ភ្នំពេញ៖ ក្រោយអនុញ្ញាតនូវការចូលរួមក្នុងពិធីមង្គលការ និងពិធីសាសនាផ្សេងៗ ដោយមិនកំណត់ចំនួនមនុស្ស តែត្រូវគោរពហ្មត់ចត់ តាមវិធានការពារសុវត្ថិភាពរួចមក នៅថ្ងៃទី១២ ខែវិច្ឆិកានេះ សម្តេចតេជោ នាយករដ្ឋមន្ត្រី…
ភ្នំពេញ៖ ក្រោយអនុញ្ញាតនូវការចូលរួមក្នុងពិធីមង្គលការ និងពិធីសាសនាផ្សេងៗ ដោយមិនកំណត់ចំនួនមនុស្ស តែត្រូវគោរពហ្មត់ចត់ តាមវិធានការពារសុវត្ថិភាពរួចមក នៅថ្ងៃទី១២ ខែវិច្ឆិកានេះ សម្តេចតេជោ នាយករដ្ឋមន្ត្រី ហ៊ុន សែន បានប្រកាសសម្រេចអនុញ្ញាតឲ្យមានការជួបជុំជាទូទៅផ្សេងទៀត ដើម្បីបំពេញការងារ ឬធ្វើសកម្មភាព និងប្រារព្ធពិធីផ្សេងៗ រួមមាន ការជួបជុំរបស់ប្រជាពលរដ្ឋ យុវជន សិស្ស និងនិស្សិត កម្មករ-និយោជិត ក៏ដូចជាការជួបជុំរបស់មន្ត្រីរាជការ និងកងកម្លាំងប្រដាប់អាវុធ រួមបញ្ចូលទាំងការជួបជុំស្របតាមច្បាប់អនុញ្ញាត ដែលរៀបចំឡើងដោយគណបក្សនយោបាយនានាផងដែរ។
ក្នុងសារជូនបងប្អូនជនរួមជាតិទាំងអស់ នៅយប់ថ្ងៃទី១២ ខែវិច្ឆិកានេះ សម្តេចតេជោ ហ៊ុន សែន លើកឡើងថា «បន្ថែមលើសារសំឡេង ដែលខ្ញុំទើបបានបញ្ចេញមុននេះ ពាក់ព័ន្ធនឹងការអនុញ្ញាតនូវការចូលរួមក្នុងពិធីមង្គលការ និង ពិធីសាសនាផ្សេងៗ ដោយមិនកំណត់ចំនួនមនុស្ស តែត្រូវគោរពហ្មត់ចត់តាមវិធានការពារសុវត្ថិភាព ស្របតាមការកំណត់របស់ក្រសួងសុខាភិបាល និងអាជ្ញាធរមានសមត្ថកិច្ចពាក់ព័ន្ធ ដើម្បីបង្ការនូវការឆ្លងរាលដាលនៃជម្ងឺកូវីដ-១៩, ខ្ញុំសូមបញ្ជាក់បន្ថែមថា ការជួបជុំដោយមិនកំណត់ចំនួនមនុស្សចូលរួម តែត្រូវគោរពតាមវិធានសុខាភិបាល ដើម្បីការពារសុវត្ថិភាពពីការឆ្លងរាលដាលនៃជំងឺកូវីដ-១៩ នេះ ក៏ត្រូវបានអនុញ្ញាតដូចគ្នាដែរ សម្រាប់ការជួបជុំជាទូទៅផ្សេងទៀត ដើម្បីបំពេញការងារ ឬធ្វើសកម្មភាព និងប្រារព្ធពិធីផ្សេងៗ រួមមាន ការជួបជុំរបស់ប្រជាពលរដ្ឋ, យុវជន សិស្ស និង និស្សិត, កម្មករ-និយោជិត, ក៏ដូចជាការជួបជុំរបស់មន្ត្រីរាជការ និង កងកម្លាំងប្រដាប់អាវុធ រួមបញ្ចូលទាំងការជួបជុំស្របតាមច្បាប់អនុញ្ញាត ដែលរៀបចំឡើងដោយគណបក្សនយោបាយនានាផងដែរ»៕
ចែករំលែកព័តមាននេះ