រាជធានីភ្នំពេញ៖ រថយន្តព្រូសមួយគ្រឿង បានក្រឡាប់ច្រងាង កណ្តាលផ្លូវ បន្ទាប់ពីបើករេចង្កូតទៅបុកផ្ទប់នឹងក្បាលនាគពុះចែកទ្រូងផ្លូវ ពេញទំហឹង នៅចំណុចគល់ស្ពានក្រោមដីស្ទឹងមានជ័យ ស្ថិតតាមបណ្តោយផ្លូវលេខ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យ បង្កអោយមានការភ្ញាក់ផ្អើល កាលពីវេលាម៉ោង ១៦ និង៤៥នាទី ល្ងាចថ្ងៃទី១៨ ខែតុលា ឆ្នាំ២០២១។
ប្រភពព័ត៌មាន អោយដឹងថា នៅមុនកើតហេតុ គេសង្គេតឃើញ បង្កម៉ាកតូយូតាព្រូស ពណ៌ស្ករ ពាក់ស្លាកលេខ ភ្នំពេញ 2BB-5406 បើកបរដោយនារីម្នាក់ រួមដំណើរដោយមនុស្សម្នាក់ផ្សេងទៀត ( មិនស្គាល់អត្តសញ្ញាណទាំង ២នាក់ ) ធ្វើដំណើរតាមបណ្តោយផ្លូវលេខ២១៧ ក្នុងទិសដៅពីត្បូងទៅជើង ក្នុងល្បឿនលឿនគួរសម។ ខណៈធ្វើដំណើរដល់ចំណុចកើតហេតុ រថយន្តស្រាប់តែរេចង្កូត ទៅបុកផ្ទប់នឹងក្បាលនាគពុះចែកទ្រូងផ្លូវពេញទំហឹងតែម្តង បណ្តាលអោយរថយន្តក្រឡាប់ ច្រងាងនៅខាងឆ្វេងម្ខាងផ្លូវ បណ្តាលអោយរថយន្តរងការខូចខាតផ្នែកខាងមុខយ៉ាងដំណំ។
ភ្លាមៗ អ្នកបើកបររថយន្ត និងអ្នករួមដំណើរ បានបើកទ្វារចេញពីរថយន្ត ហើយរត់ចេញពីកន្លែងកើតហេតុបាត់ស្រមោល។
បន្ទាប់ពីកើតហេតុ សមត្ថកិច្ចមូលដ្ឋាន សហការជាមួយជំនាញ ចុះអន្តរាគមន៍ធ្វើការវាស់វែង ស្ទួចយករថយន្តបង្កទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយទៅតាមនីតិវិធីច្បាប់នៅពេលក្រោយ៕ លីហេង
ចែករំលែកព័តមាននេះ