ថ្មីៗនេះ លោកកឹម សុខា ប្រធានស្តីទីគណបក្សសង្គ្រោះជាតិ បានរងព្យុះបោកបក់ទាក់ទងនឹងស្នេហាលួចលាក់របស់លោក ជាមួយស្រីក្មេងម្នាក់ ។ សារព័ត៌មានក្នុងស្រុក បានសរសេរមួយរឿងហើយមួយរឿងទៀត អំពីរឿងរ៉ាវស្នេហាលួចលាក់របស់លោក ។ តើរឿងអាស្រូវផ្លូវភេទនេះ អាចបំផ្លាញជីវិតនយោបាយរបស់លោកដែរឬទេ ?
បទពិសោធន៍នយោបាយបានបង្ហាញថា រឿងអាស្រូវស្នេហាលួចលាក់ អាចនាំដល់ការបាត់បង់ប្រជាប្រិយភាព ផ្នែកនយោបាយហើយមានអ្នកនយោបាយតិចតួចណាស់ ដែលមានរឿងអាស្រូវស្នេហា អាចឈរជើងនៅនឹងក្នុងសង្វៀននយោបាយដ៏ប្រកួត
ប្រជែង។
សម្តេចក្រុមព្រះ នរោត្តម រណប្ញទ្ធិ បានធ្វើឱ្យជីវិតនយោបាយរបស់ព្រះអង្គធ្លាក់ចុះ នៅពេលដែលព្រះអង្គ មានស្នេហាជាមួយនឹងអ៊ុក ផល្លា អតីតអ្នករបាំ អំឡុងពេលដែលព្រះអង្គ មានមហេសីទៅហើយ គឺម្ចាស់ក្សត្រី នរោត្តម ម៉ារី រណប្ញទ្ធិ ។ ព្យុះរិះគន់បានបោកបក់មកលើព្រះអង្គយ៉ាងសាហាវ ដែលទីបំផុត ព្រះអង្គត្រូវបានបណ្តេញចេញពីគណបក្សហ៊្វុនស៊ិនប៉ិច ហើយបង្កើតគណបក្ស នរោត្តមរណប្ញទ្ធិ ដែលទទួលបានតែ២អាសន:ប៉ុណ្ណោះ នៅក្នុងការបោះឆ្នោតកាលពីឆ្នាំ២០០៨ ។ រឿងរ៉ាវស្នេហារបស់ទ្រង់ជា រងើកភ្លើងមួយដែលដុតឱ្យឆេះខ្ទេចទំនាក់ទំនងគណបក្សហ៊្វុនស៊ិនប៉ិចនៅក្នុងគ្រានោះ ខណ:ព្រះអង្គ មិនមានពេលវេលាគ្រប់គ្រាន់ សម្រាប់ដឹកនាំគណបក្សរាជានិយមមួយនេះ។ រឿងរ៉ាវស្នេហាក្រៅអាពាហ៍ពិពាហ៍របស់ទ្រង់ ក៏បានបំផ្លាញជីវិតនយោបាយ ស្ទើរតែរលាយសាបសូន្យ ។
ប៉ុន្តែនៅអាមេរិកឯណោះវិញ ព្យុះបោកបក់ដ៏ធំ ក៏បានគំរាមកំហែងដល់លោកអតីតប្រធានាធិបតី ប៊ីល គ្លីនតុន ដែលមានស្នេហាជាមួយអតីតអ្នកហាត់ការ នាង ម៉ូនីកា ឡេវីនស្គី ។ រឿងអាស្រូវផ្លូវភេទរបស់លោកប៊ីល គ្លីនតុន គឺជារឿងអាស្រូវដ៏ធំបំផុត ហើយល្បីសុះសាយពេញពិភពលោក ។ ប៉ុន្តែទោះបីជាយ៉ាងណាក៏ដោយចុះ វាមិនបានធ្វើឱ្យលោកបាត់បង់តំណែងប្រធានាធិបតីឡើយ ។
លោកបានក្លាយជាប្រធានាធិបតីដំបូងគេ មកពីគណបក្សប្រជាធិបតេយ្យ ដែលបានកាន់តំណែងប្រធានាធិបតី បាន២អាណត្តិពេញចាប់តាំងពីឆ្នាំ១៩៩៣ ដល់ឆ្នាំ២០០១ បន្ទាប់ពីប្រធានាធិបតី ហ្វ្រែងគ្លីន រូសាវែល( Franklin Roosevelt) ។
រឿងអាស្រូវស្នេហារបស់សម្តេចក្រុមព្រះ និងរឿងអាស្រូវស្នេហារបស់ប៊ីល គ្លីនតុន បាននាំដល់ផលវិបាក២ផ្សេងគ្នា ។ ឥឡូវលោក
កឹម សុខា កំពុងតាមលងដោយរឿងអាស្រូវស្នេហាដូចគ្នា ។
តើអនាគតនយោបាយរបស់លោកកឹម សុខា អាយុ៦៣ឆ្នាំ នឹងត្រូវបំផ្លាញដោយរឿងអាស្រូវស្នេហារវាងស្រីម្នាក់ ដែលឈ្មោះថា ស្រីមុំ ឬយ៉ាងណា?
ពេលវេលានឹងប្រាប់អំពីអនាគតនយោបាយរបស់លោក ៕
ចែករំលែកព័តមាននេះ