រាជធានីភ្នំពេញ ៖ ផ្ទះប្រជាពលរដ្ឋស្តុកម៉ូតូ និងកូនឡានជ័រប្រើអាគុយមួយកន្លែងនៅម្តុំផ្សារអូរឬស្សី ត្រូវអគ្គិភ័យឆាបឆេះយ៉ាងសន្ធោសន្ធៅ បង្កឱ្យមានការភ្ញាក់ផ្អើលទាំងកណ្តាលយប់ រហូតដល់កម្លាំងសមត្ថកិច្ចនគរបាល បានប្រើប្រាស់រថយន្តពន្លត់អគ្គិភ័យជាច្រើនគ្រឿងចេញទៅជួយអន្តរាគមន៍បាញ់ពន្លត់ ។ ហេតុការណ៍នេះ បានកើតឡើងកាលពីវេលាម៉ោង១១និង២០នាទីយប់ថ្ងៃទី១៣ ខែតុលា ឆ្នាំ២០២១ នោចំណុចផ្ទះលេខ២៩ យីហោ «ហួយ គង់ហេង» លក់ ម៉ូតូ និងកូនឡានជ័រប្រើអាគុយគ្រប់ប្រភេទ ស្ថិតនៅតាមបណ្ដោយលេខ១៨២ ក្នុងសង្កាត់អូរឬស្សីទី៤ ខណ្ឌ៧មករា រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុ ប្រជាពលរដ្ឋរស់នៅជិតខាងបានឃើញផ្សែង និងអណ្តាតភ្លើងហុយចេញពីផ្ទះ «ហួយ គង់ហេង» ជាន់ទី១ ដែលជាផ្ទះស្តុក ម៉ូតូ និងកូនឡានជ័រប្រើអាគុយ ហើយក៏បាននាំគ្នាយកទឹក និងបំពង់ពន្លត់អគ្គិភ័យមកជួយបាញ់ពន្លត់ តាមអ្វីដែលអាចធ្វើទៅបាន ក៏ដូចជាជួយទប់ស្កាត់កុំឲ្យអណ្តាតភ្លើងឆេះរាលដាលផ្ទះប្រជាពលរដ្ឋផ្សេងទៀត ។
ប្រភពដដែលបន្តថា ប៉ុន្តែដោយសារស្ថានភាពភ្លើងឆាបឆេះខ្លាំងពេក ប្រជាពលរដ្ឋ រួមជាមួយសមត្ថកិច្ចមូលដ្ឋាន ក៏បានទាក់ទងទៅរថយន្តពន្លត់អគ្គិភ័យរបស់ការិយាល័យ បង្ការ និងពន្លត់អគ្គីភ័យ ដើម្បីឲ្យចុះមកជួយអន្តរាគមន៍បាញ់ទឹកពន្លត់ភ្លើងនោះឱ្យទាន់ពេលវេលា ។ ប៉ុន្តែអ្វីដែលគួរឲ្យសាកស្តាយនោះ គឺសម្ភារៈដូចជា ម៉ូតូ និងឡានគ្រឿងជ័រដែលម្ចាស់ស្តុកក្នុងផ្ទះនោះ ត្រូវអណ្តាតភ្លើងឆាបឆេះអស់មួយចំនួនធំផងដែរ ។
លោកវរសេនីយ៍ត្រី ហ៊ុន វណ្ណា នាយនគរបាលប៉ុស្តិអូរឬស្សីទី៤ ខណ្ឌ៧មករា បានប្រាប់ឲ្យដឹងថា អាជីវករដូចមានឈ្មោះខាងលើ បានជួលផ្ទះកើតហេតុនោះទាំងលើទាំងក្រោម ដើម្បីលក់កង់ ម៉ូតូ ឡានជាគ្រឿងជ័រគ្រប់ប្រភេទជាយូរឆ្នាំមកហើយ ហើយគាត់ស្នាក់នៅខាងក្រោម ដូច្នោះមូលហេតុនៃការឆាបឆេះនោះ គឺបណ្តាលមកពីទុស្សេខ្សែភ្លើង ។ លោក ហ៊ុន វណ្ណា បញ្ជាក់ទៀតថា បើតាមការរៀបរាប់របស់ម្ចាស់ផ្ទះ ស្តីអំពីគ្រោះមហត្តរាយនៃអគ្គិភ័យនោះ គឺខូចខាតគ្រឿងជ័រច្រើនមែន ប៉ុន្តែគិតជាទឹកប្រាក់អស់តិចតួចដែរទេ ។
សម្រាប់ប្រតិបត្តិការសង្គ្រោះវិញ សមត្ថកិច្ចបានប្រើប្រាស់រថយន្ដការិយាល័យបង្ការ និងពន្លត់អគ្គិភ័យចំនួន ៦គ្រឿង ប្រើទឹកអស់៦ឡាន ស្មើរនឹង២៤ម៉ែត្រគូប, រថយន្តជំនួយមកផ្សារទំនើបអូឡាំព្យា ចំនួន ២គ្រឿង ប្រើប្រាស់ទឹកអស់១ឡាន ស្មើរនឹង៦ម៉ែត្រគូប ទើបរលត់ទាំងស្រុងទៅវិញ នៅវេលាម៉ោង ប្រមាណ១យប់រំលងអធ្រាត្រនាថ្ងៃដដែលនោះ ៕
ចែករំលែកព័តមាននេះ