ប្រទេសកូរ៉េខាងត្បូង ៖ តាមទីភ្នាក់ងារព័ត៌មានកូរ៉េខាងត្បូង YONHAP ថា លោករ៉ូតេវ៉ូ អតីតឧត្ដមសេនីយ៍ក្លាយជាប្រធានាធិបតីកូរ៉េខាងត្បូង ជាអ្នកដើរតួនាទីសំខាន់ ក្នុងរដ្ឋប្រហារឆ្នាំ១៩៧៩ មុនពេលឈ្នះ ក្នុងការបោះឆ្នោតប្រធានាធិបតី ជាការចាប់ផ្ដើមនៃលទ្ធិប្រជាធិបតេយ្យរបស់ប្រទេស បានទទួលមរណភាពហើយ កាលពីថ្ងៃទី២៦ ខែតុលា ឆ្នាំ២០២១ នៅក្នុងមន្ទីរពេទ្យសាកលវិទ្យាល័យជាតិ ក្រុងសេអ៊ូល ក្នុងជន្មាយុ៨៨ឆ្នាំ ដោយសារជំងឺរ៉ាំរ៉ៃនានា។
លោករ៉ូតេវ៉ូ ជាប្រធានាធិបតីពីឆ្នាំ១៩៨៨ដល់ឆ្នាំ១៩៩៣ ទទួលការវះកាត់មហារីកប្រូស្តាត កាលពីឆ្នាំ២០០២ និងចាប់តាំងពីពេលនោះមក លោកទទួលការព្យាបាលជាប់រដឹក ក្រោយពីសុខភាពរបស់លោកចេះតែធ្លាក់ដុនដាបទៅ។ លោកបានចូលមន្ទីរពេទ្យនាពេលថ្មីៗនេះទៀត តែមិនអាចស្ដារបាន។
ប្រធានមន្ទីរពេទ្យសាកលវិទ្យាល័យជាតិក្រុងសេអ៊ូល លោកគីម យ៉ុនស៊ូ បានថ្លែងថា មរណភាពរបស់លោករ៉ូតេវ៉ូ ហាក់មកពីជំងឺរ៉ាំរ៉ៃផ្សេងៗ។ មុននេះគ្រួសារលោកបានចេញផ្សាយជាសាធារណៈ នូវសារចុងក្រោយមួយរបស់លោក ដែលស្នើសុំទោសចំពោះកំហុសឆ្គងទាំងឡាយ ដែលលោកចង់និយាយសំដៅដល់ តួនាទីដែលរងការរិះគន់ខ្លាំងបំផុតរបស់លោក ក្នុងរដ្ឋប្រហារយោធាឆ្នាំ១៩៧៩ និងការបង្រា្កបបង្ហូរឈាមពួកអ្នកតវ៉ាស្និទ្ធប្រជាធិបតេយ្យ ក្នុងទីក្រុង GWANGJU នាឆ្នាំបន្ទាប់ពីរដ្ឋប្រហារ។
ក្នុងសារនោះ លោកសរសេរថា ខ្ញុំខំធ្វើតាមអ្វីដែលខ្ញុំអាចធ្វើទៅបាននាពេលនេះ ហើយខ្ញុំសុំទោសចំពោះបណ្ដាកំហុសឆ្គងរបស់ខ្ញុំ។ ក្នុងសារនោះលោករ៉ូតេវ៉ូក៏ប្រាថ្នាផងដែរ ឲ្យមនុស្សជំនាន់ក្រោយ ខំធ្វើអាចសម្រេចបាន ការបង្រួបបង្រួមជាតិ ជាទិសដៅមួយដែលលោកមិនអាចធ្វើឲ្យសម្រេច។
លោករ៉ូតេវ៉ូ ជាអ្នកបើកផ្លូវទៅរកទំនាក់ទំំនងជាមួយបណ្ដាប្រទេសកុំមុយនីស្ត ពិសេសរុស្ស៊ី និងចិន។ លោកបានភ្ជាប់ទំនាក់ទំនងការទួតជាមួយរុស្ស៊ី ក្នុងឆ្នាំ១៩៩៩០ និងជាមួយចិនក្នុងឆ្នាំំ១៩៩២។ ទំនាក់ទំនងអន្តរកូរ៉េក៏មានការកែលម្អ ជាមួយការចរចាអន្តរកូរ៉េដំបូងកម្រិតខ្ពស់ នាខែកញ្ញា ឆ្នាំ១៩៨៩ និងអនុម័តក្នុងឆ្នាំ១៩៩១ កិច្ចព្រមព្រៀងដែលផ្អែកលើមូលដ្ឋាននៃការមិនឈ្លានពានគ្នា។ ក្នុងឆ្នាំ១៩៩៧ តុលាការកំពូលរបស់ប្រទេស បានកាត់ទោសលោកដាក់ពន្ធនាគារ១៧ឆ្នាំ និងពិន័យជាប្រាក់២២៣លានដុល្លារ ពីបទបង្កើតការបះបោរយោធាចុងឆ្នាំ១៩៨០ និងពីបទបង្ក្រាបដ៏សាហាវពួកបាតុករស្និទ្ធប្រជាធិបតេយ្យ៕ ដកស្រង់ចេញពីវេបសាយ ៖ yna
ចែករំលែកព័តមាននេះ