មិនថាអ្នកបួសឬគ្រហស្ថដែលបានតាំងចិត្តប្រកាន់យកជម្រើសទាំង៦គឺ បីកុំ និងបីការពារបានល្អហើយ គឺជាមនុស្សដែលបានអប់រំបន្ទុំចិត្តរបស់ខ្លួនឱ្យប្រព្រឹត្តទៅដោយសុខសួស្តី ចិត្តកាយត្រជាក់ត្រជំព្រោះប្រាកដនិយមក្នុងចិត្តថាខ្លួនមិនមានការបៀតបៀនដោយជំងឺកូវីដ១៩ឡើយ ដោយហេតុថាខ្លួនមានបង្អែកគឺបីកុំបីការពារដ៏រឹងមាំហើយ ។
កាលណាបើខ្លួនយើងមានបីកុំនិងបីការពាររក្សាបានខ្ជាប់ខ្ជួនហើយរមែងញុំាងអត្តភាពទាំងមូលឱ្យប្រព្រឹត្តទៅដោយសុខភាពល្អ បវរមង្គលក្នុងក្រុមគ្រួសារ ជាចិត្តដែលល្អស្អាតមិនពព្រុះពពាលដោយមេរោគដ៏សាហាវនេះឡើយ ។
តើបីកុំបីការពារគឺជាអ្វី ?
បីកុំបីការពារជាវិធានការការពារជំងឺកូវីដ១៩បានយ៉ាងមានប្រសិទ្ធភាពគឺ បីកុំមាន ១-កុំចូលទៅកន្លែងបិទជិតមិនមានខ្យល់ចេញចូលគ្រប់គ្រាន់ ២-កុំចូលទៅកន្លែងមានមនុស្សច្រើនកុះករ ៣-កុំប៉ះពាល់គ្នា ។ ចំណែកបីការពារមាន ១-ពាក់ម៉ាសនៅគ្រប់ទីកន្លែង ២-លាងដៃជាមួយនឹងសាប៊ូ អាល់កុល ឬជែល និង៣-រក្សាគម្លាតសុវត្ថិភាពសង្គមចាប់ពីមួយម៉ែត្រកន្លះឡើងទៅ ។
បីកុំបីការពារជាសម្លៀកបំពាក់ ជាគ្រឿងអលង្ការ ពោលគឺជាវិធានការការពារដ៏ល្អប្រពៃនៃចិត្តកាយរបស់យើង បើតាមផ្លូវធម៌លោកចាត់ថាជាជម្រកដ៏ត្រជាក់របស់ចិត្ត ជាអាហារដ៏មានរស់ជាតិយ៉ាងពិសិដ្ឋ និងជាថ្នាំកែរោគរបស់ចិត្តយ៉ាងមានប្រសិទ្ធភាព ។
ដូចនេះមនុស្សគ្រប់រូបមិនថាបព្វជិត ឬគ្រហស្ថ កាលបើប្រាថ្នានូវសេចក្ដីសុខសម្រាប់ខ្លួន ត្រូវតែទូន្មានចិត្ត អប់រំកាយរបស់ខ្លួនឲ្យចេះរក្សាវិធានការបីកុំ និងបីការពារនេះឱ្យបានខ្ជាប់ខ្ជួនជានិច្ច ដើម្បីបានជាបង្អែក ឬជាស្ពានឈានចម្លងជីវិតឱ្យរួចផុតពីជំងឺកូវីដ១៩ ទើបជីវិតបានសុខសាន្ត ។
ព្រោះថាជីវិតមនុស្សលោកសព្វថ្ងៃនេះបានទៅកាន់ទីសុខសាន្តក៏ព្រោះបីកុំបីការពារ បានបរិបូណ៌ដោយសុខភាពក៏ព្រោះបីកុំបីការពារ បានសុខកាយសប្បាយចិត្តក៏ព្រោះរក្សាបីកុំបីការពារបានល្អហើយ ៕ សាន សារិន
ចែករំលែកព័តមាននេះ