ជនសង្ស័យ២នាក់ត្រូវបានកម្លាំងនគរបាលខណ្ឌមានជ័យ ធ្វើការឃាត់ខ្លួន បន្ទាប់ពីកម្លាំងសមត្ថកិច្ចកំពុងតែល្បាត ហើយមានការសង្ស័យក៏សុំធ្វើការឆែកឆេរ និងសាកសួរនាំ ទើបដឹងថា
រាជធានីភ្នំពេញ ៖ ជនសង្ស័យ២នាក់ត្រូវបានកម្លាំងនគរបាលខណ្ឌមានជ័យ ធ្វើការឃាត់ខ្លួន បន្ទាប់ពីកម្លាំងសមត្ថកិច្ចកំពុងតែល្បាត ហើយមានការសង្ស័យក៏សុំធ្វើការឆែកឆេរ និងសាកសួរនាំ ទើបដឹងថា ពួកគេមានការពាក់ព័ន្ធនឹងការលួចផ្លាកលេខរថយន្តជាច្រើនបន្ទះ ។ ការឃាត់ខ្លួននេះ ធ្វើឡើងកាលពីវេលាម៉ោង៣ទៀបភ្លឺ ថ្ងៃទី២៦ ខែវិច្ឆិកា ឆ្នាំ២០២១ នៅចំណុចមាត់ប្រឡាយទឹកស្អុយ ផ្លូវបេតុង ស្ថិតក្នុងភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
ជនសង្ស័យទាំង២នាក់ខាងលើ មានម្នាក់ឈ្មោះ វ៉ង់ ខណ្ឌដែន ភេទប្រុស អាយុ៣៦ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវលំ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ និងម្នាក់ទៀតមានឈ្មោះ សុខ រ៉ា ហៅណូ ភេទប្រុស អាយុ៣៥ឆ្នាំ មុខរបរមិនពិតប្រាកដ ស្នាក់នៅផ្ទះគ្មានលេខ ផ្លូវលំ សង្កាត់ដង្កោ ខណ្ឌដង្កោ ។
តាមប្រភពពីមន្ត្រីសមត្ថកិច្ច អោយដឹងថា មុនឈានដល់ការឃាត់ខ្លួន គឺដំបូងឡើយ កម្លាំងសមត្ថកិច្ចផ្នែកអន្តរាគមន៍ នៃអធិការដ្ឋាននគរបាលខណ្ឌមានជ័យ បានពង្រាយកម្លាំងចេញល្បាតពួនស្ទាក់តាមបណ្តាភូមិសាស្ត្រស្មុគស្មាញសំខាន់ៗក្នុងមូលដ្ឋានរបស់ខ្លួន ដើម្បីការពារសន្តិសុខសុវត្ថិភាពជូនពលរដ្ឋ ។ ខណៈពេលកម្លាំងល្បាតដល់ចំណុចខាងលើ ក៏ប្រទះឃើញជនសង្ស័យទាំង២នាក់អង្គុយក្នុងរថយន្តកាមរីហាយប្រ៊ីតមួយគ្រឿង ពណ៌ស ពាក់ផ្លាកលេខ ស្វាយរៀង 2A-1908 មើលទៅគួរអោយមានការសង្ស័យ សមត្ថកិច្ចក៏សុំធ្វើការសហការដើម្បីសួរនាំ និងឆែកឆេររថយន្តនោះ ស្រាប់តែពេលឆែកឆេរក៏ប្រទះឃើញមានស្លាកលេខរថយន្តជាច្រើនបន្ទះក្នុងរថយន្តរបស់ជនសង្ស័យ ក៏ធ្វើការនាំខ្លួនយកទៅកាន់ប៉ុស្តិ៍រដ្ឋបាលនគរបាលស្ទឹងមានជ័យ១ ដើម្បីសាកសួរនាំតែម្តង ។
ក្រោយការសាកសួរនាំរួចមក ទើបបែកធ្លាយថា ពួកគេទាំង២នាក់ គឺជាក្រុមចោរយ៉ាងសកម្ម ខាងដើរដោះផ្លាកលេខរថយន្ត សមត្ថកិច្ចក៏សម្រេចធ្វើការឃាត់ខ្លួន ដើម្បីបន្តនីតិវិធីតែម្តងទៅ ។
នៅក្នុងការឃាត់ខ្លួនពួកគេទាំង២នាក់ខាងលើនេះ សមត្ថកិច្ចដកហូតបាន ៖ រថយន្តម៉ាកកាមរី ពណ៌ស ពាក់ផ្លាកលេខ ស្វាយរៀង 2A-1908, អាវដៃវែង ពណ៌ទឹកប៊ិច មានសក្តិ, មានសញ្ញាស៊ីង អ.ហ ចំនួន០២, មានឡូហ្គោអក្សរកងរាជអាវុធហត្ថចំនួន០១, ទូរស័ព្ទដៃចាស់ ០១គ្រឿង ពណ៌ខ្មៅ, កាបូបស្ពាយ ពណ៌លឿង ចំនួន០១, ប័ណ្ណសម្គាល់យានយន្តចំនួន០២សន្លឹក និងទុលឡឺវីសចំនួន០២ និងផ្លាកលេខរថយន្តចំនួន០៨បន្ទះ ដែលនៅសេសសល់ពីការលួចបាន ក្នុងនោះរួមមាន ៖ ផ្លាកលេខ ភ្នំពេញ 2BK-1605 ចំនួន០២បន្ទះ, ភ្នំពេញ 2AB-6722 ចំនួន០២បន្ទះ, ភ្នំពេញ 2BI-5845 ចំនួន០១បន្ទះ, ភ្នំពេញ 2AI-6108 ចំនួន០១បន្ទះ និងនគរបាល 2-1452 ចំនួន០២បន្ទះ) ផងដែរ ។
យ៉ាងណាមិញ បច្ចុប្បន្នពួកគេទាំង២នាក់ខាងលើ ត្រូវបានឃុំខ្លួនបណ្តោះអាសន្ននៅប៉ុស្តិ៍រដ្ឋបាល នគរបាលស្ទឹងមានជ័យទី១ ដើម្បីរង់ចាំកសាងសំណុំរឿងបញ្ជូនទៅតុលាការចាត់ការទៅតាមនីតិវិធីច្បាប់នៅពេលក្រោយ ៕
ចែករំលែកព័តមាននេះ