ព្រះពុទ្ធបដិមា៣អង្គ នៅរួតបាកាណ ប្រាសាទអង្គរវត្ត នឹងត្រូវជួសជុលឡើងវិញ
- សៀមរាប
ខេត្តសៀមរាប ៖ អាជ្ញាធរជាតិអប្សរា សហការជាមួយវិស័យឯកជន បានប្រារព្ធពិធីក្រុងពលីបួងសួងទៅតាមប្រពៃណី ព្រះពុទ្ធ
ខេត្តសៀមរាប ៖ អាជ្ញាធរជាតិអប្សរា សហការជាមួយវិស័យឯកជន បានប្រារព្ធពិធីក្រុងពលីបួងសួងទៅតាមប្រពៃណី ព្រះពុទ្ធសាសនា កាលពីថ្ងៃទី១៩ ខែវិច្ឆិកា ឆ្នាំ២០២១ ដើម្បីធ្វើការជួសជុលព្រះពុទ្ធបដិមាចំនួន៣អង្គនៅរួតបាកាណ ប្រាសាទអង្គរវត្ត ដែលរងការខូចខាតទ្រុឌទ្រោម ដោយសារកត្តាធម្មជាតិ ។
លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានឱ្យដឹងថា ព្រះពុទ្ធបដិមាចំនួន៣អង្គនៅរួតបាកាណ នៃប្រាសាទអង្គរវត្តនេះ បានខូចខាតទ្រុឌទ្រោម ដោយសារកត្តាធម្មជាតិ ក្នុងនោះទីកន្លែងខ្លះមានជ្រាបទឹក និងទឹកហូរច្រោះ ដោយសារទឹកនោម និងលាមកសត្វប្រចៀវ ធ្វើឱ្យព្រះពុទ្ធបដិមាពុកផុយ ទើបត្រូវធ្វើការជួសជុលឡើងវិញ បន្ទាប់ពីអាជ្ញាធរជាតិអប្សរា បានទទួលការឧបត្ថម្ភថវិកាសម្រាប់ជួសជុលពីលោកជំទាវឧកញ៉ា នាង វិសាខា អគ្គមហាឧបាសិកា ពុទ្ធសាសនូបត្ថម្ភ និងលោកជំទាវឧកញ៉ាមហាឧបាសិកាកិតិ្តបណ្ឌិត សៀង ចាន់ហេង ។
លោកបានបន្តថា ក្រៅពីព្រះពុទ្ធបដិមានេះ អាជ្ញាធរក៏នឹងជួសជុលស៊ុមទ្រ ស៊ុមបង្អួច វត្ថុសិល្បៈផ្សេងៗ ដែលនៅក្នុងបរិវេណរួតបាកាណនេះមួយចំនួនផងដែរ ដោយដំណើរការជួសជុលគ្រោងចំណាយពេលវេលាប្រមាណ៥ខែ ទើបរួចរាល់។
សូមជម្រាបជូនថា បរិវេណរួតបាកាណ ជាទីសក្ការ:របស់ប្រជាពលរដ្ឋខ្មែរ ដែលតែងតែគោរពបូជា នៅបានពេលមកដល់ប្រាសាទអង្គរវត្ត ហើយក្នុងដំណើរការជួសជុលនេះ មិនប៉ះពាល់ដល់ការទស្សនារបស់ភ្ញៀវទេសចរនោះទេ ដូច្នេះមិនមានការបិទ ឬផ្អាកការឡើងទៅទស្សនា ឬការធ្វើពិធីបួងសួងរបស់ប្រជាពលរដ្ឋឡើយ។
កាលពីខែវិច្ឆិកា ឆ្នាំ២០២០ អ្នកជំនាញអភិរក្សចម្លាក់នៃអាជ្ញាធរជាតិអប្សរា បានជួសជុលរួចរាល់ជាស្ថាពរ នូវព្រះពុទ្ធបដិមាមួយអង្គនៅទិសខាងត្បូងនៃរួតបាកាណ ដែលមានការខូចខាតទ្រុឌទ្រោម៕
ចែករំលែកព័តមាននេះ