ខេត្តព្រៃវែង ៖ ប្រជាពលរដ្ឋរាប់រយគ្រួសារនៅឃុំអ្នកលឿង ស្រុកពាមរក៍ ខេត្តព្រៃវែង បានអះអាងថា ពួកគាត់មិនព្រមនោះទេ ដែលក្រុមអ្នកធ្វើផ្លូវជាតិលេខ៣១០ របស់មន្ទីរសាធារណៈការ និងដឹកជញ្ជូនខេត្តព្រៃវែង បានយកគ្រឿងចក្រមកកាយជាប្រឡាយមុខផ្ទះពួកគាត់ ហើយតម្រូវអោយពួកគាត់ចេញលុយថ្លៃទិញលូ និងដាក់លូ១កង់៨ម៉ឺនរៀលជាកំហិត ។
ពលរដ្ឋទាំងនោះបាននិយាយថា ការធ្វើលូមុខផ្ទះពួកគាត់នេះ ពួកគាត់មិនជំទាស់នោះទេ ប៉ុន្តែមុនពេលធ្វើ គួរណាស់គេប្រាប់ទៅអាជ្ញាធរភូមិ-ឃុំ ហើយអោយខាងអាជ្ញាធរហៅប្រជាពលរដ្ឋទៅប្រជុំផ្សព្វផ្សាយ និងពិគ្រោះតម្លៃជាមុនសិន ។ តែនេះអាជ្ញាធរក៏មិនដឹង ពលរដ្ឋក៏មិនដឹង សុខៗស្រាប់តែដាក់គ្រឿងចក្រមកជីកជាប្រឡាយមុខផ្ទះអ្នកស្រុក រួចតម្រូវអោយម្ចាស់ផ្ទះចេញលុយថ្លៃទិញលូនិងដាក់លូ១កង់៨ម៉ឺនរៀល ផ្ទះខ្លះសរុបទៅអស់៨០ម៉ឺនរៀល ផ្ទះខ្លះដីធំអស់ជាង១លានរៀល គឺវាថ្លៃខ្លាំងណាស់ សម័យកូវីដនេះពួកគាត់រកអីមិនបានផង ជីវភាពកំពុងតែពិបាកខ្លាំង ឥឡូវមកអោយចេញថ្លៃលូរាប់សែនរាប់លានបែបនេះទៀត ពួកគាត់គ្មានលុយទេ។
ដោយឡែក ខាងអាជ្ញាធរឃុំអ្នកលឿងបានអោយដឹងដែរថា ចំពោះការដាក់ប្រពន្ធ័លូតាមបណ្តោយផ្លូវជាតិលេខ៣១០នេះ គឺគេធ្វើអោយតែបាន គ្មានស្តង់ដារ គ្មានគុណភាពអ្វីទេ លូមុខកាត់៦តឹក គេយកមកដាក់ទុលគ្នា រួចយកការ៉ុងគ្របពីលើ ហើយលុបដីយកតែម្តង អត់បូកផ្ជិតមុខតំណ ខាងក្រោមលូអត់មានចាក់ឡប់ឡែ ហើយក៏គ្មានថ្លឹងនីវ៉ូទឹកអ្វីដែរ ហើយសំខាន់ដាក់លូហើយមិនដឹងបង្ហូរទឹកទៅណា គ្មានប្រភពច្បាស់លាស់ គឺធ្វើអោយតែបាន ហើយជាក់ស្តែងពេលនេះ ត្រង់ទីតាំងដែលជីករួចហើយ ផ្ទះខ្លះមានលុយគេក៏ព្រមដាក់លូទៅព្រោះមិនចង់ពិបាកផ្លូវចេញចូលផ្ទះ តែផ្ទះខ្លះអត់មានលុយបង្ខំចិត្តដាក់លូតែ១កង់គ្រាន់ជិះម៉ូតូចេញចូលបាន នៅសល់ប៉ុន្មានចំហរចោល និងផ្ទះខ្លះម្ចាស់មិននៅ គឺចំហរចោលទាំងអស់ ហើយបើបែបនេះ មិនយូរប៉ុន្មានត្រង់ទីតាំងដែលចំហរចោលនោះ មិនត្រឹមតែបាក់ដីចូលធ្វើអោយស្ទះលូនោះទេ គឺថែមទាំងអាចបង្កអោយមានគ្រោះថ្នាក់ជាយថាហេតុផ្សេងៗទៀតផង ជាពិសេសក្មេងៗតូចៗ គឺអាចធ្លាក់ចូលប្រឡាយនោះលង់ទឹកស្លាប់ជាមិនខាន។
លោក ភោគ ផានី មេឃុំអ្នកលឿង បានអោយដឹងកាលពីរសៀលថ្ងៃទី១ ធ្នូ ថា ចំពោះរឿងកាយប្រឡាយដាក់លូ ធ្វើអោយប្រជាពលរដ្ឋក្តៅក្រហាយនេះ លោកបានបញ្ជាអោយមេភូមិនិងក្រុមប្រឹក្សាឃុំចុះទៅឃាត់គ្រឿងចក្រ លែងអោយជីកកាយទៀតហើយ និងបានទាក់ទងសួរទៅខាងមន្ទីរសាធារណៈការខេត្តព្រៃវែងដែរ ប៉ុន្តែលោកប្រធានមន្ទីរបានឆ្លើយថា រឿងជីកប្រឡាយដាក់លូនេះ ប្រជាពលរដ្ឋចង់ដាក់ឬមិនដាក់ស្រេចតែចិត្ត គេមិនបង្ខំទេ ប៉ុន្តែរឿងជីកប្រឡាយគេនៅតែជីក។
លោកមេឃុំបានបញ្ជាក់ទៀតថា ដោយខាងមន្ទីរគេឆ្លើយបែបនេះ ទើបលោកបានរាយការណ៍ទៅលោកស្រីអភិបាលស្រុក និងប្រធានក្រុមការងារចុះជួយស្រុកពាមរក៍ ដើម្បីអោយជួយរកដំណោះស្រាយ ចៀសវាងអភិវឌ្ឍន៍លើទឹកភ្នែករាស្ត្រ ។
ជុំវិញរឿងរ៉ាវខាងលើនេះ ត្រូវបានលោក អ៊ុន សុធា ប្រធានមន្ទីរសាធារណៈការ និងដឹកជញ្ជូនខេត្តព្រៃវែង បកស្រាយប្រាប់ថា ខាងមន្ទីរធ្វើតែផ្លូវលេខ៣១០ប៉ុណ្ណោះ ក្នុងគំរោងធ្វើផ្លូវនេះ អត់មានធ្វើប្រពន្ធ័លូអមសងខាងផ្លូវនោះទេ ចំណែកក្រុមអ្នកជីកប្រឡាយដាក់លូនោះ គឺជាក្រុមហ៊ុនឯកជនទេ ប៉ុន្តែរឿងជីកប្រឡាយដាក់លូនេះ គេជីកប្រឡាយរួចហើយ បើម្ចាស់ផ្ទះចង់ដាក់លូរឺមិនដាក់ស្រេចនៅលើម្ចាស់ផ្ទះ គេមិនបង្ខំយើងទេ ហើយបើថា លូដែលគេដាក់អោយនោះមានតម្លៃថ្លៃ ពលរដ្ឋអាចទៅទិញលូយកមកដាក់ខ្លួនឯងក៏បាន គេមិនហាមឃាត់នោះទេ។
ចែករំលែកព័តមាននេះ