ប្រទេសចិន ៖ ចិននឹងពង្រឹងច្បាប់ស្ដីពីភ្នាក់ងារអចលនទ្រព្យឡើងវិញ បន្ទាប់ពីមានពាក្យបណ្តឹងពីអតិថិជន ចំពោះផ្នែកអចលនទ្រព្យក្នុងការបិទបាំងព័ត៌មាន ។
« ក្រសួងអភិវឌ្ឍន៍លំនៅឋានទីក្រុង និងជនបទ បាននិងកំពុងធ្វើការជាមួយនាយកដ្ឋានដីធ្លី ស្ដីពីគោលនយោបាយដើម្បីគ្រប់គ្រងការចុះបញ្ជីលំនៅឋានរបស់ភ្នាក់ងារ និងពង្រឹងការគ្រប់គ្រងឈ្មួញកណ្ដាល » ។ នេះបើតាមអនុរដ្ឋមន្ត្រី លោក Lu Kehua បានថ្លែងកាលពីពេលថ្មីៗនេះ ។
ក្រសួងក៏បានសន្យាផងដែរ ក្នុងការធ្វើឲ្យប្រសើរឡើងនូវប្រព័ន្ធព័ត៌មានអំពីឥណទានក្នុងវិស័យនេះ ព្រមទាំងបង្កើនការត្រួតពិនិត្យទៅលើការអនុវត្តរបស់ភ្នាក់ងារអចលនទ្រព្យ។ ការចុះបញ្ជីលំនៅឋានក្លែងបន្លំ និងការយកថ្លៃមិនទៀងទាត់ គឺជាចំណុចដែលតែងរងបណ្ដឹងពីអតិថិជន ។
យោងតាមការស្ទង់មតិមួយដែលបានធ្វើឡើងកាលពីឆ្នាំ២០១៤ បង្ហាញថា ៤៣,៨%នៃប្រជាជន៣ម៉ឺននាក់ដែលរស់នៅក្នុងទីក្រុងប៉េកាំង បាននិយាយថា នៅពេលជួលផ្ទះម្ដងៗ ពួកគេតែងជួបនឹងឥរិយាបថមិនសមរម្យរបស់ពួកភ្នាក់ងារអចលនទ្រព្យ ។
គួរបញ្ជាក់ថា កាលពីខែមុន និយ័តករក្រុងសៀងហៃបានពិន័យភ្នាក់ងារអចលនទ្រព្យចំនួន៦នាក់ ក្នុងទឹកប្រាក់ចាប់ពី២ម៉ឺនដុល្លារ រហូតដល់ជាង៣ម៉ឺនដុល្លារអំពីការផ្សព្វផ្សាយព័ត៌មានមិនពិត ៕
ចែករំលែកព័តមាននេះ