រាជធានីភ្នំពេញ ៖ មហោស្រពចាប៉ីដងវែងទូទាំងប្រទេសឆ្នាំ២០២១ ដែលរៀបចំដោយក្រសួងវប្បធម៌និងវិចិត្រសិល្បៈបានបិទបញ្ចប់ដោយជោគជ័យកាលពីថ្ងៃទី១៦ ខែតុលា ឆ្នាំ២០១ ខណៈពេលចំណាត់ថ្នាក់លេខ១ បានទៅលើបេក្ខជនមកពីខេត្តបន្ទាយមានជ័យ។
ក្រោយការប្រឡងដែលធ្វើឡើងរយៈពេល៣ថ្ងៃគឺថ្ងៃទី១៥-១៦ ខែតុលា ឆ្នាំ២០២១ ដែលមានការផ្សាយផ្ទាល់នៅលើកផេកហ្វេសប៊ុកផ្លូវការរបស់ក្រសួងវប្បធម៌ និងវិចិត្រសិល្បៈ បេក្ខជន មួល សុដា ជាបេក្ខជនមកពីខេត្តបន្ទាយមានជ័យ ត្រូវបានគណៈកម្មការជ្រើសរើសអោយជាប់ជ័យលាភីលេខ១ ដោយសារលោកមានទេពកោសល្យល្អលើជំនាញចាប៉ីដងវែងនេះ។ សម្រាប់បេកខជនលេខ២ បានទៅលើបេក្ខជនឈ្មោះ សារី សិលា មកពីខេត្តព្រៃវែង និងចំណាត់ថ្នាក់លេខ៣ បានទៅលើបេក្ខជនឈ្មោះរហ័សនាមថា តាពូថៅឆែប មកពីខេត្តពោធិ៍សាត់។
លោក ពេជ្ជ សារ៉ាត ប្រធាន និងជាគ្រូបង្រៀនចាប៉ីដងវែងនៅក្នុងសហគមន៍ចាប៉ីអមតៈ បានលើកឡើងថា ក្នុងនាមអ្នកជំនាញលើចាប៉ីដងវែងម្នាក់ លោកសូមសម្តែងការអបអរសាទរដល់ម្ចាស់ជ័យលាភីទាំងអស់ដែលបានខិតខំប្រឹងប្រែង ហើយលោកក៏សូមលើកទឹកចិត្តដល់អ្នកដែលមិនបានជាប់ សូមអោយខិតខំបន្ត និងកុំបោះបង់ចោលជំនាញចាប៉ីដងវែងនេះ។
លោកបញ្ជាក់ថា ការប្រលងពិតណាស់ ត្រូវតែមានជាប់ និងធ្លាក់ ហើយយើងកុំគិតថា ប្រឡងដឹងតែធ្លាក់ តែត្រូវគិតថា ការចូលរួមប្រឡងគឺជាឱកាសសម្រាប់យើងបញ្ចេញសមត្ថភាព និងបង្ហាញលក្ខណៈនៃការអង្គុយដេញចាប៉ីដងវែងដោយភាពជឿជាក់ និងស្វាហាប់អោយមហាជនបានឃើញ។
លោកបន្ថែមថា សម្រាប់អ្នកជាប់ជ័យលាភី គឺពិតជាសាកសម ព្រោះបេក្ខជនមានបំនិនជីវិតច្បាស់លាស់ និងមានការដាក់អារម្មណ៍ទៅតាមការច្រៀងចម្រៀងចាប៉ី ព្រោះការច្រៀងចាប៉ីដងវែងមិនមែនគ្រាន់តែចេះដេញ ហើយនឹងច្រៀងវាគ្រប់គ្រាន់នោះឡើយ។ យ៉ាងណាលោកមើលឃើញថា បេក្ខជនដែលបានចូលរួមប្រឡងនាពេលនេះ គឺសុទ្ធតែល្អ ប៉ុន្តែការប្រឡងគឺយើងត្រូវស្វែងរកបេក្ខជនដែលខ្លឹម និងល្អផ្តាច់គេ ដើម្បីបានទទួលជ័យលាភីឯក។
បើតាមលោក ពេជ្ជ សារ៉ាត លោកសូមថ្លែងអំណរគុណដល់ថ្នាក់ដឹកនាំ ជាពិសេសក្រសួងវប្បធម៌ដែលបានខិតខំរៀបចំកម្មវិធីនេះឡើងបានយ៉ាងល្អ និងជោគជ័យ បើទោះបីស្ថិតនៅក្នុងបរិបទកូវីដនាពេលនេះក៏ដោយ។ លោកបញ្ជាក់ថា យើងបានអាក់ខាននៃការរៀបចំមហោស្រពចាប៉ីដងវែងនេះ ដោយសារការរីករាលនៃជំងឺកូវីដ១៩ ប៉ុន្តែសម្រាប់ឆ្នាំនេះ យើងបានពុះពារធ្វើឡើង ដែលនោះគឺជាការដាស់ស្មារតីដល់យុវជនខ្មែរជំនាន់ក្រោយ អោយចូលរួមបន្តថែរក្សានូកេរ្តិ៍តំណែលសិល្បៈដូនតាយើងដែលបានបន្សល់ទុកអោយ។ ក្នុងនាមជាប្រធានសមាគមចាប៉ីអមតៈលោក តែងតែចូលរួមជាមួយស្ថាប័នពាក់ព័ន្ធសម្រាប់ការបណ្តុះបណ្តាល និងបំផុសយុវជន កុមារអោយយល់ដឹងពីសិល្បៈចាប៉ីដងវែងនេះ។
គួរបញ្ជាក់ថា មហោស្រពចាប៉ីដងវែងទូទាំងប្រទេសឆ្នាំ២០២១ ក្រោមប្រធានបទ «យុវជនដើម្បីវប្បធម៌ជាតិ» បានធ្វើឡើងរយៈពេល៣ថ្ងៃ ចាប់ពីថ្ងៃទី១៥ ដល់ថ្ងៃ១៧ ខែតុលា ឆ្នាំ២០២១ នៅសាលមហោស្រពនាយកដ្ឋានសិល្បៈទស្សនីយភាព រាជធានីភ្នំពេញ នឹងផ្សាយផ្ទាល់តាមហ្វេសប៊ុកផេកផ្លូវការក្រសួងវប្បធម៌ និងវិចិត្រសិល្បៈ។
យោងមសេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈ ព្រឹត្តិការណ៍មហោស្រពចាប៉ីដងវែងទូទាំងប្រទេសឆ្នាំ២០២១នេះ រៀបចំឡើងក្នុងគោលបំណង ដើម្បីចូលរួមថែរក្សាលើកស្ទួយអភិរក្សតម្លៃសិល្បៈវប្បធម៌ប្រពៃណីជាតិ អត្តសញ្ញាណជាតិ សំដៅរួមចំណែកអភិវឌ្ឍសង្គម និងលើកកម្ពស់កិត្យានុភាពជាតិ ជាពិសេសចាប៉ីដងវែង ដែលបានបញ្ចូលជាសម្បត្តិបេតិកភណ្ឌវប្បធម៌អរូបីរបស់អង្គការយូណេស្កូកន្លងមក។
ចែករំលែកព័តមាននេះ