ខេត្តកំពង់ធំ៖ ពលរដ្ឋ បានដង្ហើយរកអាជ្ញាធរឃុំ ស្រុក ក្រុង និងមន្ទីរជំនាញ ឱ្យជួយមើលផ្លូវ ចាក់កៅស៊ូមួយខ្សែ ដែលឆ្លងកាត់ភូមិកំពង់ក្របៅ ក្នុងសង្កាត់កំពង់ក្របៅ ក្រុងស្ទឹងសែន រហូតទៅដល់ភូមិព្រៃគុយ ភូមិបិណ្ឌដី ក្នុងឃុំព្រៃគុយ ស្រុកកំពង់ស្វាយ ខេត្តកំពង់ធំ ដែលកំពុងរងការខូចខាតយ៉ាងដំណំ ក្នុងរយៈពេលដ៏ខ្លី នៅឆ្នាំ២០២១នេះ។
វិនាសកម្មនេះ ដោយសារតែរថយន្តធំៗ សម្រុកដឹកដី ចាក់ដីឡូត៍ពុះលក់ និងសាងសង់ជាផ្ទះល្វែង សម្រាប់លក់ ដោយគ្មានការទប់ស្កាត់ ឬក៏វិធានការផ្លូវច្បាប់ណាមួយ ពីអាជ្ញាធរ និងខាងមន្ត្រីជំនាញពាក់ព័ន្ធនោះឡើយ។ គឺបណ្តែតបណ្តោយឲ្យក្រុមឈ្មួញ ធ្វើអាជីវកម្ម ដឹកដីលក់យ៉ាងអនាធិបតេយ្យ ដែលជាហេតុបណ្តាលឲ្យហេដ្ឋារចនាសម្ព័ន្ធ ត្រូវបានបំផ្លិចបំផ្លាញ ស្ទើរខ្ទេចខ្ទី គ្មានសល់ ក្នុងឆ្នាំ២០២១នេះ។
ពលរដ្ឋបានដាក់ការសង្ស័យថា ទង្វើខាងលើនេះ អាចធ្វើទៅបាន គឺជាការឃុបឃិតគ្នា ជាចង្កោមរវាងក្រុមឈ្មួញ ដែលមានគ្រឿងចក្រ និងរថយន្តដឹកដីជាមួយនឹងអាជ្ញាធរ ព្រមទាំងខាងមន្ទីរជំនាញផងដែរ ទើបមិនមានការទប់ស្កាត់អ្វីបន្តិចសោះយ៉ាងដូច្នេះ។
ពាក់ព័ន្ធបញ្ហាខាងលើនេះ លោក ជឿន សុខុន មេឃុំព្រៃគុយ បានឲ្យដឹងតាមទូរស័ព្ទ នៅព្រឹកថ្ងៃទី២៦ ខែវិច្ឆិកា ឆ្នាំ២០២១ ថា ផ្លូវកៅស៊ូ ក្នុងឃុំរបស់លោក ត្រូវខូចខាតយ៉ាងដំណំ នៅក្នុងឆ្នាំនេះ គឺដោយសារតែរថយន្តដឹកដីធ្វើអាជីវកម្ម មានបីបួនក្រុមហ៊ុនឯណោះ ដែលសំរុកដឹកដីចាក់ឡូត៍ពុះលក់។
លោកមេឃុំ បញ្ជាក់ថា ខាងអាជ្ញាធរឃុំ បានឲ្យខាងក្រុមហ៊ុនដឹកដី ជួសជុលផ្លូវឲ្យវិញដែរ ក៏ប៉ុន្តែគេបានតែចាក់ដីគ្រួសក្រហម បំពេញជង្ហុគឲ្យស្រួលឡានគេបើកបរតែប៉ុណ្ណោះ នៅពេលត្រូវភ្លៀងខ្ចាយដីអស់ទៅក្លាយជាថ្លុកក្របីអស់ដដែល។ គេមិនបានជួសជុល ដោយចាក់កៅស៊ូឲ្យវិញនោះទេ ហើយអាជ្ញាធរឃុំ ក៏ពុំមានសិទ្ធិអ្វីឲ្យលើសពីនេះដែរ។
ចំណែកលោក អ៊ុន បុត្ត អភិបាលស្រុកកំពង់ស្វាយ ប្រាប់ថា ចំពោះផ្លូវខាងលើនេះ ពាក់ព័ន្ធនឹងមន្ទីរអភិវឌ្ឍន៍ជនបទ ពីព្រោះការធ្វើ និងការជួសជុល ស្ថិតនៅក្នុងគម្រោងរបស់មន្ទីរ។ សូមសួរទៅខាងមន្ទីរវិញចុះ។
លោក មុំ ចែម ប្រធានមន្ទីរអភិវឌ្ឍន៍ជនបទ មានប្រសាសន៍ថា រឿងផ្លូវមួយកំណាត់ ដែលខូចខាតខាងលើនេះ សូមបងប្អូនប្រជាពលរដ្ឋជ្រាបថា ប្រហែលជា ១សប្តាហ៍ទៀត គេជួសជុលហើយ បច្ចុប្បន្នខាងមន្ទីររបស់លោក កំពុងតែសម្រុកគៀរ និងកិនបង្ហាប់ចាប់ពីចំណុចផ្លូវបំបែកពីភូមិអាត់ស៊ូ មកហើយ មិនយូរនោះទេ នឹងធ្វើមកដល់ឃុំព្រៃគុយហើយ។
ចំណែកផ្លូវក្នុងភូមិកំពង់ក្របៅ សង្កាត់កំពង់ក្របៅវិញ លោក ជូ កុល្លា ប្រធានមន្ទីរសាធារណការ និងដឹកជញ្ជូន ខេត្តកំពង់ធំ មានប្រសាសន៍ថា ផ្លូវមួយកំណាត់ ដែលរងការខូចខាតខាងលើ ក្រុងបានលើកគម្រោងជួសជុលរួចហើយ ដោយខាងមន្ទីររបស់លោក ជួយខាងគ្រឿងចក្រ ចំណែកថវិកា ជាចំណែករបស់សង្កាត់។ លោកថា មួយរយៈនេះ គ្រឿងចក្រ កំពុងតែជាប់រវល់មមាញឹកសម្រុកទៅជួសជុលផ្លូវ ដែលទឹកហូរដាច់នៅក្នុងឃុំក្រយា ស្រុកសន្ទុកមួយរយៈសិន ប្រហែលជាក្នុងខែធ្នូ (ខែ១២) ទើបអាចដកមកជួយជួសជុលផ្លូវខាងលើនេះបាន៕
ចែករំលែកព័តមាននេះ