ឧកញ៉ាម្នាក់ដែលគេទើបតែបានស្គាល់តាមការចុះផ្សាយតាមរយៈសន្តិភាព…មែនទែនទៅគួរឱ្យខ្មាស់ខ្មោចណាស់ ។ កាលពីបានឧកញ៉ាថ្មីៗ…ហេតុតែចង់ល្បីឈ្មោះ…ព្រោះឈ្មោះខូចយូរហើយនោះ…បានបោកអ្នកកាសែត…អ្នកទូរទស្សន៍គួរឱ្យខ្មាស…
ឧកញ៉ាម្នាក់ដែលគេទើបតែបានស្គាល់តាមការចុះផ្សាយតាមរយៈសន្តិភាព…មែនទែនទៅគួរឱ្យខ្មាស់ខ្មោចណាស់ ។
កាលពីបានឧកញ៉ាថ្មីៗ…ហេតុតែចង់ល្បីឈ្មោះ…ព្រោះឈ្មោះខូចយូរហើយនោះ…បានបោកអ្នកកាសែត…អ្នកទូរទស្សន៍គួរឱ្យខ្មាស…អៀនខ្លួនណាស់ ដែលចាញ់បោកគាត់… ពេលបានឧកញ៉ាថ្មីៗ…បានទៅលួមលោមប្រធានសមាគមសិល្បករខ្មែរ…ប្រមូលអស់អ្នកល្បីៗមកស្ដាប់គាត់ព្រោក…ប្រមូលអស់ហើយអ្នកកាសែត អ្នកទូរទស្សន៍ ទាំងអ្នកវិទ្យុ…ដោយទាំងអ្នកកាសែតកោះសន្តិភាពម្នាក់ដែរ…ទៅថតរូប ថតសម្លេង…ថតការសន្យាជួយសមាគមឱ្យមានប្រាក់ទុកចំណាយ…ដោយមានស្រីក្មេងម្នាក់នៅអែបគាត់ផង ។
អ្នកកាសែតសួរ៖
-លោកឧកញ៉ា ស្រីម្នាក់នៅអមលោកឧកញ៉ាឱ្យសរសេរដាក់ថាម៉េច ? ភរិយាលោកមែន ឬមិនមែន ?
លោកឧកញ៉ាដែលទើបបានងារថ្មីប្រាប់ថា៖
-ដាក់ថា លោកជំទាវទៅចុះ…មិនបាច់សង្ស័យសួរច្រើនទេ…
អ្នកកាសែតទាំងអ្នកទូរទស្សន៍សង្ស័យថា មិនមែនជាភរិយាគាត់ទេ…ប៉ុន្តែគាត់ប្រាប់ទៅហើយ ក៏ដាក់តាមទៅ…គឺដាក់ថា មានវត្តមានលោកឧកញ៉ា…និងលោកជំទាវ…ហេ ! ហេ !
រឿងមួយនេះក៏កន្លងផុតទៅ…ចង់ឱ្យដាក់ថា ម៉ែជំទាវក៏មិនដឹងកែប្រែម៉េចដែរ ។
ថ្ងៃក្រោយបន្តិចមកទៀត លោកឧកញ៉ាបានចូលរួមក្នុងកម្មវិធីកឋិនទានមួយដង្ហែទៅខេត្តព្រៃវែង…ហេតុតែជក់ចិត្តដិតអារម្មណ៍ចង់ឱ្យល្បី…ចង់ស្ដារឈ្មោះខូច…ឬចង់អួតប្រាប់នាងៗថា ខ្លួនឯងមិនមែនធម្មតានោះ ក៏បានអញ្ជើញអ្នកសិល្បៈដែលស្គាល់ថ្ងៃមុន…រួមជាមួយក្រុមអ្នកកាសែត អ្នកទូរទស្សន៍ ដែលធ្លាប់បោកប្រើបានពីថ្ងៃមុននោះអមដំណើរជាមួយផងដែរ ។
អង្គកឋិនបានទៅដល់ខេត្តព្រៃវែង ដោយសុវត្ថិភាព…តាមការគ្រោងទុក…ក្រោយពេលសូត្រមន្តវេរកឋិនទានចប់…លោកឧកញ៉ាមហាលោតផ្លោង…អមដោយស្រីក្មេងម្នាក់ទៀត ដែលអ្នកមិនស្គាល់ស្មានថា កូនស្រីគាត់…អ្នកកាសែតទាំងឡាយគ្មានអារម្មណ៍នឹកនាបែកឆ្វេងទេ…។
អ្នកកាសែតកោះសន្តិភាពម្នាក់មាឌល្អិតដែលមាត់ដាច និងរហ័សរហួនជាងគេសួរថា៖
-លោកឧកញ៉ាស្រីម្នាក់ក្មេងនៅអមជាមួយលោកឧកញ៉ា តើឱ្យដាក់ថាម៉េច…ជាកូន ឬសាច់ញាតិ ?
លោកឧកញ៉ាម្ចាស់ដើមបុណ្យបញ្ចុះគោល…(ហ្អា សុំទោស!) មិនមែនបញ្ចុះគោលទេ គឺកឋិនទាន បានប្រាប់ថា ៖
-ក្មួយឯងដាក់ថា លោកជំទាវទៅ…ជំទាវខ្ញុំហើយហ្នឹង…ជួយប្រាប់អ្នកកាសែត ទូរទស្សន៍ដទៃទៀតផង…កុំឱ្យគេយល់ច្រឡំ…ដាក់ថា ជំទាវទៅ អត់ទាស់ខុសទេ…
បានលោកឧកញ៉ាមហាលោតផ្លោងជួយបំភ្លឺ…ជួយបញ្ជាក់បន្ថែមបែបនេះ ធ្វើឱ្យអ្នកកាសែតមួយក្រុមចាប់ផ្ដើមឆ្ងល់…មិនមែនត្រឹមឆ្ងល់ធ្វើក្បាលងីងើទេ…ថែមទាំងនាំគ្នាអស់សំណើចថែមទៀត…ដូចជារកវាចាថ្លែងសឹងតែមិនបាន…។
និយាយពីក្រុមអ្នកសិល្បះវិញ ដែលលើកគ្នាមិនតិច…សុទ្ធតែតារា…អ្នកចម្រៀងល្បីឈ្មោះ…នឹកឃើញកាលជួបគ្រាដំបូងមានស្រីម្នាក់ប្រាប់ថា ជាលោកជំទាវទៀតគាត់…ពេលនេះជួបមុខស្រីក្មេងប្លែកម្នាក់ទៀត ឱ្យដាក់ថា ជំទាវទៀត…ពិតជាមិនធម្មតារបស់គេមែន ។ ប៉ុន្តែមិនមាត់…មិនហ៊ានសួរនាំទេ…ព្រោះគាត់ហ៊ានបង្ហាញ…ហ៊ានអះអាងប៉ុណ្ណោះហើយ…សុំសរសើរគាត់ទៅចុះ…ហេ ! ហេ !
និយាយឱ្យឃើញជាក់ស្ដែង…ថ្ងៃកឋិននៅស្រុកខាងប្រពន្ធក្មេងខេត្តព្រៃវែង…ហេតុតែចង់លើកមុខមាត់ឱ្យប្រពន្ធ ឬឱ្យលោកជំទាវក្មេងស្បៃវែងគ្រាន់បើនេះ…តារាសិល្បៈល្បីៗបានសម្ដែងនូវទឹកចិត្តជ្រះថ្លា…ច្រៀងកំដរបុណ្យទាន…ញុាំងឱ្យពិធីនៅស្រុកខាងស្រីក្មេងមានភាពអធិកអធម្ម…អ្នកស្រុកជិតឆ្ងាយមកជុំគ្នា…អបអរសាទរនាងក្មេងដែលចេះរកប្ដីមានងារជាឧកញ៉ា…ទោះបីទំពែកតិចៗពីមុខក្ដី…គឺគ្រនា់បើមែនកុំឱ្យតែទំពែកអាក្រោមបានហើយ ។
ពេលចប់កម្មវិធីទាំងអ្នកសិល្បៈ ទាំងអ្នកកាសែតនិងអ្នកទូរទស្សន៍រួមជាមួយអ្នកហែហមដទៃទៀតជុំគ្នា…ជាមួយម្ចាស់ដើមបុណ្យមុនឡើងរថយន្តមកភ្នំពេញវិញ ក្រែងបានសោហ៊ុយខ្លះ…ព្រោះបុណ្យឧកញ៉ាដែលគាត់អញ្ជើញប៉ុណ្ណោះហើយ…មិនឱ្យអត់ទេ…យ៉ាងហោច ក៏បានសោហ៊ុយចាក់សាំង…គុយទាវកាហ្វេតាមផ្លូវ… ។ ពេលជុំគ្នាត្រូវលោកឧកញ៉ាមហាលោតផ្លោង សើចញឹមៗដាក់…ដោយនិយាយថា៖
-នាំគ្នាអញ្ជើញៗចុះ ខ្ញុំក៏ទៅដែរ…ចាំទៅដល់ភ្នំពេញវិញ ខ្ញុំនឹងចាត់ចែងជូនសគុណនឿយហត់ខ្លះ…កុំបារម្ភ…
គ្មានអ្នកសិល្បៈណាមួយ អស់សង្ឃឹមទេ…ហើយក៏គ្មានអ្នកកាសែត អ្នកទូរទស្សន៍ណាមួយ អស់សង្ឃឹមដែរ…គិតថា ពេលវិលមកដល់ភ្នំពេញវិញ…លោកឧកញ៉ារបស់យើងច្បាស់ជាដោះស្រាយ….មិនខុសបំណងឡើយ ។
មែនហើយ…បានមកដល់ភ្នំពេញវិញ ស្ងាត់ឈឹងដូចចោរលួចសេះ…សូម្បីតែមុខក៏អត់បានជួបដែរ…បិទទាំងទូរស័ព្ទទៅទៀត…ឬទូរស័ព្ទចូលអត់លើក…ចប់ទៅហោង មិនខុសពីគាត់បោកប្រើឡើយ ។
អ្នកសិល្បៈកំប្លែងម្នាក់និយាយបែបកំប្លុកកំប្លែងប្រាប់កោះសន្តិភាពថា៖
-នែ អ្នកកាសែត…ប្អូនឯងដឹងទេ ? ពាក្យចាស់ពោលថា ទំពែកពីមុខគេថា ទំពែកចាងហ្វាង…ទំពែកខាងៗគេថា ទំពែកនេះធ្វើប្លង់តុងសម្រាប់តែគេប្រើ…ឯទំពែកកែបកង់ ជាទំពែកមនុស្សខូច បើមិនកូតក៏បោក…។
អ្នកកាសែតបានឮតារាកំប្លែងម្នាក់និយាយប្រាប់…ដំណាលបែបនេះ ដល់ប្រៀបធៀបទៅនិងលក្ខណសម្បត្តិលោកឧកញ៉ាមហាលោតផ្លោងម្នាក់នេះ ទើបភ្លឺភ្នែក លាន់មាត់ថា ៖
-ពិតជាមិនខុសមែន…ទំពែកគាត់ ជាទំពែកកែបកង់…អ៊ីចឹងបានជាពូកែបោកឈ្ងុយម្លឹងៗ…អ៊ីចឹងបានខូចម្លឹងៗ…ចាប់ពីពេលហ្នុងមកដល់ពេលនេះ ទាំងក្រុមអ្នកសិល្បៈដែលធ្លាប់បានភ្លក់…ទាំងក្រុមអ្នកទូរទស្សន៍ និងក្រុមអ្នកកាសែត…បើនៅតែចាញ់បោកគាត់ទៀត…ថ្ងៃក្រោយសុំកុំរាង !! អ្នកដឹងរឿង ទើបដឹង…អ្នកមិនដឹង ឬអ្នកមុជមិនជ្រៅ ទៅមិនឆ្ងាយ…នៅតែមិនបានដឹង…សុំដំណាលរឿងខ្លីបន្តិចទៅចុះ… ឧកញ៉ាអស្ចារ្យរ៉ុយ រ៉ុយ…មានកូនប្រុសម្នាក់ទៅជួយការងារ គ្រាន់តែឈ្មោះប៉ុណ្ណោះ…កុំឱ្យថាបោះបង់កូនចោល…មានកូននោះនិយាយប្រាប់អ្នកកាសែតថា៖
-ប៉ា គាត់លែងម៉ាក់ខ្ញុំទៅហើយ…មិនមែនលែងលះតាមច្បាប់ទេ…គឺគាត់លែងរវល់…ឯម៉ាក់ខ្ញុំបានត្រឹមតែឈឺចាប់ប៉ុណ្ណោះ…ប៉ាខ្ញុំគាត់ធ្វើអី ធ្វើទៅ ស្រេចតែគាត់ ម៉ាក់ខ្ញុំអត់ហ៊ានជ្រៀតជ្រែកទេ ។
កូនប្រុសដ៏គួរឱ្យអាណិតស្រឡាញ់នេះឆ្លើយ ឆ្លងជាមួយអ្នកកាសែតថា៖
-ម៉ាក់ខ្ញុំនៅតែផ្ទះទេ…ក្មេងៗដែលប៉ាឱបបណ្ដើរ…មិនមែនម៉ាក់ខ្ញុំទេ…គឺជាស្រីរបស់គាត់! ស្រីគាត់ច្រើនណាស់ ខ្ញុំស្គាល់មិនអស់…ហើយខ្ញុំក៏មិនចង់ស្គាល់ដែរ…!
ថ្ងៃក្រោយនៅមានរឿងនិទានប្លែកៗទៀត…ព្រោះជាទស្សនៈគ្មានវាចានឹងថ្លែងទេ…ខ្លីៗដែលនិទានមិនចេះចប់…ទុកឱ្យនាងស្បៃវែងប្រពន្ធចុងចំតិត…ជំទាល…ជេរប្រមាថតាមចិត្តទៅចុះ…ហេ ! ហេ !
ចែករំលែកព័តមាននេះ