លំនៅឋានចំនួន៥ខ្នង នៅភូមិ៣ សង្កាត់លេខ១ ក្រុងព្រះសីហនុ កាលពីវេលាម៉ោងប្រមាណ៩និង៣០នាទីព្រឹកថ្ងៃទី៣១ ខែតុលា ឆ្នាំ២០២១ បានត្រូវអគ្គិភ័យលេបត្របាក់អស់ទាំងស្រុង
ខេត្តព្រះសីហនុ ៖ លំនៅឋានចំនួន៥ខ្នង នៅភូមិ៣ សង្កាត់លេខ១ ក្រុងព្រះសីហនុ កាលពីវេលាម៉ោងប្រមាណ៩និង៣០នាទីព្រឹកថ្ងៃទី៣១ ខែតុលា ឆ្នាំ២០២១ បានត្រូវអគ្គិភ័យលេបត្របាក់អស់ទាំងស្រុង ។ នេះបើយោងតាមការឲ្យដឹងពីលោក សន កុសល អភិបាលរងក្រុង ព្រះសីហនុ និងជាប្រធានក្រុមការងារថ្នាក់ក្រុង ចុះជួយសង្កាត់លេខ១ ។
ក្នុងការផ្តល់ព័ត៌មានបណ្តាញព័ត៌មាន លោក សន កុសល បានឲ្យដឹងថា ផ្ទះទាំង៥ខ្នងដែលរងគ្រោះដោយអគ្គិភ័យនេះ មានម្ចាស់៖
១-ឈ្មោះ វួន ទូច ភេទប្រុស អាយុ៥៥ឆ្នាំ
២-ឈ្មោះ ម៉ៅ ប៉ិន ភេទប្រុស អាយុ៤១ឆ្នាំ
៣-ឈ្មោះ រំដួល ដេន ភេទប្រុស អាយុ៥៨ឆ្នាំ
៤-ឈ្មោះ ផាន់ វេន ភេទប្រុស អាយុ៧១ឆ្នាំ
៥-ឈ្មោះ ម៉ុស នេ ភេទប្រុស អាយុ៣០ឆ្នាំ ។
តាមព័ត៌មានជំហានដំបូង ការកើតមានអគ្គិភ័យនេះគឺបណ្តាលមកពីឆ្លងចរន្តអគ្គិសនី ហើយក្នុងការធ្វើអន្តរាគមន៍ពន្លត់ភ្លើងនេះ សមត្ថកិច្ចបានប្រើប្រាស់រថយន្តរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន២គ្រឿង ប្រើទឹកអស់៤រថយន្ត របស់អង្គភាព«ង៧០»ចំនួន២គ្រឿង ប្រើទឹកអស់ចំនួន៣រថយន្ត ។
លោក សន កុសល បានស្នើឱ្យបងប្អូនប្រជាពលរដ្ឋដែលជួបគ្រោះអគ្គិភ័យទាំងអស់សូមពង្រឹងស្មារតី ព្រោះកម្លាំងអាជ្ញាធរក៏បាននិងកំពុងជួយដោះស្រាយការលំបាកចំពោះមុខ ។
លោកបានបន្ថែមថា ចំពោះសម្ភារដូចជា ការធ្វើសៀវភៅគ្រួសារ អត្តសញ្ញាណប័ណ្ណផ្សេងៗ លោកនឹងឲ្យសមត្ថកិច្ចប៉ុស្តិ៍ស្រង់ឈ្មោះឲ្យបានច្បាស់លាស់ ដើម្បីធ្វើជូនបងប្អូនប្រជាពលរដ្ឋវិញ ។
ជាមួយនេះ លោកក៏បានផ្តាំផ្ញើឲ្យបងប្អូនរងគ្រោះដោយអគ្គិភ័យទាំងអស់ ត្រូវតាំងស្មារតីកសាងគ្រួសារឡើងវិញ និងមានការប្រុងប្រយ័ត្នកុំធ្វេសប្រហែសក្នុងការប្រើប្រាស់ចរន្តអគ្គិសនីដែលមិនមានលក្ខណៈបច្ចេកទេសត្រឹមត្រូវ អាចបង្កឱ្យមានករណីគ្រោះអគ្គិភ័យដូចនៅថ្ងៃនេះជាដើម ។
ដោយមានអន្តរាគមន៍ពីរថយន្តពន្លត់អគ្គិភ័យ ភ្លើងក៏បានរលត់ទាំងស្រុងទៅវិញនាវេលាម៉ោងប្រមាណ១១ព្រឹក ។ ភ្លាមៗនោះដែរ លោកប្រធានក្រុមការងារចុះជួយសង្កាត់លេខ១ បានជួយឧបត្ថម្ភក្នុងមួយគ្រួសារ១៥ម៉ឺនរៀល និងលោក ឈិត សុផាត ចៅសង្កាត់លេខ១ បានជួយឧបត្ថម្ភក្នុងមួយគ្រួសារ១០ម៉ឺនរៀល ដើម្បីជួយសម្រាលការលំបាកជាបណ្តោះអាសន្ន ៕
ចែករំលែកព័តមាននេះ