ADផ្ទាំងផ្សព្វផ្សាយពាណិជ្ជកម្ម

Picture

“ខ្មែរធ្វើបាន” ​ដោយ​ភាព​ម្ចាស់​ការ មិន​ពឹង​ជំនួយ និង​អ្នកបច្ចេកទេស​បរទេស​ណា ដើម្បី​ស្ថាបនា​សមិទ្ធផល​ដ៏​ធំធេង ក្នុង​ខេត្ត​ព្រះ​សីហ​នុ

1 ខែ មុន

ខេត្ត​ព្រះ​សីហ​នុ ៖ សម្ដេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា នៅ​ថ្ងៃ​ទី​០២ ខែធ្នូ ឆ្នាំ​២០២១…

ខេត្ត​ព្រះ​សីហ​នុ ៖ សម្ដេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា នៅ​ថ្ងៃ​ទី​០២ ខែធ្នូ ឆ្នាំ​២០២១ បាន​សម្ពោធ​ដាក់​ឲ្យ​ប្រើប្រាស់​ហេដ្ឋារចនាសម្ព័ន្ធ​ផ្លូវ​ក្រុង ចំនួន ៣៧​ខ្សែ និង​ស្ថានីយ​ប្រព្រឹត្ត​កម្ម​ទឹក​កខ្វក់​ទី​មួយ និង​ទី​ពីរ ក្នុង​ខេត្ត​ព្រះ​សីហ​នុ ដោយ​មានការ​ចូលរួម​ពី​សមាជិក សមាជិកា នៃ​ព្រឹទ្ធសភា រដ្ឋសភា និង​រាជរដ្ឋាភិបាល ភ្ញៀវ​កិត្តិយស​ជាតិ​-​អន្តរជាតិ អាជ្ញាធរ​ខេត្ត មន្ត្រីរាជការ កងកម្លាំង​ប្រដាប់ អាវុធ លោកគ្រូ អ្នកគ្រូ យុវជន និង​បងប្អូន​ប្រជាពលរដ្ឋ ។

ថ្លែង​ក្នុង​សុន្ទរកថា ស្វាគមន៍ និង​របាយការណ៍​គោរព​ជូន​សម្តេច​នាយក​រដ្ឋមន្ត្រី និង​អង្គពិធី​ទាំងមូល ឯកឧត្តម ជា សុ​ផា​រ៉ា ឧបនាយករដ្ឋមន្ត្រី រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់ និង​ជា ប្រធាន​គណៈកម្មាធិការ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កម្ពុជា (​គ​.​អ​.​ឆ​.​ក​) បាន​កត់សម្គាល់​ថ្ងៃ សម្ពោធ​ដាក់​ឱ្យ​ប្រើប្រាស់​ជា​ផ្លូវការ នៃ​ហេដ្ឋារចនាសម្ព័ន្ធ​ផ្លូវ​ក្រុង​ចំនួន ៣៧​ខ្សែ ស្រប​ពេល​ដែល​ប្រជាជន​កម្ពុជា កំពុង​អបអរសាទរ​ខួប​លើក​ទី​៤៣ នៃ​ថ្ងៃ​បង្កើត​រណសិរ្ស​សាមគ្គី​សង្គ្រោះ​ជាតិ​កម្ពុជា ២​ធ្នូ ១៩៧៨ ២​ធ្នូ ២០២១ ដែល​បច្ចុប្បន្ន​មានឈ្មោះ​ថា ៖ រណសិរ្ស​សាមគ្គី​អភិវឌ្ឍន៍​មាតុភូមិ​កម្ពុជា ដែល​បាន​សង្គ្រោះ អាយុជីវិត​ប្រជាជន​ខ្មែរ​ឱ្យ​ចាក​ផុត​ពី​មហន្តរាយ នៃ​របប​អាវ​ខ្មៅ និង​បាន​ស្ដារ​កសាង និង​អភិវឌ្ឍន៍​មាតុភូមិ កម្ពុជា​ឱ្យ​ប្រែ​មុខមាត់​ថ្មី​ជា​បន្តបន្ទាប់ ។

ឧបនាយករដ្ឋមន្ត្រី បាន​មាន​ប្រសាសន៍​ផង​ដែរ​ថា ៖ ការ​ស្ថាបនា​ហេដ្ឋារចនាសម្ព័ន្ធ​ផ្លូវ​ក្នុង​ក្រុង ចំនួន ៣៧​ខ្សែ​ក្នុង​ខេត្ត​ព្រះ​សីហ​នុ គឺជា​គំនិត​ផ្ដួចផ្ដើម​ដ៏​ថ្លៃថ្លា របស់​សម្ដេច​តេ​ជោ​នាយក​រដ្ឋមន្ត្រី កាលពី​ថ្ងៃ​ទី​៣០ ខែសីហា ឆ្នាំ​២០១៩ ដើម្បី​កែ​លម្អ​ខ្សែ​ផ្លូវ​មេ​យុទ្ធសាស្ត្រ នៃ​ប្រព័ន្ធ​នគរូបនីយកម្ម គមនាគមន៍​ដឹក​ជញ្ជូន សេដ្ឋកិច្ច ធុរកិច្ច និង​ទេសចរណ៍ នៃ​ខេត្ត​ព្រះ​សីហ​នុ សំដៅ​រួមចំណែក​កាត់​បន្ថយ​ភាព​ក្រីក្រ លើកកម្ពស់​កម្រិតជីវភាព​រស់នៅ​របស់​ប្រជាពលរដ្ឋ និង​លើកកម្ពស់​សោភ័ណ​ភាព​របស់​ខេត្ត​នេះ​ផង​ដែរ ។

បន្ថែម​ពីលើ​នេះ ឯកឧត្តម​ឧបនាយករដ្ឋមន្ត្រី បាន​បន្ថែម​ថា ៖ គម្រោង​ស្ថាបនា​ហេដ្ឋារចនាសម្ព័ន្ធ​ផ្លូវ​ក្រុង ចំនួន​៣៧​ខ្សែ នៅ​ក្រុងព្រះសីហនុ​នេះ នឹង​ចូលរួម​ចំណែក​ក្នុង​ការ​អនុវត្ត​ផែនការ​រៀបចំ​ដែនដី​ខេត្ត​ព្រះ​សីហ​នុ ចក្ខុវិស័យ​ឆ្នាំ ២០៣០ ក្នុង​គោលបំណង​ធ្វើ​ឱ្យ​ខេត្ត​ព្រះ​សីហ​នុ​ក្លាយទៅជា​ប៉ូ​ល​អភិវឌ្ឍ​ជាតិ ប្រកបដោយ​ចីរភាព មជ្ឈមណ្ឌល​កម្សាន្ត​ជាតិ តាម​រយៈ​ការ​អភិវឌ្ឍ​ទីក្រុង​ទំនើប និង​ការ​រៀបចំ​ជា​តំបន់​សេដ្ឋកិច្ច​ពិសេស គំរូ​ពហុ​បំណង មជ្ឈមណ្ឌល​ភស្តុ​ភារ​កម្ម​ជាតិ មជ្ឈមណ្ឌល​កំណើន​ជាតិ និង​ជា​មជ្ឈមណ្ឌល​ឧស្សាហកម្ម​បច្ចេកវិទ្យា​ទំនើប​។

ថ្លែង​ទៅ​កាន់​អង្គពិធី​នា​ឱកាស​នោះ​ដែរ សម្ដេច​តេ​ជោ​នាយក​រដ្ឋមន្ត្រី បាន​គូសបញ្ជាក់​ថា ៖ សមិទ្ធផល​នេះ​កើត​ចេញពី​ស្នាដៃ​កូន​ខ្មែរ​សុទ្ធសាធ គ្មាន​ប្រើ​អ្នកបច្ចេកទេស​បរទេស គ្មាន​លាយឡំ​ជាមួយនឹង​ជំនួយ​បច្ចេកទេស ឬ​ជំនួយ​ថវិកា​ពី​បរទេស​ណា​ទេ និង​បាន​រំលឹក​ថា ៖ ដូនតា​យើង​អាច​សាងសង់​អង្គរវត្ត​បាន រឿង​អី​ដែល​ខ្មែរ​យើង​ធ្វើ​ប៉ុណ្ណឹង​មិន​បាន ។

ឆ្លៀត​ក្នុង​ឱកាស​នេះ សម្តេច​ក៏​បាន​ថ្លែងអំណរគុណ និង​ការ​កោតសរសើរ​ចំពោះ​ថ្នាក់ដឹកនាំ នៃ​គណៈកម្មាធិការ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កម្ពុជា (​គ​.​អ​.​ឆ​.​ក​) និង​សមាជិក​ជា​សហការី​ទាំងអស់ ដែល​បាន​ខិតខំ​ប្រឹងប្រែង​បំពេញការងារ​របស់​ខ្លួន​ប្រកបដោយ​ជោគ ជ័យ​ដ៏​ត្រចះត្រចង់​នា​ពេល​នេះ ។

ជាង​នេះ​ទៅ​ទៀត សម្តេច​តេ​ជោ​នាយក​រដ្ឋមន្ត្រី បាន​សម្តែង​មោទនភាព​ជាតិខ្មែរ ដែល​សម្រេច​បាន​សមិទ្ធផល​ដ៏​ធំធេង​នេះ និង​បាន​អញ្ជើញ​ប្រជាពលរដ្ឋ​ខ្មែរ មក​ទស្សនា​ខេត្ត​ព្រះ​សីហ​នុ ដើម្បី​រីករាយ​នឹង​សមិទ្ធផល ដែល​ខ្មែរ​ធ្វើ​បាន និង​បាន​ថ្លែងអំណរគុណ និង​កោតសរសើរ​ផង​ដែរ​ចំពោះ​រដ្ឋបាល​ខេត្ត អាជ្ញាធរ​ពាក់ព័ន្ធ មន្ត្រីរាជការ​ជុំវិញ​ខេត្ត ក៏​ដូច​ជា​ប្រជាពលរដ្ឋ​នៅ​ក្នុង​ខេត្ត​ព្រះ​សីហ​នុ ដែល​បាន​ផ្ដល់​កិច្ចសហការ​ដ៏​ល្អ​ក្នុង​ការ​ប្រែក្លាយ​ខេត្ត​ព្រះ​សីហ​នុ​ទៅ​ជាទី​ក្រុង​ទំនើប និង​មាន​ភាព​រីក​ចម្រើន ។

សូម​ជម្រាប​ជូន​ថា ៖ គម្រោង​ស្ថាបនា​ហេដ្ឋារចនាសម្ព័ន្ធ​ផ្លូវ​ក្នុង​ក្រុង​ចំនួន ៣៧​ខ្សែ ក្នុង​ខេត្ត​ព្រះ​សីហ​នុ ត្រូវ​បាន​បើក​ការដ្ឋាន​សាងសង់​ក្រោម​អធិបតីភាព​ដ៏​ខ្ពង់ខ្ពស់​សម្ដេច​តេ​ជោ​នាយក​រដ្ឋមន្ត្រី កាលពី​ថ្ងៃ​ទី​១៦ ខែវិច្ឆិកា ឆ្នាំ​២០១៩ មាន​ប្រវែង​សរុប ៨៤ គីឡូម៉ែត្រ និង​មាន​ផ្ទៃក្រឡា​សរុប ១,៤៧០,៥១១​ម៉ែត្រការ៉េ សាងសង់​ដោយ​អង្គភាព និង​ក្រុមហ៊ុន​ចំនួន ៨ ចែក​ចេញ​ជា​បី​ប្រភេទ​រួម​មាន ៖ មហាវិថី​ចំនួន បី ខ្សែ​ប្រវែង ២០,៨ គីឡូម៉ែត្រ វិ​ថី​ចំនួន​១៥​ខ្សែ ប្រវែង ៥០,៣ គីឡូម៉ែត្រ និង​អនុ​វិ​ថី​ចំនួន ១៩​ខ្សែ ប្រវែង ១២,៨ គីឡូម៉ែត្រ ខ្សែ​ផ្លូវ​នីមួយ​ៗ ធ្វើ​ពី​បេតុង​សរសៃដែក ក្រាល​ដោយ​កម្រាល​កៅស៊ូ​បេ​ទី​ម មាន​បណ្ដាញ​លូ​ទឹកភ្លៀង និង​លូ​ទឹក​កខ្វក់​ផ្សេង​គ្នា ចិញ្ចើម​ផ្លូវ​មាន​ខឿន​ថ្ម​ក្រា​នី​ត ផ្លូវ​ថ្មើរជើង ផ្លូវ​សម្រាប់​ជន​មាន​ពិការ​ភាព និង​ផ្លូវ​ជិះ កង់​ក្រាល​ថ្ម​ក្រា​នី​ត ដោយ​បាន​គិតគូរ​តាម​ប្លង់​នគរូបនីយកម្ម​ហេដ្ឋារចនាសម្ព័ន្ធ​ផ្លូវ​ក្រុង ដែល​មាន​ភាព​ចាំបាច់ ដើម្បី​ធ្វើ​ឱ្យ​ក្រុងព្រះសីហនុ ក្លាយជា​ទីក្រុង ដែល​មាន​ចរាចរណ៍​ល្អ​ប្រសើរ​ប្រកបដោយ​និរន្តរភាព ។

លើស​ពី​នេះ​ទៀត គម្រោង​បាន​សាងសង់​ស្ពាន​ចំនួន ៩​កន្លែង ប្រវែង​សរុប ២៩៦​ម៉ែត្រ ដើម្បី​ត​ភ្ជាប់​ខ្សែ​ផ្លូវ ទាំងអស់ បាន​រៀបចំ​ទីលាន​តេ​ជោ ដែល​មាន​ទំហំ ២៣,៥៩៣ ម៉ែត្រការ៉េ សម្រាប់​ជូន​ប្រជាពលរដ្ឋ​ធ្វើ​ពិធី ជួបជុំ ហាត់ប្រាណ និង​ដើរ​កំសាន្ត បាន​រៀបចំ​ចំណតរថយន្ត​ទេសចរណ៍ ចំនួន ១០​ចំណត និង​រថយន្ត គ្រួសារ​ចំនួន​១១៤ ចំណត បំពាក់​កាមេរ៉ា​សុវត្ថិភាព ចំនួន ៥៣៣​គ្រឿង ដំឡើង​បង្គោល​ភ្លើង​បំភ្លឺ​ផ្លូវ ចំនួន ៤,៥៩២ បង្គោល​បំពាក់​អំ​ពូ​ល​ភ្លើង​ឆ្លាត បំភ្លឺ​ផ្លូវ​សាធារណៈ ចំនួន ៥,៣០០​អំ​ពូ​ល ដាំ​ផ្កា ដាំ​ដើមឈើ នៅ​អម​សងខាង​ផ្លូវ ដាំ​ស្មៅ ស្ថាបនា​ចម្លាក់ បដិមា​ចំនួន ៥ ទីតាំង ចាក់​បំពេញ​ខ្សាច់​ស រៀបចំ​ផ្លូវ​ថ្មើរជើង តាម​បណ្ដោយ​ឆ្នេរ​ប្រវែង ៩,៣២ គីឡូម៉ែត្រ សាងសង់​បន្ទប់ទឹក​សាធារណៈ ចំនួន ១១ កន្លែង រៀបចំ​កន្លែង​អង្គុយ​កំសាន្ត​សាធារណៈ និង​ស្ដារ​អូរ​ប្រឡាយ​ផង​ដែរ ។

ដោយឡែក គម្រោង​បាន​សាងសង់​ស្ថានីយ​ប្រព្រឹត្ត​កម្ម​ទី​១ និង​ទី​២ ក្នុង​គោលបំណង ដើម្បី​បន្សុទ្ធ​ទឹក​កខ្វក់ ទឹក​ស្អុយ ឱ្យ​ក្លាយជា​ទឹក​មាន​សុវត្ថិភាព ស្រប​តាម​ស្តង់ដា​បរិស្ថាន មុន​នឹង​បញ្ចេញ​ចោល​ទៅ​ក្នុង​សមុទ្រ ដោយ​ប្រើ​ប​ចេ្ច​ក​វិទ្យា​ចុង​ក្រោយ MABR មក​ពី​ប្រទេស​អ៊ី​ស្រា​អែ​ល ដែល​ត្រូវ​បាន​ទទួលស្គាល់​ថា ជា​បច្ចេកវិទ្យា​ដែល​មាន​ស្ថិរភាព ប្រសិទ្ធភាព​ខ្ពស់ សន្សំ​សំចៃ​ថាមពល គ្មាន​សំឡេង​រំខាន និង​គ្មាន​ក្លិន ប៉ះពាល់​ដល់​អ្នក​រស់នៅ​ជុំវិញ ដោយ​ក្នុង​នោះ ៖ ស្ថានីយ​ប្រព្រឹត្តិកម្ម​ទឹក​កខ្វក់​ទី​១ មាន​សមត្ថភាព​ប្រព្រឹត្តិកម្ម ទឹក​កខ្វក់ ក្នុង​បរិមាណ ៥,២០០ ម៉ែត្រគូប ក្នុង​មួយ​ថ្ងៃ ទទួល​រងទឹក​កខ្វក់​ពី​តំបន់​ទី​៣ ដែល​មាន​ផ្ទៃដី ៣៦៤​ហិ​កតា ស្ថិត​ក្នុង​សង្កាត់​លេខ​៣ ។
ស្ថានីយ​ប្រព្រឹត្តិកម្ម​ទឹក​កខ្វក់ ទី​២ មាន​សមត្ថភាព​ប្រព្រឹត្តិកម្ម​ទឹក​កខ្វក់ ក្នុង​បរិមាណ​៧,២០០ ម៉ែត្រគូប ក្នុង​មួយ​ថ្ងៃ ទទួល​រងទឹក​កខ្វក់​ពី​តំបន់​ទី​៤ ដែល​មាន​ផ្ទៃដី ៤៨៦​ហិ​កតា ស្ថិត​ក្នុង​សង្កាត់​លេខ​៣ ។

ចំណែកឯ​ស្ថានីយ​ប្រព្រឹត្តិកម្ម​ទឹក​កខ្វក់ ទី​៣ កំពុង​ដំណើរការ​សាងសង់ មាន​សមត្ថភាព​ប្រព្រឹត្តិកម្ម​ទឹក​កខ្វក់​ក្នុង​បរិមាណ ២០,០០០​ម៉ែត្រគូប ក្នុង​មួយ​ថ្ងៃ ទទួល​រងទឹក​កខ្វក់​ពី តំបន់​ទី​៥ និង​តំបន់​ទី​៦ ដែល​មាន​ផ្ទៃដី ២,៦៩០​ហិ​កតា ស្ថិត​ក្នុង​សង្កាត់​លេខ​៤ ដែល​សាងសង់​ដោយ ក្រុមហ៊ុន XWATER TECHNOLOGY CO.,LTD ។

ហេដ្ឋារចនាសម្ព័ន្ធ​ទាំងអស់​ដែល​បាន​ស្ថាបនា​រួច​ខាងលើ បាន​ចំណាយ​ថវិកា​សរុប​ប្រមាណ ៣២៤,០៧៩,៩៦៤ ដុល្លារ​សហរដ្ឋអាមេរិក ក្នុង​នោះ​ថវិកា​របស់​រាជរដ្ឋាភិបាល​ចំនួន ៣១០,៤៦៦,២៧៦ ដុល្លារ​អា​មេ​រិ​ក រួម​ជាមួយនឹង​ថវិកា​ពី​សប្បុរ​ជន​ក្នុងស្រុក​មួយ​ចំនួន​ផ្សេង​ទៀត​ផង​ដែរ ។

សមិទ្ធផល​ទាំងនេះ​នឹង​ចូលរួម សម្រួល​លំហូរ​ចរាចរណ៍ ទាក់ទាញ​ទេសចរណ៍​ជាតិ និង​អន្តរជាតិ បង្កើត​ការងារ​ធ្វើ បង្កើន​ប្រាក់​ចំណូល ដល់​ពលរដ្ឋ កាត់​បន្ថយ​ការ​ធ្វើ​ចំណាកស្រុក ធ្វើ​ឱ្យ​ប្រជាជន​មាន​ជីវភាព​ល្អ​ប្រសើរ​មាន​សុខដុម​ក្នុង​សង្គម ៕

Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture