រាជធានីភ្នំពេញ ៖ បុរសជនជាតិស្បែកខ្មៅម្នាក់ ខណៈបើករថយន្តដឹកស្រីស្នេហ៍ជាជនជាតិខ្មែរទៅទិញទំនិញនៅផ្សារទំនើប ក៏ត្រូវរថយន្តមួយគ្រឿងទៀតបើកចេញពីផ្សារដូចគ្នាជ្រុលទៅប៉ះក្រពិតកាង ធ្វើឱ្យជនជាតិស្បែកខ្មៅខឹង ចុះវាយអ្នកបើកដែលជាជនជាតិស្បែក.សដួលផ្ងារក្រោយ បង្កឱ្យមានការភ្ញាក់ផ្អើលកាលពីវេលាម៉ោង៧ និង៥៥នាទីយប់ថ្ងៃទី៧ មេសា ២០១៦ ស្ថិតនៅតាមបណ្តោយផ្លូវ៤៨៨ ត្រង់ចំណុចមុខផ្សារទំនើបលក់ទំនិញគ្រប់មុខមួយកន្លែង ក្នុងសង្កាត់ផ្សារដើមថ្កូវ ខណ្ឌចំការមន។
រថយន្តម៉ាកហាយឡិនឌ័រ ពណ៌ទឹកប្រាក់ ពាក់ស្លាកលេខភ្នំពេញ2T-2975 ជិះគ្នា២នាក់ ប្រុសម្នាក់ជាជនជាតិស្បែកខ្មៅ ដឹកស្រីស្នេហ៍ជាជនជាតិខ្មែរ ក្នុងគោលបំណងចូលផ្សារទិញទំនិញ ។ ចំណែករថយន្តមួយគ្រឿងទៀតម៉ាក 4RANER ពណ៌.ស ពាក់ស្លាកលេខភ្នំពេញ ២A-2728 បើកបរដោយបុរសជនជាតិស្បែក.ស ដឹកក្មេងប្រុស-ស្រី២នាក់ ចេញពីផ្សារទិញទំនិញ ដើម្បីត្រឡប់ទៅផ្ទះវិញ ។
ប្រភពឱ្យដឹងថា មុនពេលកើតហេតុ ជនជាតិស្បែក.សខណៈបើករថយន្តចេញ ស្រាប់តែមានរថយន្តរបស់ជនជាតិស្បែកខ្មៅធ្វើដំណើរពីលិច ទៅកើតបត់ឆ្វេងចូលផ្សារ ក៏ត្រូវរបស់ជនជាតិស្បែក.សបើកកៀរប៉ះធ្វើឱ្យក្រពិតកាង ។ ភ្លាមៗនោះ ជនជាតិស្បែកខ្មៅបានចុះពីលើរថយន្ត ហើយហៅបុរសជនជាតិស្បែក.សចេញមក ក៏ត្រូវជនជាតិស្បែកខ្មៅដាល់មួយដៃដួលផ្ងារក្រោយ ។ តែមិនមានរបួសធ្ងន់ធ្ងរទេ ធ្វើឱ្យជនជាតិស្បែក.សភ័យរត់ចូលផ្សារ ចំណែកជនជាតិស្បែកខ្មៅនៅនិយាយផ្អើលពេញមុខផ្សារ ។
ក្រោយកើតហេតុ សមត្ថកិច្ចចុះមកដល់ធ្វើការសម្របសម្រួល ទើបភាគីទាំង២មិនបានប្តឹងប្តល់ទេ បានបើករថយន្តចេញទៅផ្ទះវិញរៀងខ្លួន ៕
ចែករំលែកព័តមាននេះ