រាជធានីភ្នំពេញ ៖ សាលាអន្តរជាតិ ហ្សាម៉ាន់ បានសហការជាមួយវិទ្យាស្ថានសន្ទាមេគង្គកម្ពុជា ជំរុញ និងលើកកម្ពស់នូវតម្លៃភាសា និងវប្បធម៌សិល្បៈ ទំនៀមទម្លាប់ជាសកល ដែលជាស្នាដៃសិស្ស និស្សិត មកពីជុំវិញពិភពលោក ដោយមានការចូលរួមដាក់តាំងពិព័រណ៍បង្ហាញ ចំនួន៣២ប្រទេស ដោយនាំយកឧបករណ៍ដូរតន្ត្រីបុរាណ របាំ សម្លៀកបំពាក់ ម្ហូបអាហារ សម្ភារសិក្សា និងវត្ថុប្រើប្រាស់ផ្សេងៗបង្ហាញជូនទស្សនិកជនក្នុងមហោស្រពភាសា និងវប្បធម៌អន្តរជាតិកាលពីម្សិលមិញនៅអគារកោះពេជ្រ ដើម្បីផ្លាស់ប្តូរចំណេះដឹង បទពិសោធន៍ការយល់ដឹងអំពីសុខដុមនីយកម្មចម្រុះជាតិសាសន៍ឲ្យកាន់តែសំបូរបែប ។
ឧបករណ៍បុរាណ របាំ និងការសម្ដែងសិល្បៈផ្សេងៗបានឆ្លុះបញ្ចាំងពីអត្តសញ្ញាណជាតិប្រទេសនីមួយៗត្រូវបានលើកមកបង្ហាញជូនក្នុងមហោស្រពខាងលើ ក្នុងនោះលោកជំទាវ ម៉ិញ កុសនី រដ្ឋលេខាធិការក្រសួងវប្បធម៌ និងវិចិត្រសិល្បៈ មានប្រសាសន៍ថា ដើម្បីផ្លាស់ប្តូរចំណេះដឹង បទពិសោធន៍ និងការបង្ហាញស្នាដៃ វាជាឱកាសមួយសម្រាប់សិស្ស និស្សិតដែលជាយុវជនជំនាន់ក្រោយ សំដៅលើកស្ទួយវិស័យសិល្បៈវប្បធម៌ និងលើកកម្ពស់ការយល់ដឹងអំពីសុខដុមនីយកម្មចម្រុះ ការយោគយល់គ្នាទៅវិញទៅមក សាមគ្គីភាពជាអន្តរជាតិ ដែលជាមូលដ្ឋានគ្រឹះនៃការកសាងសន្តិភាព និងការអភិវឌ្ឍសង្គមប្រកបដោយសុខដុមភាព។
លោកជំទាវបន្តទៀតថា «ដើម្បីបានផ្លាស់ប្តូរវប្បធម៌គ្នាទៅវិញទៅមក និងការលើកស្ទួយភាពផ្សេងៗគ្នានៃវប្បធម៌ គឺជាកត្តាចាំបាច់ ដើម្បីធានាដល់គោលការណ៍នៃភាពថ្លៃថ្នូរ និងការគោរពវប្បធម៌ផ្សេងៗគ្នាក្នុងភាពសម្បូរបែបនៃវប្បធម៌ ដើម្បីផ្តល់ឱកាសឲ្យមនុស្សគ្រប់រូបក្នុងសង្គមទទួលបានអត្ថប្រយោជន៍ទាំងអស់គ្នា និងរួមរស់ជាមួយគ្នាដោយសន្តិភាព»។
លោកជំទាវបញ្ជាក់ថា «ភាពសម្បូរបែបសម្រាប់យើងគ្រប់គ្នាជាកូនជាចៅជំនាន់ក្រោយក្នុងគោលបំណងបំផុសស្មារតីជាតិទាំងមូលឲ្យចូលរួមជួយថែរក្សាការពារ និងលើកតម្លៃកេរដំណែលវប្បធម៌ ដែលជាដួងព្រលឹង ជាអត្តសញ្ញាណជាតិ ដោយលើកកម្ពស់បនសិការស្រឡាញវប្បធម៌ ប្រពៃណី ទំនៀមទម្លាប់ខ្មែរដ៏ល្អផូរផង់ សីលធម៌សង្គម ក្នុងបុព្វហេតុលើកស្ទួយកិត្យានុភាព និងសេចក្តីថ្លៃថ្នូរជាតិ។ ដូច្នេះទិវាវប្បធម៌នាឆ្នាំនេះ រាជរដ្ឋាភិបាលបានកំណត់យកប្រធានបទ «យុវជនដើម្បីវប្បធម៌ជាតិ» ក្នុងគោល បំណងជំរុញឲ្យយុវជនដែលជាទំពាំងស្នងប្ញស្សី» ៕
ចែករំលែកព័តមាននេះ