បុរសម្នាក់ដែលបង្កើតអាខោនហ្វេសប៊ុកជួសជុល និងលក់ទូរស័ព្ទបង់រំលស់ ហើយពេលដែលនារីជាកម្មការិនីរោងចក្រម្នាក់ឆាតទៅដើម្បីរកទិញទូរស័ព្ទបង់រំលស់ ជននេះក៏បានលួងលោមសុំស្នេហ៍ធ្វើឲ្យនាងជឿជាក់ រហូតយល់ព្រមប្រគល់
រាជធានីភ្នំពេញ ៖ បុរសម្នាក់ដែលបង្កើតអាខោនហ្វេសប៊ុកជួសជុល និងលក់ទូរស័ព្ទបង់រំលស់ ហើយពេលដែលនារីជាកម្មការិនីរោងចក្រម្នាក់ឆាតទៅដើម្បីរកទិញទូរស័ព្ទបង់រំលស់ ជននេះក៏បានលួងលោមសុំស្នេហ៍ធ្វើឲ្យនាងជឿជាក់ រហូតយល់ព្រមប្រគល់ខ្លួនប្រាណឲ្យថែមទៀតផង។ ក្រោយមកជនសង្ស័យរូបនេះក៏បានណាត់ជួបនាងដើរលេងជាថ្មី ដោយឲ្យនាងជិះម៉ូតូទៅយកខ្លួន រួចប្រើល្បិចធ្វើជាជ្រុះមួកសុវត្ថិភាព ហើយប្រើឲ្យនាងចុះរើស បន្ទាប់មកជននេះ ក៏ជិះម៉ូតូនាងគេចខ្លួនតែម្តង ប៉ុន្តែសំណាងអាក្រក់ ក៏ត្រូវកម្លាំងនគរបាលខណ្ឌដង្កោស្ទាក់ចាប់បាន។ ហេតុការណ៍នេះបានកើតឡើង កាលពីវេលាម៉ោង១០និង៣០នាទីយប់ ថ្ងៃទី២៥ ខែវិច្ឆិកា ឆ្នាំ២០២១ នៅតាមបណ្ដោយផ្លូវលេខ១០៤ ស្ថិតក្នុងសង្កាត់ទៀន ខណ្ឌដង្កោ រាជធានីភ្នំពេញ។
ជនសង្ស័យខាងលើនោះ មានឈ្មោះ សំណាង ហៅរតនា អាយុ៣៥ឆ្នាំ មុខរបរមិនពិតប្រាកដ ស្នាក់នៅផ្ទះជួល ស្ថិតក្នុងភូមិព្រៃព្រីង សង្កាត់ចោចៅ ខណ្ឌពោធិ៍សែនជ័យ (ជនសង្ស័យគ្មានសារធាតុ.ញៀន)។ ចំណែកកម្មការិនីរងគ្រោះអាយុ២២ឆ្នាំ ស្នាក់នៅផ្ទះជួល ផ្លូវវ៉េងស្រេង ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ។
បើតាមនគរបាលខណ្ឌដង្កោ បានប្រាប់ឲ្យដឹងថា កាលពីវេលាម៉ោង៦ល្ងាច ថ្ងៃទី២៣ ខែវិច្ឆិកា ឆ្នាំ២០២១ នារីរងគ្រោះបានឆាតទៅសួរជនសង្ស័យដើម្បីរកទិញទូរស័ព្ទ១គ្រឿងបង់រំលោះ ដើម្បីយកទៅប្រើប្រាស់។ ភ្លាមៗនោះ ជនសង្ស័យក៏បានឆាតតបមកវិញ ហើយភាគីទាំង២ក៏បានឆាតនិយាយគ្នាពីនេះពីនោះជាហូរហែ លុះក្រោយមកជនសង្ស័យបានប្រាប់នារីកម្មការិនីថា «ខ្លួនស្រលាញ់ពេញចិត្តនាងខ្លាំងណាស់ និងចង់យកនាងធ្វើជាប្រពន្ធ ដូច្នេះមិនចាំបាច់បង់រំលោះអីទេ ដោយរូបគេឲ្យទូរស័ព្ទ១គ្រឿងទៅនាង ដើម្បីយកទៅប្រើប្រាស់តែម្ដង ពុំចាំបាច់អស់លុយទិញឡើយ»។
ប្រភពដដែលបានបន្តថា លុះដល់វេលាម៉ោង៧យប់ ថ្ងៃទី២៤ ខែវិច្ឆិកា ឆ្នាំ២០២១ ជនសង្ស័យបានឆាតសុំណាត់ជួបនារីរងគ្រោះនៅផ្ទះជួល ពេលនោះនាងក៏បានយល់ព្រម ហើយជនស្ស័យក៏បានជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1AR-8526 ទៅដឹកនាងចេញពីផ្ទះជួលទៅដើរលេងនៅខាងក្រោយសណ្ឋាគារសុខា ស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។ គ្រានោះ ជនសង្ស័យបាននិយាយលួងលោមនារីរងគ្រោះសព្វបែបយ៉ាង និងបានប្រាប់នាងថា «ខ្លួនស្រលាញ់នាង ហើយយកធ្វើជាប្រពន្ធពិតប្រាកដស្របច្បាប់»។
នគរបាលដដែលបានប្រាប់ឲ្យដឹងបន្តទៀតថា អ្នកទាំង២បាននាំគ្នាដើរលេងរហូតដល់វេលាម៉ោង១០និង៣០នាទីយប់ ថ្ងៃខែឆ្នាំដដែល ទើបនាំគ្នាដេកនៅផ្ទះសំណាក់យីហោ «មេដៃមាស» ដែលមានទីតាំងស្ថិតនៅម្តុំជិតផ្សារស៊ិនជូរីផ្លាស្សា ក្នុងសង្កាត់កាកាបទី១ ខណ្ឌពោធិ៍សែនជ័យ ។ អ្នកទាំង២បានដេកជាមួយគ្នាពេញ១យប់ ហើយបានរួមមេត្រីចំនួន២លើក រហូតព្រឹកឡើងទើបជនសង្ស័យដឹកនារីរងគ្រោះទៅកាន់ផ្ទះជួលវិញ។
នគរបាលបន្តទៀតថា បន្ទាប់មក នៅវេលាម៉ោង៦ល្ងាច ថ្ងៃទី២៥ ខែវិច្ឆិកា ឆ្នាំ២០២១ ជនសង្ស័យបានទូរស័ព្ទឲ្យនារីរងគ្រោះជិះម៉ូតូទៅយកខ្លួននៅម្តុំខាងកើតស្ពានអាកាសរវង្វង់មូលចោមចៅ ស្ថិតនៅសង្កាត់ចោមចៅទី៣ ខណ្ឌពោធិ៍សែនជ័យ។ ពេលនោះនាងក៏បានជិះម៉ូតូរបស់ខ្លួនម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២១ ពាក់ស្លាកលេខស្វាយរៀង 1R-1484 ទៅឌុបជនរូបនោះ ហើយពេលទៅដល់ ជនសង្ស័យខាងលើក៏បានឲ្យនារីរងគ្រោះអង្គុយខាងក្រោយ ចំណែកខ្លួនជាអ្នកឌុប។
ប្រភពដដែលបានប្រាប់ទៀតថា ក្រោយមកជនសង្ស័យបានឌុបនារីរងគ្រោះទៅលេងសួនច្បារតាមមាត់ទន្លេ ស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រហូតដល់វេលាម៉ោង៩និង៣០នាទីយប់ ថ្ងៃខែឆ្នាំដដែល ទើបដឹកនារីរងគ្រោះត្រឡប់មកវិញ។ ដោយបានប្រាប់នាងថា «បងនាំអូនទៅជួបជាមួយនឹងឪពុកម្តាយរបស់បង» រួចក៏បានធ្វើដំណើរទៅតាមផ្លូវបេតុង៦០ម៉ែត្រ ក្នុងទិសដៅពីកើតទៅលិចរហូតដល់ភូមិទឹកថ្លា សង្កាត់ក្រាំងពង្រ ខណ្ឌដង្កោ ជនសង្ស័យក៏ប្រើល្បិចធ្វើជាធ្លាក់មួកសុវត្ថិភាព ។
ប្រភពដដែលបន្តទៀតថា បន្ទាប់មក ជនសង្ស័យក៏បានប្រើល្បិចឱ្យនារីរងគ្រោះចុះទៅរើសមួកសុវត្ថិភាព ហើយនៅពេលដែលនារីរងគ្រោះដើរទៅរើសមួកនោះ ជនសង្ស័យរូបនោះក៏បានជិះម៉ូតូរបស់នាងរត់គេចខ្លួនតែម្តង។
នគរបាលរូបនេះបាននិយាយថា ពេលនោះដែរ នារីរងគ្រោះក៏បានស្រែកឆោឡោឲ្យអ្នកភូមិជួយ ស្របពេលកម្លាំងនគរបាលកំពុងតែល្បាតនៅជិតនោះផង ក៏បានជួយអន្តរាគមន៍ដេញតាមជនសង្ស័យរហូតដល់ចំណុចសាលាបឋមសិក្សាទៀន ស្ថិតនៅក្នុងសង្កាត់ទៀន ខណ្ឌដង្កោ ចម្ងាយ៣គីឡូម៉ែត្រពីកន្លែងកើតហេតុ ទើបឃាត់ខ្លួនជនសង្ស័យបាន បន្ទាប់មកក៏បាននាំខ្លួនជនសង្ស័យយកទៅសាកសួរ និងកសាងសំណុំរឿង ដើម្បីចាត់ការតាមច្បាប់តែម្តង៕
ចែករំលែកព័តមាននេះ