រាជធានីភ្នំពេញ ៖ បុរសម្នាក់ជិះកង់ហាត់ប្រាណត្រូវរថយន្តមួយគ្រឿងមិនស្គាល់ម៉ាកបុកពីក្រោយបណ្ដាលឲ្យបោកក្បាលស្លាប់នៅនឹងកន្លែង ហើយកង់ជាប់រថយន្តអូសគេចទៅបាត់។ ហេតុការណ៍ខាងលើនេះបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី៣ ខែវិច្ឆិកា ឆ្នាំ២០២៥ នៅតាមបណ្ដោយផ្លូវភ្នំពេញហាណូយ ខាងជើងស្ពានអាកាសផ្សារដីហុយ ក្នុងសង្កាត់ទឹកថ្លា…
រាជធានីភ្នំពេញ ៖ បុរសម្នាក់ជិះកង់ហាត់ប្រាណត្រូវរថយន្តមួយគ្រឿងមិនស្គាល់ម៉ាកបុកពីក្រោយបណ្ដាលឲ្យបោកក្បាលស្លាប់នៅនឹងកន្លែង ហើយកង់ជាប់រថយន្តអូសគេចទៅបាត់។
ហេតុការណ៍ខាងលើនេះបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី៣ ខែវិច្ឆិកា ឆ្នាំ២០២៥ នៅតាមបណ្ដោយផ្លូវភ្នំពេញហាណូយ ខាងជើងស្ពានអាកាសផ្សារដីហុយ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
ជនរងគ្រោះឈ្មោះអៀង ចិន្តា ភេទប្រុស អាយុ៥៤ឆ្នាំ មានលំនៅភូមិដីថ្មី សង្កាត់គោកឃ្លាំង ខណ្ឌសែនសុខ រាជធានីភ្នំពេញ។
តាមប្រភពព័ត៌មានបានឲ្យដឹងថា មុនពេលកើតហេតុ ជនរងគ្រោះបានជិះកង់ហាត់ប្រាណដូចសព្វដង ធ្វើដំណើរតាមផ្លូវភ្នំពេញថ្មីហាណូយ ក្នុងទិសដៅពីជើងទៅត្បូង ។ នៅពេលធ្វើដំណើរមកដល់កន្លែងកើតហេតុជិតដល់ស្ពានអាកាសផ្សារដីហុយស្រាប់តែមានរថយន្តមួយគ្រឿងធ្វើដំណើរស្របគ្នាមកពីក្រោយហើយបុកជនរងគ្រោះពេញទំហឹងបណ្ដាលឲ្យដេកដួលនៅលើថ្នល់បោកក្បាលស្លាប់នៅនឹងកន្លែង ។ បន្ទាប់ពីកើតមានគ្រោះថ្នាក់រថយន្តបានកិនកង់អូសយកទៅជាមួយហើយគេចខ្លួនបាត់បន្សល់ទុកជនរងគ្រោះដេកស្លាប់នៅលើដងផ្លូវ ។ បន្ទាប់ពីកើតមាន គ្រោះថ្នាក់នគរបាលមូលដ្ឋានក៏បានចុះទៅកន្លែងកើតហេតុដើម្បីស្រាវជ្រាវរករថយន្តបង្កនិងទាក់ទងទៅក្រុមគ្រួសារមកទទួលយកសពទៅធ្វើបុណ្យតាមប្រពៃណី ។
តាមព័ត៌បានអោយដឹងថា នៅវេលាព្រឹកនេះដែរ គេប្រទះឃើញកង់ដាច់ជា២ ជ្រុះនៅតាមបណ្ដោយផ្លូវ៣៧១កែងផ្លូវចូលបឹងតាម៉ាត ក្នុងភូមិម័រ សង្កាត់ដង្កោ ខណ្ឌ ដង្កោ រាជធានីភ្នំពេញ ចម្លាយប្រមាណជិត១០គីឡូម៉ែត្រពីកន្លែងកើតហេតុ ។ កង់ដែលប្រទះឃើញត្រូវបានសមត្ថកិច្ចខណ្ឌសែនសុខចុះទៅយក ។
តាមប្រភពព័ត៌មានឱ្យដឹងទៀតថា រថយន្តបង្កជាប្រភេទរថយន្តក្រឡុកស៊ីម៉ង់តិ៍ ។ ទោះបីយ៉ាងណារថយន្តបង្កខាងលើ សមត្ថកិច្ចពុំទាន់រកឃើញនៅឡើយទេ ខណៈកំពុងតែស្រាវជ្រាវបន្ត ៕
ចែករំលែកព័តមាននេះ