ចាប់តាំងពីក្រសួងសុខាភិបាលបានរៀបចំកម្មវិធីចាក់វ៉ាក់សាំងជំងឺស្អូច រួមបញ្ចូលគ្នាជាមួយនឹងជំងឺកញ្ជ្រឹលចាប់តាំងពីឆ្នាំ២០១៣មក ករណីកើតមានជំងឺស្អូចមានការថយចុះយ៉ាងខ្លាំង ដោយក្នុងរយៈពេលពី២ឆ្នាំចុងក្រោយនេះ
ចាប់តាំងពីក្រសួងសុខាភិបាលបានរៀបចំកម្មវិធីចាក់វ៉ាក់សាំងជំងឺស្អូច រួមបញ្ចូលគ្នាជាមួយនឹងជំងឺកញ្ជ្រឹលចាប់តាំងពីឆ្នាំ២០១៣មក ករណីកើតមានជំងឺស្អូចមានការថយចុះយ៉ាងខ្លាំង ដោយក្នុងរយៈពេលពី២ឆ្នាំចុងក្រោយនេះ ជំងឺស្អូចកើតមានត្រឹមតែ៣ទៅ៤ករណីប៉ុណ្ណោះ ក្នុងមួយឆ្នាំៗនៅកម្ពុជា ។ នេះបើតាមការឲ្យដឹងរបស់ លោក ឱក វិជិត ប្រធានកម្មវិធីជាតិ ផ្តល់ថ្នាំបង្ការនៃមជ្ឈមណ្ឌលជាតិគាំពារមាតានិងទារក បានថ្លែងប្រាប់កោះសន្តិភាពឲ្យដឹងតាមទូរស័ព្ទកាលពីពេលកន្លងទៅនេះ ។
ថ្វីត្បិតតែជំងឺនេះមានការថយចុះខ្លាំងក៏ពិតមែន តែជំងឺនេះក៏នៅតែគំរាមកំហែងដល់ស្ត្រីកំពុងពពោះយា៉ងខ្លាំងក្លាផងដែរ ជាពិសេសទារកនៅក្នុងផ្ទៃ ហើយកើតមានជំងឺនេះដែលផលវិបាកមានដូចជា៖
-អាចបង្កឲ្យទារករលូត
-ទារកស្លាប់នៅក្នុងផ្ទៃ
-កើតមកមានកាយសម្បទាមិនគ្រប់គ្រាន់ (កំបុតដៃ កំបុតជើង វៀចមាត់ ភ្នែកស្លឺ) ។
ដូច្នេះសម្រាប់ស្ត្រីដែលកំពុងមានផ្ទៃពោះ ហើយកើតមានជំងឺប្រភេទនេះ គួរតែទៅពិភាក្សាជាមួយគ្រូពេទ្យដើម្បីរកដំណោះស្រាយ។ ជាងនេះទៅទៀត បើសិនជាស្ត្រីមានគម្រោងយកកូន គួរតែទៅពិភាក្សាជាមួយគ្រូពេទ្យជាមុន ដើម្បីចាក់វ៉ាក់សាំងការពារជំងឺនេះ ។
គួរបញ្ជាក់ថា រោគសញ្ញាជំងឺស្អូចដែលលោកអ្នកគួរតែចាប់អារម្មណ៍នេះមានដូចជា៖
-ក្តៅខ្លួនតិចតួច
-ឈឺក្បាល
-ហៀរសំបោរ ឬតឹងច្រមុះ
-ហើមកូនកណ្តុរនៅផ្នែកខាងក្រោមនៃលលាដ៍ក្បាល ផ្នែក.កខាងក្រោយ និងក្រោយគុម្ពត្រចៀក
-មានកន្ទួលចាប់ផ្តើមកើតមាននៅលើមុខ និងរាលដាលយ៉ាងលឿនទៅលើទ្រូង បន្ទាប់មកដៃ និងជើង ។
ចូរទៅពិគ្រោះយោបល់ជាមួយគ្រូពេទ្យ បើសិនជាអ្នកគិតថា អ្នកឬកូនកើតជំងឺស្អូច ៕
ចែករំលែកព័តមាននេះ