រាជធានីភ្នំពេញ ៖ ចាត់ទុកជាដំណឹងដ៏ក្រៀមក្រំបំផុត ព្រោះនៅមុននេះបន្តិចសាច់ញាតិរបស់លោកព្រឹទ្ធាចារ្យ លី ប៊ុនយីម បានប្រកាសឱ្យដឹងថា លោកព្រឹទ្ធាចារ្យផ្នែកសិល្បកររៀមច្បង ក្នុងវិស័យភាពយន្តខ្មែរ តាំងពីសម័យដើមរូបនេះ បានទទួលរមណភាព នៅវេលាម៉ោងប្រមាណជិត ១២ ថ្ងៃត្រង់ ថ្ងៃទី ៥ ខែតុលា ឆ្នាំ២០២១ នេះ ។
ដំណឹងមរណភាពរបស់ផលិតករភាពយន្តខ្មែរដ៏ល្បីល្បាញក្នុងកំលុងឆ្នាំ១៩៧០ លោក លី ប៊ុនយីម ដែលជាចាងហ្វាងផលិតកម្មរន្ទះពេជ្រភាពយន្ត ត្រូវបានផ្សព្វផ្សាយដោយក្រុមគ្រួសាររបស់លោកផ្ទាល់ ។ «សូមលោកប្តីទៅសោយសុខឋានដ៏ខ្ពង់ខ្ពស់ ទៅឋានសួគ៌ណាប្តីសម្លាញ់ខ្ញុំ ស្រលាញ់បងខ្លាំងណាស់ គាត់ស្លាប់ម៉ោង ១១.៥០ នាទីព្រឹកថ្ងៃទី ៥ ខែតុលា ឆ្នាំ ២០២១» ។ នេះបើយោងតាមហ្វេសប៊ុក ឈ្មោះ Soly Roth ដែលអះអាងថាជាភរិយារបស់លោក និងបានបង្ហោះរូបថតអមជាមួយរូបថតលោក លី ប៊ុនយីម ។
លោក លី ប៊ុនយីម មុនទទួលអនិច្ចកម្មនាថ្ងៃអង្គារ ទី០៥ ខែតុលា ឆ្នាំ២០២១ នេះ គឺលោកបានឆ្លងជំងឺកូវីដ-១៩ និងត្រូវបានបញ្ជួនទៅសម្រាកព្យាបាលកាលពីដើមសប្តាហ៍មុន ។ តែស្ថានភាពរបស់លោក គឺធ្ងន់ធ្ងរ ក្រោយរកឃើញឆ្លងជំងឺកូវីដ-១៩ ដោយលោកព្រឹទ្ធាចារ្យ លី ប៊ុនយីមក្រៅពីឆ្លងកូវីដ-១៩ ក៏មានជំងឺប្រចាំកាយច្រើនមុខផងនោះ។
កូនប្រុសរបស់លោក គឺលោក លី រដ្ឋា ធ្លាប់បានអះអាងប្រាប់កោះសន្តិភាពតាមទូរស័ព្ទថា កាលពីសប្តាហ៍មុនថា បច្ចុប្បន្នលោកមិនទាន់ដឹងពីស្ថានភាពវិវត្តន៍ថ្មីបន្ថែមទៀតពីឪពុករបស់លោកឡើយ ដោយសារលោកកំពុងស្ថិតនៅសហរដ្ឋអាមេរិក។ លោកបញ្ជាក់ថា នាពេលនេះលោកគ្រាន់តែដឹងឪពុករបស់លោកត្រូវបានក្រុមគ្រូពេទ្យយកទៅសម្រាកព្យាបាលនៅមណ្ឌលមួយកន្លែងនាខេត្តកណ្តាល។ លោកបន្ថែមថា នៅពេលសម្រាកព្យាបាលដោយជំងឺកូវីដ១៩នោះក្រុមគ្រួសារបានប្រាប់អោយសាច់ញាតិអោយត្រៀមចិត្ត ព្រោះឪពុករបស់លោកអាចនៅបន្តត្រឹមមួយសប្តាហ៍ ឬលើលពីនេះតិចតួចប៉ុណ្ណោះ។
លោកថា បច្ចុប្បន្នឪពុករបស់លោកមានវ័យ៨៧ឆ្នាំហើយ ហើយសម្រាកតែនៅលើគ្រែដោយមានជំងឺប្រចាំកាយ ខណះពេលខ្លះឪពុករបស់លោកក៏មានការវង្វេងវង្វាន់ផងដែរ។ លោកនិយាយថា គាត់ចាស់ជរា មានជំងឺប្រចាំកាយទៀត ដូចនេះនៅពេលមានជំងឺកូវីដវាយលុកទៀតនោះវាជាការពិបាកណាស់ បើសូម្បីក្មេងនៅពិបាក ចុះទម្រាំគាត់ចាស់។ យ៉ាងណា បើតាមលោក លីរដ្ឋា រហូតមកដល់ពេលនេះលោកនៅមិនទាន់ដឹងទេថា ឪពុករបស់លោកបានឆ្លងជំងឺនេះមកពីណា បើគាត់នៅតែផ្ទះ។
លោកបញ្ជាក់ថា ឪពុកលោកសម្រាកតែនៅផ្ទះដោយមានអ្នកមើលថែបញ្ចុកបាយ រឿងអ្វីបានគាត់ឆ្លងជំងឺនេះ។ យ៉ាងណាលោកគិតថា ឪពុករបស់លោកទំនងជាអាចឆ្លងមកពីសមាជិកគ្រួសារដែលមើលថែឪពុករបស់លោក ព្រោះបច្ចុប្បន្នលោកកំពុងស្នាក់នៅជាមួយនឹងនារីម្នាក់ដែលលោកមិនដឹងច្បាស់ថា គាត់ជាភរិយាថ្មីឪពុកលោកឬយ៉ាងណា ។
គួរបញ្ជាក់ថា ស្នាដៃរបស់លោក លី ប៊ុនយីម មានច្រើនណាស់ សុទ្ធសឹងជារឿងល្បីល្បាញខ្លាំង ក្នុងនោះ មានដូចជារឿង សព្វសិទ្ធិ, អដ្ឋិសុវណ្ណច័ន្ទកេសរ, សំគមបាញ់លលក, អនអេីយស្រីអន, ពុទ្ធិសែននាងកង្រី, និងរឿងសេះសមុទ្ទជាដើម។ល ៕
ចែករំលែកព័តមាននេះ