ភ្នំពេញ៖ វឌ្ឍនភាពនៃការងារបង្កបង្កើនផលដំណាំកសិកម្មរដូវវស្សា ឆ្នាំ២០២១ និងផលប៉ះពាល់ដោយគ្រោះធម្មជាតិ គិតមកទល់ថ្ងៃទី២៥ ខែតុលា ឆ្នាំ២០២១ ត្រូវបានលោក វេង សាខុន…
ភ្នំពេញ៖ វឌ្ឍនភាពនៃការងារបង្កបង្កើនផលដំណាំកសិកម្មរដូវវស្សា ឆ្នាំ២០២១ និងផលប៉ះពាល់ដោយគ្រោះធម្មជាតិ គិតមកទល់ថ្ងៃទី២៥ ខែតុលា ឆ្នាំ២០២១ ត្រូវបានលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ផ្សព្វផ្សាយ នៅថ្ងៃទី២៦ ខែតុលាថា ដំណាំស្រូវ ដំណាំសាកវប្បកម្ម និងដំណាំឧស្សាហកម្ម បានរងផលប៉ះពាល់ដោយគ្រោះទឹកជំនន់ សរុបចំនួន ៨៦៩០៩ហិចតា។ ក្នុងនោះ ខូចខាត ចំនួន ៤៦១១៩ហិចតា។
របាយការណ៍ដដែល បង្ហាញថា ការងារបង្កបង្កើនផលដំណាំស្រូវ គឺផ្ទៃដីដាំដុះអនុវត្តបានចំនួន ២ ៩០១ ៦០៥ហិចតា ស្មើនឹង ១១១,២១% នៃផែនការចំនួន ២ ៦០៩ ០៦៥ ហ.ត។ ផ្ទៃដីប្រមូលផល មានចំនួន ៥៨៨ ៤៧៣ ហ.ត ស្មើនឹង ២០,២៨% នៃផ្ទៃដីអនុវត្ត ទិន្នផលជាមធ្យមទទួលបានចំនួន ៤តោន /ហ.ត និងបរិមាណផល មានចំនួន ២ ៣៥៣ ៤៥៨តោន។
រីឯដំណាំសាកវប្បកម្មរយៈពេលខ្លី គឺផ្ទៃដីដាំដុះអនុវត្តបានចំនួន ៥៩ ៨៤០ ហ.ត ស្មើនឹង ១០៨,៨៧% នៃផែនការចំនួន ៥៤ ៩៦៦ ហ.ត។ រីឯដំណាំឧស្សាហកម្មរយៈពេលខ្លី គឺផ្ទៃដីដាំដុះ អនុវត្តបានចំនួន ៧៨២ ៩៦២ ហ.ត ស្មើនឹង ៩៥,៥៣% នៃផែនការចំនួន ៨១៩ ៦២៩ហ.ត។
ផលប៉ះពាល់ដោយគ្រោះធម្មជាតិ ក៏ត្រូវបានលើកឡើងក្នុងរបាយការណ៍ថា ការងារបង្កបង្កើនផលកសិកម្មរដូវវស្សា ជួបប្រទះនឹងផលប៉ះពាល់ដោយគ្រោះធម្មជាតិ រួមមាន៖ ផ្ទៃដីប៉ះពាល់សរុបចំនួន ៣៨៣ ៨៦១ហ.ត។ ផ្ទៃដីខូចខាត សរុបចំនួន ៨០ ១០១ ហ.ត។ ផ្ទៃដីបានស្តារសរុបចំនួន ២៣ ៨៤២ ហ.ត និងផ្ទៃដីខូចខាត ទាំងស្រុង សរុបចំនួន ៣ ០៧៤ហ.ត។
អំពីផលប៉ះពាល់ដំណាំស្រូវ ក៏ត្រូវបានលើកបង្ហាញថា គ្រោះរាំងស្ងួត កើតឡើងលើផ្ទៃដីប៉ះពាល់ ចំនួន ២៤៨ ៥០០ហ.ត។ ក្នុងនោះ ផ្ទៃដីខូចខាត មានចំនួន ៣៤ ៣៧៩ ហ.ត និងផ្ទៃដី បានស្តារ ចំនួន ២៣ ៦២៣ ហ.ត។ រីឯគ្រោះទឹកជំនន់ ប៉ះពាល់ផ្ទៃដីចំនួន ៧៣ ៤១៧ ហ.ត ផ្ទៃដីខូចខាត មានចំនួន ៤០ ៩៧៤ហ.ត។ ផ្ទៃដីស្តារ មានចំនួន ២០៤ហ.ត។
ចំណែកដំណាំសាកវប្បកម្ម រងគ្រោះដោយទឹកជំនន់ មានផ្ទៃដីចំនួន ៦១៤ ហ.ត ហើយផ្ទៃដីខូចខាត មានចំនួន ២០៣ហ.ត។ ចំណែកដំណាំឧស្សាហកម្ម ប៉ះពាល់ដោយគ្រោះរាំងស្ងួត មានចំនួន ៤ ៩៤២ហ.ត ហើយមានផ្ទៃដីខូចខាត ចំនួន ២៧៩ហ.ត។ គ្រោះទឹកជំនន់ មានផ្ទៃដីប៉ះពាល់ ចំនួន ១២ ៨៧៨ ហ.ត និងមានផ្ទៃដីខូចខាតចំនួន ៤ ២៤៩ហ.ត។ សត្វចង្រៃ និងជំងឺ មានផ្ទៃដីប៉ះពាល់ ចំនួន ៣៥១០ ហ.ត ផ្ទៃដីខូចខាត មានចំនួន ១៧ ហ.ត និងផ្ទៃដីបានស្តារមានចំនួន ១៥ហ.ត៕
ចែករំលែកព័តមាននេះ