រាជធានីភ្នំពេញ ៖ ណាហ្គាវើលបេះដូងសប្បុរសកាលពីថ្ងៃទី១២ មីនា២០១៦បានឧបត្ថមម៉ាស៊ីនដេរដល់អង្គការបណ្តុះបណ្តាលកុមារកំព្រា ជនពិការ និងស្ត្រីក្រីក្រមានទីតាំងក្នុង សង្កាត់ភ្នំពេញថ្មី ក្នុងគោលបំណងធ្វើឲ្យជីវភាពរស់នៅ
រាជធានីភ្នំពេញ ៖ ណាហ្គាវើលបេះដូងសប្បុរសកាលពីថ្ងៃទី១២ មីនា២០១៦បានឧបត្ថមម៉ាស៊ីនដេរដល់អង្គការបណ្តុះបណ្តាលកុមារកំព្រា ជនពិការ និងស្ត្រីក្រីក្រមានទីតាំងក្នុង សង្កាត់ភ្នំពេញថ្មី ក្នុងគោលបំណងធ្វើឲ្យជីវភាពរស់នៅរបស់ពួកគាត់មានភាពប្រសើឡើងដែលបច្ចុប្បន្នអង្គការ មានក្មេងកំព្រា៥៨នាក់ស្នាក់នៅ ។ អង្គការនេះ កំពុងជួបបញ្ហាហិរញ្ញវត្ថុក្នុងការទំនុកបម្រុងដល់កុមារកំព្រាទាំងនេះ ។
លោកJames Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើលបានមានប្រសាសន៍ថា «យើងបានទទួលដំណឹងអំពីស្ថានភាព និងការលំបាកដែលអង្គការនេះប្រឈម ។ ការឧបត្ថម្ភម៉ាស៊ីនដេរ គឺជាផ្នែកមួយនៃការចូលរួមចំណែករបស់យើងដល់អង្គការនេះ ដោយសង្ឃឹមថាស្ត្រីមេម៉ាយនឹងប្រើប្រាស់ម៉ាស៊ីនដេរទាំងនេះដើម្បីបង្កើនប្រាក់ចំណូលរបស់ពួកគេ ដែលអាចជួយកាត់បន្ថយភាពក្រីក្រដែលពួកគេកំពុងជួបប្រទះ។ ក្នុងរយៈពេលប៉ុន្មានឆ្នាំនេះ ណាហ្គាវើលបេះដូងសប្បុរស បានជួយឧបត្ថម្ភដល់អ្នកដែលមានជីវភាពក្រលំបាកនូវសម្ភារៈប្រើប្រាស់ទ្រទ្រង់ការរស់នៅ ជួយឧបត្ថមដល់កុមារកំព្រានូវសម្ភារៈសិក្សា និងជួយដល់វិស័យកីឡា ។ យើងសង្ឃឹមថា ពួកគេនឹងអាចផ្លាស់ប្តូរវាសនារបស់ពួកគេបាន តាមរយៈការខិតខំប្រឹងប្រែងរបស់យើង» ។
លោកបានបន្ថែមថា «ម៉ាស៊ីនដេរ គឺជាឧបករណ៍មួយដ៏សំខាន់ ក្នុងការជួយធ្វើឲ្យជីវភាពរស់នៅរបស់ស្ត្រីមេម៉ាយ អាចបង្កើនប្រភពប្រាក់ចំណូលរបស់ពួកគេបាន ។ យើងសង្ឃឹមយ៉ាងមុតមាំថា ស្ត្រីមេម៉ាយទាំងអស់ ដែលអង្គការបណ្តុះបណ្តាលកុមារកំព្រា ជនពិការ និងស្ត្រីក្របានបង្ហាត់បង្រៀន នឹងអាចបង្កើនប្រាក់ចំណូលរបស់ខ្លួនបាន តាមរយៈជំនាញដែលពួកគេបានហាត់រៀន» ។
អ្នកស្រីប្រាក់ សុខា នាយកប្រតិបត្តិអង្គការបណ្តុះបណ្តាលកុមារកំព្រាជនពិការ និងសក្រីក្របានមានប្រសាសន៍ថា «យើងខ្ញុំសូមថ្លែងអំណរគុណដល់ណាហ្គាវើលបេះដូងសប្បុរសយ៉ាងជ្រាលជ្រៅ ដែលតែងតែបានឧបត្ថម្ភគាំទ្រអង្គការ និងកុមាររបស់យើង ។ កាលពីលើកមុនណាហ្គាវើលបេះដូងសប្បុរស បានឧបត្ថម្ភកាដូបុណ្យណូអែលគ្រឿងឧបភោគបរិភោគ និងសម្ភារផ្ទះបាយដល់អង្គការរបស់យើង ។ ម៉ាស៊ីនដេររបស់យើង ខូចអស់ហើយ និងមិនអាចជួសជុលបានទេ ។ តែសំណាងល្អ ណាហ្គាវើលបេះដូងសប្បុរស បានឧបត្ថម្ភម៉ាស៊ីនដេរដល់យើង ។ នៅក្នុងកម្មវិធីបង្កើនប្រាក់ចំណូលរបស់យើង ម៉ាស៊ីនដេរ ដែលណាហ្គាវើលបេះដូងសប្បុរសបានឧបត្ថម្ភគឺជាទុនដ៏សំខាន់ដែល ជួយលើកម្ពស់សេដ្ឋកិច្ចរបស់ស្ត្រីបានប្រសើរឡើង ដោយផ្តល់ឲ្យពួកគេនូវជំនាញប្រើប្រាស់ម៉ាស៊ីនដេរ និងជំនាញមូលដ្ឋានអាជីវកម្ម។
ស្ត្រីមេម៉ាយម្នាក់ ក្នុងចំណោមស្ត្រីមេម៉ាយទាំងអស់ បានមានប្រសាសន៍ចែករំលែកថា ដោយសារជំនាញដែលគាត់ទទួលបានពីអង្គការបណ្តុះបណ្តាលកុមារកំព្រាជនពិការ និងស្ត្រីក្រីក្រនេះហើយ ទើបគាត់អាចបើកហាងកាត់ដេរមួយ និងអាចផ្គត់ផ្គង់កូន៣នាក់ និងជីវភាពរបស់គ្រួសារគាត់បាន ។
គាត់បន្ថែមថា «ខ្ញុំពិតជាដឹងគុណដល់ណាហ្គាវើលបេះដូងសប្បុរសណាស់ ដែលបានឧបត្ថម្ភម៉ាស៊ីនដេរដល់មជ្ឈមណ្ឌលយើង ។ ម៉ាស៊ីនដេរដែលណាហ្គាវើលឧបត្ថម្ភ និងជំនាញដែលផ្តល់ដោយអង្គការនេះ នឹងផ្លាស់ប្តូរជីវិតរបស់យើងក្នុងពេលអនាគត ។ បទពិសោធន៍របស់ខ្ញុំជាស្ត្រីមេម៉ាយ ធ្វើឲ្យខ្ញុំដឹងពីបញ្ហាគ្រប់បែបយ៉ាងដែលស្ត្រីមេម៉ាយជួបប្រទះ ហើយវាមិនមែនជាការងាយស្រួលនោះទេដែលខ្លួនជាស្ត្រីមេម៉ាយបែបនេះ» ៕
ចែករំលែកព័តមាននេះ