ADផ្ទាំងផ្សព្វផ្សាយពាណិជ្ជកម្ម

Picture

លោក ជា សុផារ៉ា ដឹកនាំកិច្ចប្រជុំបន្ទាន់ ដើម្បីចាត់​វិធានការទប់ស្កាត់ និងបង្ក្រាបបន្ទាន់នូវការកា.ប់​ព្រៃលិចទឹក និងទន្ទ្រានដីបឹងទន្លេសាប

6 ខែ មុន
  • ភ្នំពេញ

ភ្នំពេញ​៖ នៅ​ព្រលប់​ថ្ងៃអាទិត្យ ទី​២៨ ខែវិច្ឆិកា ឆ្នាំ​២០២១ លោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី នគរូបនីយកម្ម…

ភ្នំពេញ​៖ នៅ​ព្រលប់​ថ្ងៃអាទិត្យ ទី​២៨ ខែវិច្ឆិកា ឆ្នាំ​២០២១ លោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់ ដែលជា​ប្រធាន​គណៈកម្មការ​សូ​រិ​យោ​ដី ថ្នាក់ជាតិ បាន​ដឹកនាំ​កិច្ចប្រជុំ ស្តីពី វិធានការ​ទប់ស្កាត់ និង​បង្ក្រាប​ជាបន្ទាន់​នូវ​ការកាប់​ព្រៃ​លិច​ទឹក និង​ការទន្ទ្រាន​ដី​បឹង​ទន្លេសាប​។​

​កិច្ចប្រជុំ​នេះ ធ្វើឡើង​នៅ​ទីស្តីការក្រសួង​រៀបចំ​ដែនដី នគរូបនីយកម្ម និង​សំណង់ ដោយមាន​ការអញ្ជើញ​ចូលរួម​ពី​រដ្ឋមន្ត្រី​ពាក់ព័ន្ធ រួមមាន​៖ លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក សាយ សំ​អាល់ រដ្ឋមន្ត្រី​ក្រសួងបរិស្ថាន លោក​ទេសរដ្ឋមន្ត្រី ឱម យ៉ិនទៀង ប្រធាន​អង្គភាព​ប្រឆាំង​អំពើពុករលួយ លោកនាយ​ឧ​ត្ត​ម​សេនីយ៍ សៅ សុខា អគ្គមេបញ្ជាការ​រង​ក​ង​យោធពលខេមរភូមិន្ទ និង​មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស ដែល​ទទួលបន្ទុក​បង្ក្រាប​បទល្មើស​ព្រៃឈើ លោកនាយ​ឧ​ត្ត​ម​សេនីយ៍ នេ​ត សាវឿន អគ្គស្នងការ​នគរបាល​ជាតិ រួមទាំង​ថ្នាក់ដឹកនាំ​ពាក់ព័ន្ធ​ជាច្រើន​ទៀត​។ កិច្ចប្រជុំ ក៏បាន​ភ្ជាប់​តាម​ប្រព័ន្ធ​វិ​ដេ​អូ ទៅកាន់​អភិបាលខេត្ត​ទាំងអស់ ដែល​នៅជាប់​បឹង​ទន្លេសាប រួមទាំង​ស្ថាប័ន​អង្គភាព​ពាក់ព័ន្ធ​ជាច្រើន​ទៀត​។​

​យ៉ាងណាក៏ដោយ ខ្លឹមសារ​នៃ​កិច្ចប្រជុំ​បន្ទាន់ ដែល​ដឹកនាំ​ដោយ​លោក​ជា​សុផារ៉ា​នេះ មិនទាន់​ប្រកាស​ឲ្យ​ដឹង​នៅឡើយ​ទេ​។​

​សូម​រម្លឹកថា នៅ​រសៀល​ថ្ងៃអាទិត្យ ទី​២៨ ខែវិច្ឆិកា ឆ្នាំ​២០២១ សម្តេច​តេ​ជោ ហ៊ុន សែន បានចេញ​សារ​ជា​សំឡេង ចេញ​បទបញ្ជា​ឲ្យ​អភិបាលខេត្ត​ជាប់​បឹង​ទន្លេសាប  រួមទាំង​គណៈកម្មការ​សូ​រិ​យោ​ដី​ថ្នាក់ជាតិ ដឹកនាំ​ដោយ​លោក​ឧបនាយករដ្ឋមន្ត្រី ជា សុផារ៉ា អង្គភាព​ប្រឆាំង​អំពើពុករលួយ និង​ស្ថាប័ន​ពាក់ព័ន្ធ​ថ្នាក់ជាតិ​ដទៃទៀត ត្រូវធ្វើ​សកម្មភាព​ជាបន្ទាន់ ដើម្បី​ទប់ស្កាត់​ការកាប់​រាន​ព្រៃ​លិច​ទឹក ដើម្បី​យក​ដី​ធ្វើ​កម្មសិទ្ធិ នៅ​តំបន់​បឹង​ទន្លេសាប​។

​ចំពោះមុខ សម្តេច​តេ​ជោ ហ៊ុន សែន ក៏បាន​បញ្ជា​ឲ្យ​ដកហូត​នូវ​ដីព្រៃ​លិច​ទឹក នៅ​បឹង​ទន្លេសាប ដែល​អតីត​អភិបាលខេត្ត​កំពង់ឆ្នាំង រំលោភ​យក​ជាង ២០០០​ហិកតា ផងដែរ​។​

​បន្ថែម​លើ​បទបញ្ជា​ឲ្យ​អភិបាលខេត្ត​ជាប់​បឹង​ទន្លេសាប និង​អាជ្ញាធរ​សមត្ថកិច្ច​ពាក់​ព័ន្ធ ត្រូវ​ចាត់វិធានការ​ជាបន្ទាន់ ដើម្បី​ទប់ស្កាត់​បទល្មើស​កាប់​រា​ន​ដីព្រៃ​លិច​ទឹក នៅ​តំបន់​បឹង​ទន្លេសាប សម្តេច​តេ​ជោ នាយករដ្ឋមន្ត្រី ហ៊ុន សែន ក៏បាន​ប្រកាស​ព្រមាន​ឲ្យ​មន្ត្រី​ខិលខូច​ទាំងអស់ ចេញ​សារភាព​ជាបន្ទាន់ បើ​មិន​ដូច្នោះ​ទេ មន្ត្រី និង​អ្នកពាក់ព័ន្ធ​ទាំងនោះ នឹងត្រូវ​ដកហូត រឹបអូស​ទ្រព្យ ព្រមទាំង​ចាប់ខ្លួន បើសិនជា​ពាក់ព័ន្ធ​នឹង​បទល្មើស កាប់​រាន​ព្រៃ យក​ដី​តំបន់​លិច​ទឹក​បឹង​ទន្លេសាប ធ្វើ​កម្មសិទ្ធិ​៕​

Picture
Picture
Picture
Picture