្រង សំណល់រឹងសំរាម ដែលរាជរដ្ឋាភិបាលដាក់ឲ្យអនុវត្ត ។
លោក នេត្រ ភក្ត្រា បានលើកឡើងថា គោលដៅរបស់រាជរដ្ឋាភិបាល ធ្វើការគ្រប់គ្រងកាកសំណល់រឹងសំរាមឲ្យបានល្អ ដែលជាផ្នែកមួយ នៃគោលនយោបាយជាតិ ហើយអ្វីដែលសំខាន់គឺ ក្រសួងបរិស្ថាន នឹងបន្តផ្តល់ជំនួយបច្ចេកទេសបណ្តុះបណ្តាលសមត្ថភាពមន្ត្រីដល់រដ្ឋបាលថ្នាក់ក្រោមជាតិ ក្នុងការគ្រប់គ្រងសំរាមនៅតាមទីប្រជុំជន ។
ទាក់ទងនឹងបញ្ហាសំរាមនេះដែរ លោក នេត្រ ភក្ត្រា បានឲ្យដឹងបន្ថែមថា ក្នុងមួយថ្ងៃ សំណល់សំរាម ត្រូវបានបង្កើតឡើងមានប្រមាណជាង ១ម៉ឺនតោន ហើយក្នុងមួយឆ្នាំ សំណល់សំរាមមានប្រមាណ ៤លានតោន ។ ដោយឡែកនៅក្នុងខេត្តព្រះសីហនុ មានសំរាមចន្លោះពី ៣៥០-៤០០តោន ត្រូវបានបង្កើតឡើងក្នុងមួយថ្ងៃ ។ តាមការសិក្សា ក្នុងចំណោមសំរាមទាំងនេះ គឺមាន ៦៥ ភាគរយ គឺជាសំរាមសំណល់ សរីរាង្គ, ២០ ភាគរយជាសំណល់ ប្លាស្ទិក ហើយនៅសល់ប៉ុន្មាន គឺជាសំណល់រឹង ។
លោក នេត្រ ភក្ត្រា ឲ្យដឹងទៀតថា ក្នុងកំណើនសំរាមប្រចាំឆ្នាំចន្លោះពី ១០% ទៅ ១៥% នោះអាចនឹងធ្វើឲ្យទីលានចាក់សំរាម ដែលគ្រោងចាក់ រយៈពេល ៥ឆ្នាំ ប្រែប្រួល និងអាចប្រើប្រាស់មិនបានគ្រប់ពេលវេលាកំណត់ ព្រោះកំណើនសំរាមកើនឡើង ហើយការដកហូតយកទៅកែច្នៃ នៅមានកម្រិត ។ ខេត្តព្រះសីហនុ ត្រូវបានរាជរដ្ឋាភិបាលយកចិត្តទុកដាក់ ក្នុងការគ្រប់គ្រងសំណល់សំរាមនេះ ដោយសារខេត្តនេះជាខេត្តគោលដៅ ប្រែក្លាយជាតំបន់សេដ្ឋកិច្ចពិសេសគំរូពហុបំណង ។
ដោយឡែក លោក ហុក សុផាន់ណារ៉ូ នាយកគ្រប់គ្រងទីលានសំរាមទីប្រជុំជននៅខេត្តព្រះសីហនុ បានលើកឡើងថា ទីលានចាក់សំរាមអូរតាសេក ក្នុងខេត្តព្រះសីហនុ ក្នុងមួយថ្ងៃ សំរាមដែលបានចោល ផ្អែកតាមការគណនាស្ថានភាពជាក់ស្តែង បរិមាណសំរាមដែលយកមកចាក់ទីលានក្នុងរយៈពេល ២៥ថ្ងៃ (ចាប់ពីថ្ងៃទី០៥-៣០ ខែវិច្ឆិកា) មានចំនួន ១០,៥៧៤តោន ដែលគិតជាមធ្យម មានសំរាមប្រមាណ ៤០០តោន ក្នុងមួយថ្ងៃ ដែលយកមកចាក់នៅលើទីលាន ហើយសំរាមទាំងនេះ គឺមិនមែនមកតែពីក្រុងព្រះសីហនុនោះទេ វាក៏មកពីស្រុកព្រៃនប់ ដែលអនុវត្តប្រតិបត្តិករ ចំនួនពីរក្រុមហ៊ុន ។
លោកបានឲ្យដឹងថា នៅទីលានចាក់សំរាម ក្នុងខេត្តព្រះសីហនុនេះ ក្រៅពីកន្លែងទុកដាក់សំរាមប្រកបដោយស្តង់ដាហើយ គេនៅធ្វើការបែងចែកត្រឹមត្រូវ ដោយក្នុងនេះប្រភេទសំរាមនីមួយៗ គេអាចយកទៅកែច្នៃ ប្រើប្រាស់ តាមប្រភេទរបស់ វានីមួយៗ ថែមទៀត ៕
ចែករំលែកព័តមាននេះ