ខេត្តសៀមរាប ៖ តាមសេចក្តីប្រកាសព័ត៌មានរបស់គ្រឹះស្ថានអង្គរ ដែលជាស្ថាប័នគ្របគ្រងការលក់សំបុត្ររបស់រដ្ឋ បានឱ្យដឹងថា នៅខែមេសា ឆ្នាំ២០១៦នេះ ចំណូលដែលបានមកពីការលក់សំបុត្រឱ្យភ្ញៀវទេសចរបរទេសសរុបមានចំនួន ៤.១៤៨.៥៦០ដុល្លារ ថយចុះ៣,៧៦%ភាគរយ បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៥ ។
នៅក្នុងអំឡុងខែមេសា ឆ្នាំ២០១៦ ស្ថិតិភ្ញៀវទេសចរបរទេសដែលបានទិញសំបុត្រចូលទស្សនាប្រាសាទអង្គរវត្តមានចំនួន១៤៦.១៩៦នាក់ គឺថយចុះ៤,៨០%ភាគរយ បើប្រៀបធៀបនឹងខែមេសា ឆ្នាំ២០១៥ ។
បើតាមការសរុបស្ថិតិភ្ញៀវទេសចរបរទេស ដែលបានទិញសំបុត្រចូលទស្សនាប្រាសាទអង្គរវត្តក្នុងរយៈពេល៤ខែ ដើមឆ្នាំ២០១៦ នេះវិញ មានសរុបចំនួន ៨៤៧.៥៥៤នាក់។ រីឯចំណូលរយៈពេល៤ខែនេះ មានចំនួន ២៤.៥០០.១៦០ដុល្លារ ។ រាជរដ្ឋាភិបាល បានដកសិទ្ធិគ្រប់គ្រងការលក់សំបុត្រចូលទស្សនាប្រាសាទអង្គរពីក្រុមហ៊ុនសុខាអូតែលមកគ្រប់គ្រងខ្លួនឯងវិញចាប់តាំងពីខែមករា ឆ្នាំ២០១៦មក ក្រោយពីមានការចោទប្រកាន់នានាពីមហាជន ជាពិសេសពីគណបក្សប្រឆាំងថា ការប្រមូលចំណូលពីការលក់សំបុត្រចូលទស្សនាប្រាសាទអង្គរ គ្មានតម្លាភាព ។
សូមរំលឹកផងដែរថា ក្នុងអំឡុងឆ្នាំ២០១៥ ភ្ញៀវទេសចរបរទេសទិញសំបុត្រចូលទស្សនារមណីយដ្ឋានអង្គរមានចំនួនជាង២លាននាក់ ហើយចំនួននេះកើនឡើងជិត២% បើប្រៀបធៀបទៅនឹងឆ្នាំ២០១៤។ ចំណែកចំណូលពីការលក់សំបុត្រវិញបានចំនួន ៦០.០៥៣.៧០០ដុល្លារ ៕
ចែករំលែកព័តមាននេះ