រាជធានីភ្នំពេញ៖ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារមានប្រសាសន៍ថា ទោះបីមានការយកចិត្តទុកដាក់ពីរាជរដ្ឋាភិបាល ដោយបានបង្កើតនូវយន្តការជាច្រើនក្នុងការគ្រប់គ្រង…
រាជធានីភ្នំពេញ៖ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារមានប្រសាសន៍ថា ទោះបីមានការយកចិត្តទុកដាក់ពីរាជរដ្ឋាភិបាល ដោយបានបង្កើតនូវយន្តការជាច្រើនក្នុងការគ្រប់គ្រង និងផ្តល់សេវាដល់មុខសញ្ញាកុមារទូទៅ និងកុមាររងគ្រោះយ៉ាងណាក៏ដោយ ក៏នៅមានកុមារមួយ ចំនួនកំពុងរស់នៅក្នុង ស្ថានភាពលំបាករងគ្រោះ ដែលត្រូវការការគាំទ្រ និងអន្តរាគមន៍ជាចាំបាច់។
ឯកឧត្តម វង សូត បានថ្លែងបែបនេះ នៅក្នុងកម្មវិធីសម្ពោធជាផ្លូវការនូវ «ផែនការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារ ឆ្នាំ២០១៩-២០២៩» តាមរយៈកម្មវិធីអនឡាញ ZOOM នៅថ្ងៃទី២៩ ខែកញ្ញា ឆ្នាំ២០២១ រៀបចំឡើងដោយក្រុមប្រឹក្សាជាតិកម្ពុជា ដើម្បីកុមារ (ក.ជ.ក) សហការជាមួយអង្គការភ្លែនអន្តរជាតិកម្ពុជា អង្គការសកម្មភាពដើម្បីកុមារ ឆាលហ្វានកម្ពុជា អង្គភាពការពារកុមារ និងដៃគូនឹងរៀបចំ
ឯកឧត្តម វង សូត បានបន្ថែមថា «យើងត្រូវតែពង្រឹងយន្តការអនុវត្តប្រព័ន្ធកិច្ចការពារកុមារ និងកសាងសមត្ថភាពធនធានមនុស្ស និងហិរញ្ញវត្ថុសម្រាប់អនុវត្តផែនការសកម្មភាព ដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ ឱ្យមានប្រសិទ្ធភាពស្របតាមស្ថានភាពជាក់ស្តែងនៅឡើយ។ ម្យ៉ាងវិញទៀត បច្ចុប្បន្នការអន្តរាគមន៍ចំពោះកុមាររងគ្រោះរបស់យើង នៅដាច់ដោយឡែក ដោយដុំ មិនទាន់មានក្របខ័ណ្ឌការងារ និងប្រព័ន្ធគ្រប់គ្រងច្បាស់លាស់នៅឡើយ។ ដូច្នេះ គោលនយោបាយជាតិស្តីពីប្រព័ន្ធកិច្ច ការពារកុមារនេះ មានសារៈសំខាន់ខ្លាំងណាស់ក្នុងការជួយដោះស្រាយ បញ្ហាកុមារឱ្យមានលក្ខណៈជាប្រព័ន្ធ» ។
គោលនយោបាយជាតិស្តីពីប្រព័ន្ធកិច្ចការពារកុមារត្រូវបានចុះហត្ថលេខាដាក់ឲ្យប្រើប្រាស់ដោយ សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាជាតិកម្ពុជាដើម្បីកុមារ នៅថ្ងៃទី២៩ ខែឧសភាឆ្នាំ ២០២០។ ដើម្បីជំរុញការអនុវត្តគោលនយោបាយជាតិស្ដីពីប្រព័ន្ធកិច្ចការពារកុមារនេះ ក្រុមប្រឹក្សាជាតិកម្ពុជាដើម្បីកុមារបានរៀបចំ «ផែនការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារ ឆ្នាំ២០១៩-២០២៩» ក្នុងគោលបំណងដើម្បីជំរុញឲ្យក្រសួងស្ថាប័នពាក់ព័ន្ធថ្នាក់ជាតិ និងថ្នាក់ក្រោមជាតិអនុវត្តផែនការនេះប្រកបដោយប្រសិទ្ធភាព និងប្រសិទ្ធផល។
ការរកឃើញពីការស្ទង់មតិអំពើហិង្សាលើកុមារនៅកម្ពុជាពីក្រសួងកិច្ចការនារីក្នុងឆ្នាំ២០១៤ បានបង្ហាញថា ស្ត្រី និងបុរសប្រហែល ៦នាក់ក្នុងចំណោម ១០នាក់នៅគ្រប់វ័យបានជួបប្រទះយ៉ាងហោចណាស់នូវទម្រង់នៃអំពើហិង្សារាងកាយអារម្មណ៍ និង ឬផ្លូវភេទក្នុងកំឡុងកុមារភាពរបស់ពួកគេ។ ជិតមួយភាគបួននៃស្ត្រី និងបុរសដែលមានអាយុពី ១៣ ទៅ ១៧ឆ្នាំត្រូវបានរាយការណ៍ថាបានជួបប្រទះអំពើហិង្សាច្រើនទម្រង់។ ស្ត្រីម្នាក់ក្នុងចំណោម ៥ នាក់ (២០%) និងបុរស ២៥% បានរាយការណ៍ពីការរំលោភបំពានផ្លូវចិត្តដោយឪពុកម្តាយ ឬមនុស្សពេញវ័យមុនអាយុ ១៨ឆ្នាំ។
គោលនយោបាយជាតិស្តីពីប្រព័ន្ធកិច្ចការពារកុមារ គឺជាយុទ្ធសាស្ត្របង្ហាញអំពីការប្តេជ្ញាចិត្តខិតខំជាក់ស្តែងរបស់រាជរដ្ឋាភិបាលកម្ពុជា ទៅលើការអនុវត្តកិច្ចការពារកុមារដែលមានលក្ខណៈជាប្រព័ន្ធនៅកម្ពុជា និងជាបណ្តុំនៃវិធានបង្កើតឡើងក្នុងគោលបំណងជំរុញ និងលើកកម្ពស់ការការពារកុមារពីការរំលោភបំពាន និងការកេងប្រវ័ញ្ចគ្រប់រូបភាព ដោយផ្អែកលើសសរស្តម្ភ៣ គឺ (១)ការបង្ការទប់ស្កាត់ (២)ការអន្តរាគម (៣)ការផ្តល់សេវានិងការឆ្លើយតប ដែលយើងត្រូវបំពេញជាលក្ខណៈប្រព័ន្ធមួយ។
លោកជំទាវកត្តិសង្គហបណ្ឌិត ម៉ែន សំអនឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចថ្លែងថា «ការលើកកម្ពស់សិទ្ធិកុមារ និងកិច្ចការពារ កុមារ ជាការងាររបស់យើងទាំងអស់គ្នា ដែលតម្រូវឱ្យយើងរួបរួមគ្នាបំពេញការងារជាពហុវិស័យប្រទាក់ក្រឡាគ្នា។ លើសពីនេះទៀត កិច្ចការពារកុមារ ក៏ត្រូវបាន ពិភពលោកកំពុងតែយកចិត្តទុកដាក់ និងរួមគ្នា ដើម្បីបង្ការ ទប់ស្កាត់ និងឆ្លើយតបការរំលោភបំពានគ្រប់ទម្រង់ផងដែរ ហើយកម្ពុជា ជាប្រទេសដែលកំពុងបោះជំហានទៅមុខ ក្នុងការចួលរួមលើកិច្ចការងារនេះ យ៉ាងសកម្ម សំដៅធ្វើឲ្យកាន់តែប្រសើរឡើងនូវការលើកកម្ពស់កិច្ចការពារកុមារ ដើម្បីជាឧត្តមប្រយោជន៍របស់កុមារគ្រប់រូប»។
ប្រព័ន្ធការពារកុមារគឺជាការប្តេជ្ញាចិត្តជាក់ស្ដែងមួយចំពោះការអនុវត្តការការពារកុមារជាប្រព័ន្ធនៅកម្ពុជារួមមាន៖
១ – ភាពចាំបាច់ក្នុងការការវិនិយោគបន្ថែមលើមន្ត្រីសង្គម ឬបុគ្គលិកសង្គមកិច្ចនៅថ្នាក់ក្រោមជាតិដើម្បីលើក កម្ពស់សេវាគាំពារកុមារប្រកបដោយប្រសិទ្ធភាព ប្រសិទ្ធផល សង្គតិភាព និងទាន់ពេលវេលាសម្រាប់កុមារ និង គ្រួសារនៅក្នុងសហគមន៍។
២ – ការបន្តធានាថាកុមារអាចទទួលបានសេវាផ្លូវច្បាប់ និងសមធម៌សង្គម តាមរយៈការផ្តល់នូវកញ្ចប់ អប្បបរមានៃ សេវាសង្គមកិច្ចសម្រាប់កុមារ និងគ្រួសារដែលត្រូវការកិច្ចការពារ។
៣ – ការឆ្លើយតបទៅនឹងកុមារ និងគ្រួសាររបស់ពួកគេដែលរងផលប៉ះពាល់ដោយគ្រោះមហន្តរាយ។
៤ – ការបន្តប្រមូលផ្តុំ ពង្រឹង និងពង្រីកកម្មវិធីដែលមានស្រាប់សម្រាប់កិច្ចការពារកុមារ សំដៅបង្កើនប្រសិទ្ធភាព តម្លាភាព និងស្ថិរភាពឱ្យបានទូលំទូលាយ។
៥ – ការធានាឱ្យបាននូវសង្គិតភាពនៃនីតិវិធី វិធានការ និងយន្តការដែលមានស្រាប់ក្នុងការដោះស្រាយបញ្ហាកុមារ ដើម្បីបំពេញតម្រូវការ និងធានាការពារកុមារ ប្រកបបរិយាកាសគ្រួសារ ក្តីស្រឡាញ់ ការយកចិត្តទុកមាន លក្ខណកុមារមេត្រី និងធានានូវឧត្តមប្រយោជន៍ របស់កុមារ។
នាយិកាប្រចាំប្រទេសនៃអង្គការភ្លែនអន្តរជាតិកម្ពុជា អ្នកស្រី គ្វីននេត វ៉ង បានលើកឡើងថា៖ “ផែនការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារគឺជាសមទ្ធិផលដ៏អស្ចារ្យមួយទៀតដើម្បីលើកកម្ពស់កិច្ចការពារកុមារនៅកម្ពុជា។ នេះគឺជាការប្តេជ្ញាចិត្តជាក់លាក់របស់រាជរដ្ឋាភិបាលកម្ពុជាលើការពង្រឹងការអនុវត្តកិច្ចការពារកុមារជាប្រព័ន្ធនៅកម្ពុជា។ វិធីសាស្ត្រជាប្រព័ន្ធស្តីពីការអនុវត្តកិច្ចការពារកុមារទាមទារឱ្យយើងម្នាក់ៗធ្វើការរួមគ្នា និងធានាឲ្យបាននូវកិច្ចការពារកុមារ និងសំលេងរបស់ពួកគេ ជាពិសេសក្មេងស្រីដែលជាបេះដូងនៃការងាររបស់យើង”។
លោកស្រីមានប្រសាសន៍បន្ថែមទៀតថា៖ “អង្គការភ្លែនអន្តរជាតិកម្ពុជា ហើយខ្ញុំជឿជាក់ថាដៃគូអភិវឌ្ឍន៍ជាច្រើនទៀតបានត្រៀមខ្លួនគាំទ្ររាជរដ្ឋាភិបាលកម្ពុជាដើម្បីធ្វើឱ្យផែនការសកម្មភាពជាតិរយៈពេល ១០ ឆ្នាំខាងមុខនេះទទួលបានជោគជ័យសម្រាប់កុមាររាប់លាននាក់ ជាពិសេសកុមារី នៅកម្ពុជា”។
ពិធីប្រកាសដាក់ឱ្យប្រើប្រាស់ជាផ្លូវការ “ផែនការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារ” នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារ ឯកឧត្តម លោកជំទាវ រដ្ឋមន្ត្រី ក្រសួងស្ថាប័នពាក់ព័ន្ធ ឯកអគ្គរដ្ឋទូត ឯកអគ្គរាជទូតប្រចាំនៅព្រះរាជាណាចក្រកម្ពុជា អនុប្រធាន សមាជិកសមាជិកាក្រុមប្រឹក្សាជាតិកម្ពុជាដើម្បីកុមារ អភិបាល នៃគណៈអភិបាល រាជធានី ខេត្ត តំណាងក្រសួង ស្ថាប័នពាក់ព័ន្ធ អង្គការក្នុងជាតិនិងអន្តរជាតិ និងតំណាងអង្គការដៃគូអភិវឌ្ឍន៍ពាក់ព័ន្ធ ៕
ចែករំលែកព័តមាននេះ