ចៅក្រមស៊ើបសួរ សម្រេចឃុំខ្លួន តៃកុងឡាន ករណីបុករះស្លា.ប់ និងរបួស៦នាក់
រាជធានីភ្នំពេញ ៖ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងនៅរសៀលថ្ងៃទី១៨ ខែតុលា ឆ្នាំ២០២១នេះថា…
រាជធានីភ្នំពេញ ៖ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងនៅរសៀលថ្ងៃទី១៨ ខែតុលា ឆ្នាំ២០២១នេះថា សំណុំរឿងអ្នកបើកបរបុករះ បណ្តាលឲ្យស្លាប់ជនរងគ្រោះ ៣នាក់ និងរបួសធ្ងន់ ៣នាក់នោះ ត្រូវបានលោក ឆាយ ហុង ព្រះរាជអាជ្ញារងបានធ្វើការចោទប្រកាន់ជនសង្ស័យជាផ្លូវការហើយ ។
ក្រោយបើកការស៊ើបសួរតំណាងអយ្យការ បានសម្រេចចោទប្រកាន់អ្នកបើកបររូបនោះ ពីបទ.បើកបរដោយធ្វេសប្រហែស ខ្ជីខ្ជា ក្នុងស្ថានភាពស្រវឹង បណ្តាលឲ្យរបួស និងស្លាប់ដល់អ្នកដទៃ ច្រើននាក់ តាមបញ្ញត្តិមាត្រា៨៣ កថាខណ្ឌទី២ ចំណុចខ-គ និងមាត្រា ៨៥ កថាខណ្ឌ ទី២ ចំណុច ខ-គ នៃច្បាប់ស្តីពីចរាចរណ៍ផ្លូវគោក ។
ដោយពេលវេលាល្ងាចផុតម៉ោងរដ្ឋបាល ជនសង្ស័យត្រូវបានផ្ញើទៅសមត្តកិច្ចវិញ នឹងតម្រូវឲ្យព្រឹកស្អែកថ្ងៃទី១៩ ខែតុលា នាំមកប្រគល់ជូនចៅក្រមស៊ើបសួរ ដើម្បីសាកសួរបន្ត នឹងសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
សូមបញ្ជាក់ថា កាលពីរសៀលថ្ងៃទី១៧ ខែតុលា ឆ្នាំ២០២១ កម្លាំងសមត្តកិច្ចនគរបាលការិយាល័យចរាចរណ៍ផ្លូវគោករាជធានីភ្នំពេញ បានបញ្ជូនជនសង្ស័យ ដែលជាតៃកុងរថយន្តបង្កគ្រោះថ្នាក់ចរាចរណ៍ បណ្តាលឲ្យមនុស្ស៣នាក់បានស្លា.ប់ និង៣នាក់ទៀត រងរបួសធ្ងន់ ទៅកាន់សាលាដំបូងរាជធានីភ្នំពេញ ។
សំណុំរឿងនោះកាលពីយប់ថ្ងៃសៅរ៍ទី១៦ ខែតុលា ឆ្នាំ២០២១ មានមនុស្សប្រុសស្រី៣នាក់បានស្លាប់ និង៣នាក់ទៀតរងរបួសធ្ងន់ ហើយត្រូវបានបញ្ជូនទៅសង្គ្រោះនៅឯមន្ទីរពេទ្យភ្លាមៗ បន្ទាប់មកអ្នកបើកបររថយន្តម្នាក់ត្រូវឃាត់ខ្លួន ។ រថយន្តបង្កគ្រោះថ្នាក់ចរាចរណ៍នោះម៉ាកធុនត្រា ពណ៌ខ្មៅ ពាក់ស្លាកលេខ ភ្នំពេញ 2AG-7060 បើកបរក្នុងល្បឿនលឿនដូចហោះ បានរេចង្កូតបុករះ កាលពីវេលាម៉ោងប្រមាណ១០និង៤០នាទីយប់ ថ្ងៃទី១៦ ខែតុលា ឆ្នាំ២០២១ ត្រង់ចំណុចខាងលិចសួនឧស្សាហកម្មកាណាឌីយ៉ា ប្រមាណ៥០ម៉ែត្រតាមបណ្ដោយផ្លូវវេងស្រេង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
អ្នកបើកបរត្រូវបានគេស្គាល់ឈ្មោះ ហៃ វិចិត្រ ភេទប្រុស អាយុ៣៤ ឆ្នាំ មុខរបរ ជាអ្នករកស៊ី នៅស្រុកស្រែអំបិល ខេត្តកោះកុង ។ បើតាមការចោទប្រកាន់បទល្មើសលើជនសង្ស័យ មិនអាចគេចផុតពីការឃុំខ្លួនដាក់ពន្ធនាគារជាបណ្តោះអាសន្ននោះទេ ៕
ចែករំលែកព័តមាននេះ